Luka 7
7
1Mmerɛ bɔ ɔhane bɔ ɔka kyire mmenia ne yiele ne, ɔhɔle Kapernaum. 2Odwuli berɛ ne, né sogyaniɛ panyi bie akoaa bɔ ɔla ye ahone so afokyɛ, né wafokyɛ paa maa ɔpena wu. 3Sogyaniɛ ne tele Yesu nga ne, ɔsomane Yudafoɛ mbanyi ne bie kyɛ bɛhɔ ye berɛ, na bɛsrɛ ye maa ɔɔsa ye akoaa ne anwonyerɛ. 4Bɛwale Yesu berɛ ne, bɛsrɛle ye paa kyɛ: “Ye de, odikyɛ ɛyɛ ɛhe ma ye, 5ofikyɛ ɔdɔ yɛ maen, na osili sua bɔ beyia nu mane yɛ.” 6Na Yesu ne bɛ hɔle. Ɔka kaa maa odwu awuro berɛ ne, sogyaniɛ panyi ne somane ye nnamvo maa bɛɛha bɛhyirele ye kyɛ: “Awurade, nnɛha wɔ nwo, ofikyɛ menvata kyɛ ɛba m'awuro. 7Ɛhene ati yeɛ mammɔ hɔen mamma wɔ berɛ ne. Mmom ka edwirɛ bie, ná ɔma m'akoaa ne nwo tɔ ye. 8Ofikyɛ nwura mmeraa bo, na nne sogyafoɛ bɔ bɛwura me bo, na sɛ meka mekyire kõ kyɛ, ‘Kɔ’ a, né wahɔ, sɛ meka mekyire foforɛ kyɛ, ‘Bra’ a, ne wawa.” 9Yesu tele ɛhe ne, ye nwo yɛle ye nwanwa, na ɔkakyile ye nwo ha hyirele bɛ bɔ bɛli ye si ne kyɛ: “Meka mekyire ɛmɔ kyɛ, Israel po, nnwuni gyidie bɔ ɔte piri sɔa.” 10Na mmerɛ bɔ ɛbɔfoɛ nemɔ sa hɔle awuro ne, bɛɛnwuni kyɛ akoaa ne nwo atɔ ye.
11Ɛhene si pɛɛ ne, ɔhɔle kuro bie bɔ bɛfrɛ ye Nain nu; na ye asuafoɛ nemɔ ne mmeni pee ne ye hɔle. 12Opingye kuro ne anoa nanwo ne, né mmenia sõ abrandeɛ bie bɔ wawu, na né bɛfa ye bɛfi kuro nanu bɛfite. Ne ye maame di ye bahorɛ, na ɛhene si ne, ne maame ne te kunaniɛ. Né kuro nanufoɛ pee boka ye so. 13Yesu nye bɔle maame naso ne, ye wora bɔ mane ye, yeɛ ɔha hyirele ye kyɛ: “Yakyi sue.” 14Na ɔɔsɔle bɛen bɔ fuin ne la so nanu, yeɛ bɛ bɔ bɛsõ fuin ne gyinane ɔ. Yesu hane kyɛ: “Abrandeɛ, meka mekyire wɔ kyɛ, dwɔso!” 15Na abrandeɛ bɔ wawu ne dwɔso tenane berɛ, na ɔhyɛle yebo kyɛ odwudwo, na Yesu fale ye mane ye maame.
16Esuronyi hane bɛ mukoraati, na bɛhyɛle yebo bɛyele Nyameɛ ayɛ kyɛ: “Wama diifoɛ kandinga bie so wɔ yɛ nu.” Na besa bɛhane kyɛ: “Nyameɛ apɛ ye nye waanea ye maen.” 17Na ye nwo dwirɛ he trɛ hɔle Yudea ne maen bɔ wapɛ ye nwo wayia namukoraati nu.
18Na Yohane asuafoɛ nemɔ hane edwirɛ he mukoraati hyirele Yohane, 19yeti ɔfrɛle ye asuafoɛ nanu nyɔ somane bɛ kyɛ, bɛɛbisa Awurade kyɛ: “Wɔ yeɛ ɛle bɔ ɔba ne, anaa yɛnea sona foforɛ atee?” 20Mmerɛ bɔ bɛdwuli ye berɛ ne, bɛhane kyɛ: “Yohane Suboniɛ asoma yɛ wɔ berɛ, na yenwa yɛbisa wɔ kyɛ: ‘Aso wɔ yeɛ ɛle bɔ ɔba ne, anaa yɛnea sona foforɛ atee?’”
21Sɔ mmerɛ nala nu ne, ɔsale mmeni pee anwonyerɛ, né ebiemɔ deɛ nu yɛ se paa, na ne ebiemɔ deɛ nu nyɛ sɛ pa, otuli sunzummɔne na ɔmaa anyesiniwaafoɛ pee nwuni nikye. 22Yeti ɔha hyirele bɛ kyɛ: “Bɔ ɛmɔ anwu ye, na ɛmɔ ate ne, ɛmɔhɔ bɛɛha ye nwo dwirɛ behyire Yohane kyɛ: Kesaalae de, anyesiniwaafoɛ nwu nikye, bɛ bɔ babubu ne nate, akwatafoɛ nwo te, asotiniwaafoɛ te dwirɛ, awufo dwɔso, na baha nzɛmba ne bahyire ahiafoɛ. 23Anigye yeɛ ole ebiala bɔ mendo ye sintidua ɔ.”
24Bɛ bɔ Yohane somane bɛ ne hɔle ne, Yesu hyɛle yebo hane Yohane nwo dwirɛ hyirele mmenia ne kyɛ: “Nzu yeɛ ɛmɔhɔle ɛserɛ naso dɔ bɛɛneane ne? Elemmire bɔ mvrama woso ye anaa? 25Nzu yeɛ ɛmɔhɔle dɔ kyɛ ɛmɔ kwaanea ne? Biaa bie bɔ owura atadeɛ pa? Bɔ ɔte yeɛ ole kyɛ, bɛ bɔ bɛwura ndadeɛ pa, ná bɛdi fɛɛ ne de, ahemvie yeɛ bɛte ɔ. 26Ye de, nzu deinn yeɛ ɛmɔhɔle dɔ kyɛ ɛmɔ kwaanea ne? Diifoɛ? Amba, meka mekyire ɛmɔ kyɛ ɔtra diifoɛ po. 27Ɛhe yeɛ bɛhworɔle ye nwo dwirɛ kyɛ:
‘Nea, mesoma me bɔfoɛ maa odi wɔ nyunu,
ye yeɛ okosiesie atee nu kɔma wɔ ɔ.’
28Meka mekyire ɛmɔ kyɛ, bɛ bɔ mmrasua awo bɛ ne de, bɛ nu biala nne berɛ bɔ ɔte piri tra Yohane. Nakoso bɔ ɔte kaa wɔ Nyameɛ Ahennie nanu ne, ɔte piri tra ye.” 29(Mmerɛ bɔ mmenia ne né bɛ bɔ bɛdide toɔ ne tele ɛhe ne, bɛhane kyɛ Nyameɛ te teneneeniɛ, ofikyɛ Yohane yeɛ ɔbɔle bɛ asu ɔ. 30Nakoso Farisifoɛ ne bɛ bɔ bɛse mmeraa nanu ne de, Nyameɛ afutuo bɔ ɔfa mane bɛ ne, bamva bannyɛ hwee, ofikyɛ nná ye yeɛ ɔbɔle bɛ asu ɔ.)
31“Nzu po yeɛ mva sɔ aworɛ ndoɔtoasoɛ he ndoto ye nwo ɔ? Sɛɛ po yeɛ bɛte ɔ? 32Bɛte kyɛ ngwalaa bɔ bɛtete dwaaso, na bɛfrɛ bɛ mmango mɔ kyɛ:
‘Yɛbɔle edwein yɛmane ɛmɔ,
nakoso ɛmɔ ango;
yɛbɔle awuye,
nakoso ɛmɔ anzu.’
33Ofikyɛ Yohane Suboniɛ wale ne, wannidi na wanno nzãa, na ɛmɔnwa ‘Ole sunzummɔne.’ 34Sona Awa ne wale ne, ye de, odidi na ɔno, nakoso ɛmɔnwa, ‘Ɛmɔnea, adufum ne kɔwenzaniɛ, bɛ bɔ bɛdide ɛtoɔ ne abɔnefoɛ damvo ne.’ 35Nakoso ye nneyɛɛ#7:35 Sɛ ɛkyire yebo tee a, ɔte “Ye mmaa.” kyire kyɛ ɔse nworɛ.”
36Farisifoɛ nanu kõ srɛle Yesu kyɛ ɔbra ma bɛdidi, yeti ɔhɔle Farisiniɛ ne awuro, na ɔtenane ase kyɛ odidi. 37Na braa bie bɔ bɛse ye wɔ kuro nanu kyɛ ɔte ɔbɔnefoɛ tele kyɛ Yesu didi wɔ Farisiniɛ n'awuro, na ɔfale alabasta towaa bɔ ngoo fona-fona wɔ nu wale, 38na oogyinane Yesu gya nwo wɔ ye si suni, ɔfale ye nye mmoen ne loale Yesu gya nwo, na ɔfale ye ti nwiaa kyikyile. Afei ɔfele ye gya nanwo na ɔfale ngoo fona-fona ne popale ye nwo. 39Farisiniɛ bɔ ɔtole ye sa frɛle ye ne nwuni bɔ ɔkɔ so ne, ɔhane ye wɔ ye tianu kyɛ: “Sɛ ɔte amba kyɛ biaa he te diifoɛ a, ahaa okonwu sona-horɛ deinn bɔ ɔsosɔ ye nu ne, ofikyɛ braa he te ɔbɔnefoɛ.” 40Yeɛ Yesu yele ye noa kyɛ: “Simon, mepena kyɛ meka edwirɛ bie mekyire wɔ.” Na ye koso ɔhane kyɛ: “Kyerɛkyerɛniɛ, dwudwo.”
41“Né mmenia nyɔ bie ma ebie bɔ ɔbɔ bosea kerɛ. Né kõ ma ye kerɛ dɛnare 500, yeɛ ne kõ ne deɛ te 50. 42Bangora kerɛ ne tua, yeti ɔfa hyɛle bɛ. Nwa yeɛ ɛnea okohuro baba ne dwirɛ paa ɔ?” 43Simon yele ye noa kyɛ: “Me susu kyɛ bɔ ɔfale kerɛ piri ne hyɛle ye ne.” Yesu hane kyɛ: “Abua ye yé.” 44Na ɔpɛle ye nye neane brasua ne, yeɛ ɔha hyirele Simon kyɛ: “Nnaa anwu sɔ brasua he? Mmale wɔ awuro wa ne, amma me nzue ma mannwunzi me gya bo, nakoso ye de, wafa ye nye mmoen waloa me gya nwo, na wafa ye ti nwiaa wakyikyi. 45Amve me noa nwo, nakoso ye de, ofi mmerɛ bɔ mmale wa ne, ɔyakyille me gya nwo felɛ. 46Amva ngoo angua me ti anu, nakoso ye de, wafa ngoo wagua me gya nwo. 47Yeti meka mekyire wɔ kyɛ, ye bɔne pembe ne, bafa bahyɛ ye, ofikyɛ ɔdɔ bɔ wala ye ali ne te piri paa. Nakoso ebiala bɔ bɛfa kaa bɛkyɛ ye ne, ye dɔ te kaa bie.”
48Yeɛ Yesu ha hyirele braa ne kyɛ: “Bafa wɔ bɔne bahyɛ wɔ.” 49Yeɛ bɛ bɔ bɛne ye te tɛbulu nanwo ne hyɛle yebo bisale bɛ nwo kyɛ: “Sona beni po ɛhe, bɔ ɔkora fa bɔne kyɛ ne?” 50Nakoso Yesu ha hyirele maame ne kyɛ: “Wɔ gyidie alɛ́ wɔ ngoa; fa asomdwie kɔ.”
Currently Selected:
Luka 7: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
