2
1Ngyẽa bie si ne, Yesu sa hɔle Kapernaum, na mmenia tele kyɛ ɔwɔ awuro. 2Yeti, mmeni pee wale awuro berɛ, né bɛsone pa-pa, yeti né bɛngɔ aluo berɛ po, na ɔhyɛle yebo hane edwirɛ ne hyirele bɛ. 3Né mmrienzua nná bie fa bubuaniɛ bie brɛ ye. 4Nakoso mmenia nati, né bennya atee po né bawa nekaa bɔ Yesu wɔ ne, yeti bɛtuli sua naso wɔ Yesu ti afia berɛ, na bɛtuli nu tokuro. Afei bɛdwurale bɛen bɔ bubuaniɛ ne la so ne. 5Mmerɛ bɔ Yesu nwuni bɛ gyidie ne, ɔha hyirele bubuaniɛ ne kyɛ: “Mma, bafa wɔ bɔne bahyɛ wɔ.” 6Né atwerɛfoɛ nemɔ bie te berɛ, na ne bɛdwene ye nwo wɔ bɛ ti anu kyɛ: 7“Edwirɛ beni yeɛ akoaa he ka ne? Wabɔ mmusue! Nná Nyameɛ ngome yeɛ ɔkora fa bɔne kyɛ ɔ?” 8Na ɛberɛ ala, Yesu nate ye honhom naso nwuni kyɛ, sɔ dwirɛ ne yeɛ bɛdwene ye nwo wɔ b'ahone nu ɔ, yeti obisale kyɛ: “Nzuati yeɛ ɛmɔdwene ɛhe anwo wɔ ɛmɔ ahone nu ne? 9Beni yeɛ ɔyɛ mmerɛ ɔ, kyɛ bɛkɔha bɛkohyire bubuaniɛ ne kyɛ, ‘Bafa wɔ bɔne bahyɛ wɔ,’ anaa bɛkɔha kyɛ, ‘Dwɔso, fa wɔ bɛen, na nate’? 10Na bɔ ɔkɔyɛ na ɛmɔ anwu kyɛ, sona Awa ne le tumi wɔ aseɛ he aso kyɛ ɔkora fa bɔne kyɛ nati,” ɔha hyirele bubuaniɛ ne kyɛ: 11“Meka mekyire wɔ kyɛ, ‘Dwɔso, fa wɔ bɛen, na kɔ w'awuro.’” 12Ná ɛberɛ ala odwɔsole fale ye bɛen, na ɔnatele maa ebiala nwuni ye. Edwirɛ ne yɛle bɛ mukoraati nwanwa, na bɛhyɛle Nyameɛ anuonyam kyɛ: “Ɛhe de, yɛnwuni bie lle.”
13Afei, Yesu hɔle ɛpo ne noa dɔ, na mmeni pee sa wale ye nwo berɛ, na ohyirehyirele bɛ. 14Ɔpɛ nu ne, onwuni Alfeo awa Lewi kyɛ ɔte nekaa bɔ bɛdide toɔ ne, na ɔha hyirele ye kyɛ: “Baali me si.” Na ɛberɛ ala, odwɔso lili ye si.
15Yesi ne, mmerɛ bɔ odidi wɔ Lewi awuro ne, né bɛ bɔ bɛdide toɔ ne abɔnefoɛ pee wɔ berɛ, na ne bɛne Yesu ne ye asuafoɛ ne didi. 16Atwerɛfoɛ bɔ bɛte Farisifoɛ nemɔ nwuni kyɛ Yesu ne sɔ mmenia nemɔ didi ne, bɛbisale ye asuafoɛ ne kyɛ: “Nzuati yeɛ ɔne bɛ bɔ bɛdide toɔ ne abɔnefoɛ to asaa didi ne?” 17Yesu tele ɛhe ne, ɔha hyirele bɛ kyɛ: “Bɛ bɔ bɛte apɔ ne, benhia dɔktaniɛ, bɛ bɔ bɛnde apɔ ne yeɛ behia dɔktaniɛ ɔ. Nná ateneneefoɛ ti yeɛ mmale ɔ, mmale kyɛ mebaafrɛ abɔnefoɛ.”
18Sɔ mmerɛ ne, né Yohane asuafoɛ ne Farisifoɛ nemɔ yɛ akɔngyere. Yeti ebiemɔ bisale Yesu kyɛ: “Nzuati yeɛ w'asuafoɛ nemɔ nnyɛ akɔngyere kyɛbɔ Yohane asuafoɛ ne Farisifoɛ nemɔ yɛ ne?” 19Yesu ha hyirele bɛ kyɛ: “Ɔkɔyɛ sɛɛ né brienzua bɔ ɔbaagya ne nnamvo nemɔ ayɛ akɔngyere, mmerɛ bɔ ɔwɔ bɛ nwo wa ne? Brienzua bɔ ɔbaagya ne wɔ bɛ nwo ne ngome de, bɛngɔhora bɛngɔhye hɔen. 20Nakoso mmerɛ bie kɔwa, bɔ bɛkɔfa brienzua bɔ ɔbaagya ne bɛkɔhɔ, sɔ mmerɛ ne de, bɛkɔyɛ akɔngyere. 21Ebiala nne berɛ bɔ ɔfa ɛtena monɛ ta atadeɛ daa nu ɔ. Sɛ ɔyɛ sɔ a, ɛtena monɛ ne kɔte kofi daa nanu, na atadeɛ ne kɔte piri paa kɔtra daa ne. 22Afei koso, ebiala nne berɛ bɔ ɔfa nzãa foforɛ gua nzãa bɔtɔ daa nu ɔ. Sɛ ɔyɛ sɔ a, nzãa ne kɔpakye bɔtɔ ne, maa nzãa ne kohwie kogua, ná bɔtɔ ne koso kɔsɛkye. Yeti bɛfa nzãa foforɛ bɛgua nzãa bɔtɔ monɛ nu.”
23Homeda bie, né Yesu ne ye asuafoɛ nemɔ nate hwiit boo bie nu, na asuafoɛ nemɔ kɔ ne, bɛhyɛle yebo kyɛ bɛtete hwiit ne bie. 24Yeti, Farisifoɛ nemɔ ha hyirele ye kyɛ: “Nea nikye! Nzuati yeɛ w'asuafoɛ nemɔ yɛ nikye bɔ mmeraa mma atee kyɛ bɛyɛ ye homeda ne?” 25Ye koso ɔha hyirele bɛ kyɛ: “Bɔ David yɛle, mmerɛ bɔ ne ye nwo ahyere ye, ná ɛhɔen ku ɔne ye mmrandeɛ nemɔ ne, ɛmɔ kenngale? 26Mmerɛ bɔ né Abiata te Sɔfo panyi, David hɔle Nyameɛ awuro berɛ, na olili paanoo bɔ bafa bawa Nyameɛ nyunu ne, na ɔfale bie koso mane bɛ bɔ ne bɛboka ye so ne. Sɔ paanoo ne, né mmeraa mma ate kyɛ ebiala di, sana sɔfo nemɔ ngome.” 27Ná Yesu sa ha hyirele bɛ kyɛ: “Sona ti yeɛ bɛyɛle homeda a, na nná homeda ti yeɛ bɛbɔle sona ɔ. 28Yeti, Sona Awa ne yeɛ ɔte homeda ne wura ɔ.”
