3
1Osa hɔle sua bɔ beyia nu nanu, né biaa bie bɔ ye sa awu wɔ berɛ. 2Ɔnate kyɛ né bɛpena Yesu bɛbɔ ye sommoɛ nati, né bɛnea paa sɛ ɔkɔsa biaa ne anwonyerɛ Homeda a. 3Yesu ha hyirele biaa bɔ ye sa awu ne kyɛ: “Dwɔso bagyina afia wa.” 4Yeɛ obisale bɛ kyɛ: “Nzu yeɛ mmeraa ma ate kyɛ bɛyɛ ye Homeda ɔ, nikye pa anaa nikye tɛɛ? Kyɛ bɛkole ebie ngoa anaa bɛkɔhu ebie?” Nakoso, bandwudwo. 5Na Yesu fale ɛyaa neane bɛ mukoraati yiale, na b'ahone bɔ ɔyɛ se nati, né ye wora abɔ ama bɛ. Yeti, ɔha hyirele biaa ne kyɛ: “Tengyɛ wɔ sa nanu.” Na ɔtengyɛle ye sa nanu, na ye sa ne yɛle yé. 6Yeti, Farisifoɛ nemɔ fite hɔle, na bɛne bɛ bɔ bɛta Herode si#3:6 Anaa “Herodifoɛ.” ne bɔle ye nwo porɛ, né bɛpena atee bɔ bɛkɔfa so bɛkɔhu ye.
7Na Yesu ne ye asuafoɛ nemɔ fili berɛ hɔle ɛpo ne noa dɔ, na mmeni pee fili Galilea ne Yudea lili ye si. 8Né ebiemɔ po fi Yerusalem, Yudea, Idumea, ne Yordan nzue ne si dɔ, na ne ebiemɔ koso fi nguro bɔ ɔwɔ Tiro ne Sidon nanu. Sɔ mmenia nemɔ tele nningyein mbiri-mbiri bɔ ne ɔyɛ ne, yeti bɛfili dɔ bɛwale ye berɛ. 9Yesu ha hyirele ye asuafoɛ nemɔ kyɛ, bɛpena ɛleɛn bie ma ɔtena nu, ná mmenia ne ammɔ ye so. 10Ɔsale mmeni pee anwonyerɛ, yeti bɛ bɔ bɛnde apɔ ne piane bɛ nwo wii wale ye so kyɛ bɛbaasɔ ye nu. 11Na sɛ sunzummɔne mɔ po nwu ye a, ne bɛfi ase wɔ ye nyunu bɛteɛtea nu kyɛ: “Wɔ yeɛ ele Nyameɛ awa ne!” 12Nakoso, né ɔtaa hyɛ bɛ kyɛ, bɛnea yé na bamma ebiala anwu sona deinn bɔ ɔte ɔ.
13Yesi ne, Yesu hɔle bokaa naso, na ɔfrɛle bɛ bɔ ɔpena bɛ ne maa bɛwale ye nwo berɛ. 14Ɔyele bɛ nu 12 yɛle bɛ kue kõ, na ɔfrɛle bɛ asomafoɛ. Bɛ yeɛ ne bɛkoli ye si, na bɛ yeɛ né ɔkɔsoma bɛ maa bɛkɔɔha nzɛmba ne, 15na ne ɔkɔma bɛ tumi bɔ bɛkɔfa bɛkɔtu sunzummɔne. 16Sɔ 12 ne ɛhe: Simon, ye yeɛ osa frɛle ye Petro ne, 17Sebedeo awa Yohane, ne oliema Yakobo, (bɛ yeɛ ɔfrɛle bɛ Boa-ner-ges, bɔ okyire “Agralaa mmaa” ne), 18Andrea, Filipo, Bartolomeo, Mateo, Tomas, Alfeo awa Yakobo, Tadeo, Simon bɔ ofi Kanaan,#3:18 Anaa “Simon bɔ ɔbɔ ye nwo mmɔden,” ofikyɛ bɔ Kanaan ne kyire yeɛ ole ebie bɔ ɔbɔ ye nwo mmɔden. 19ɔne Yuda Iskariot bɔ ɔyele ye mane ne.
Yesu hɔle awuro bie nu, 20ná mmeni pee sa pɛle ye nwo yiale, yeti, ɔne ye asuafoɛ ne anya atee po annidi. 21Mmerɛ bɔ ye abusuafoɛ ne tele ɛhe ne, bɛhɔle kyɛ bɛkwaahye ye, na ne bɛka kyɛ: “Gyemia ye adwene nyɛ adwuma.” 22Afei koso, atwerɛfoɛ bɔ bɛfi Yerusalem bɛwale ne hane kyɛ: “Ole Beelsebul, na sunzummɔne panyi ne tumi, yeɛ ɔfa tu sunzummɔne ɔ.” 23Yeti, Yesu frɛle bɛ, na ɔyɛle mvandoho hyirele bɛ kyɛ: “Ɔkɔyɛ sɛɛ ne Satan atu Satan? 24Sɛ ahennie bie ne ye nwo kõ a, sɔ ahennie ne gu; 25na sɛ awuro bie ne ye nwo kõ a, sɔ awuro ne ngogyina. 26Yeti, sɛ Satan dwɔso tia ye nwo, na ɔkõ tia ye nwo a, ɔngɔhora gyina; mmom ye awieɛ yeɛ ne ɔba ne. 27Ebiala nne berɛ bɔ ɔkɔhora kɔhɔ kwabranoa bie awuro kɔɔwia ye nningyein; sana odi moa kyekye kwabranoa ne kora, né wahora wasesa ye nningyein ne.
28“Nahorɛ dwirɛ yeɛ ole kyɛ, bɔne biala bɔ sona kɔyɛ, anaa mmusue dwirɛ biala bɔ sona kɔha ne, bɛkɔfa bɛkɔhyɛ ye. 29Nakoso, ebiala bɔ ɔkɔha mmusue dwirɛ kotia honhom krongron ne de, bɛngɔfa bɛngɔhyɛ ye lle. Okoli sɔ bɔne nanwo fɔ daa.” 30Yesu hane sɔ dwirɛ he, ofikyɛ ne bɛka kyɛ: “Ole honhommɔne.”
31Yesu maame ne oliema mmrienzua nemɔ wale bɛɛgyinane aluo dɔ, na bɛsoma ebie kyɛ ɔfrɛ ye ma bɛ. 32Né mmeni pee apɛ ye nwo ayia, yeti, bɛha bɛhyirele ye kyɛ: “Nea, wɔ maame ne eliema mɔ gyi aluo dɔ, bɛnwa ɛbra.” 33Nakoso, ɔha hyirele bɛ kyɛ: “Nwa yeɛ ole me maame ne nniema mɔ?” 34Afei, ɔneane bɛ bɔ bapɛ ye nwo bayia namukoraati, na ɔhane kyɛ: “Me maame ne nniema mɔ yeɛ bɛtete wa ne. 35Ebiala bɔ ɔyɛ bɔ Nyameɛ kuro ne, ɔte nniema brienzua, nniema brasua, ne me maame.”
