Marko 4
4
1Yesu sa hyɛle yebo yɛle ngyerɛkyerɛ wɔ ɛpo ne noa, na mmeni pee wale ye nwo berɛ. Yeti, ɔfole ɛleɛn bie tenane nu wɔ ɛpo naso, na mmenia ne koso tenane ɛpo ne noa. 2Na ɔfale mvandoho hane edwirɛ pee hyirele bɛ, ɔha hyirele bɛ kyɛ: 3“Ɛmɔtie, kuaniɛ bie hɔle kyɛ ɔkwaagua#4:3 Anaa “Ɔkwaapete.” ɛmo. 4Ogua ne, ebie guale atee noa, na nnomaa susole. 5Ebie guale nyɔboɛ so, né nnɛterɛ pee nne berɛ, yeti ofifili, nakoso ɔnate kyɛ nnɛterɛ pee nne berɛ nati, 6mmerɛ bɔ eyia bɔle ne, ɔyerale ofikyɛ né olle ndii. 7Mmaa ne bie guale mmowie nu, na mmowie ne nyi miane ne, yeti wanzu mmaa. 8Nakoso ebie guale aseɛ pa so, na ofifili, onyini, na osuli mmaa. Ebie suli 30, ebie suli 60, yeɛ ebie suli 100.” 9Yeɛ Yesu hane kyɛ: “Bɔ ole asoɛ ne, ma otie.”
10Ɔhale ye ngome ne, bɛ bɔ bɛboka ye so ne asuafoɛ buru-ne-nyɔ ne bisale ye bɔ mvandoho ne kyire ɔ. 11Ɔha hyirele bɛ kyɛ: “Ɛmɔ yeɛ bafa bama ɛmɔ kyɛ ɛmɔte Nyameɛ Ahennie nanwo dwirɛ krongron bɔ wafea nabo, bɛ bɔ baha ne de, mvandoho yeɛ bɛfa bekyirekyire nikye biala nu bɛkyire bɛ ɔ, 12yeti,
‘bɛnea de, nakoso bɛnnwu ye,
na betie, nakoso bɛnde yebo;
ná bɛngɔsakra
maa bɛngɔfa bɛ bɔne bɛngɔhyɛ bɛ.’ ”
13Yesu sa ha hyirele bɛ kyɛ: “Ɛmɔ koso ɛmɔnde yebo, ye de, ɔkɔyɛ sɛɛ na ɛmɔ ate mvandoho bɔ waha nabo? 14Kuaniɛ ne guale edwirɛ ne. 15Ogua ne, bɔ oguale atee noa ne yeɛ ole bɛ bɔ bɛte edwirɛ nala a, Satan baye edwirɛ bɔ bagua ne fi bɛ nu ne. 16Afei koso, bɔ oguale nyɔboɛ so ne ɛhe: Bɛ de, sɛ bɛte edwirɛ nala a, bɛfa anigye bedɛ bɛto nu. 17Nakoso bɛlle ndii, yeti bɛtena berɛ kaa, ná sɛ edwirɛ nati, beyia ɔhaw anaa bɛtane bɛ nye a, né wato bɛ sintidua. 18Ebie koso guale mmowie nu. Bɛ de bɛte edwirɛ ne, 19nakoso wiase nanu dadwene, ahonyadeɛ bɔ ɔlaka-laka bɛ, ɔne nningyein ahoroɛ nwo akɔnnɔ mia edwirɛ ne, na onzu mmaa. 20Afei bɔ oguale aseɛ pa so ne yeɛ ole bɛ bɔ bɛte edwirɛ ne a, bedɛ ye kama na bɛsu mma ne. Ebie su 30, ebie su 60, na ebie koso su 100.”
21Yesu sa ha hyirele bɛ kyɛ: “Nwa yeɛ ɔsɔ kanea a, ɔfa wura kɛndɛn anaa mba bo ɔ? Nná kanea bakaa so yeɛ bɛfa besie ɔ? 22Ná nikye biala nne berɛ bɔ wafea bɔ ongofite ɔ; na hwee nne berɛ bɔ bafa basie fee bɔ ɔngɔwa kanea nu ɔ. 23Ebiala bɔ ole asoɛ ne, ma otie.”
24Osa ha hyirele bɛ kyɛ: “Ɛmɔnea edwirɛ bɔ ɛmɔtie ne yé. Ofikyɛ kongo bɔ ɛmɔfa bɛsusu nikye bɛma ebie ne, ɛhene ala yeɛ bɛkɔfa bɛkosusu bɛkɔma ɛmɔ ɔ. Na bɛkɔfa ebie bɛkɔboka ɛmɔ so. 25Na ebiala bɔ ole bie ne, bɛkɔfa pee bɛkɔboka ye so, nakoso bɔ olle bie ne de, bɔ ole ye ne po, bɛkole bɛkofi ye sa nu.”
26Ɔtoale so kyɛ: “Nyameɛ Ahennie ne te kyɛ ebie bɔ odua ye nningyein wɔ eburo. 27Ɔkɔda kɔngɔen dwɔso ngyerɛmɔ, na nningyein ne fifi, onyi yɛ tendee; nakoso atee bɔ ɔfa so yɛ sɔ ne de, ɔnze. 28Aseɛ ne bɔbɔ yɛ ngakã-ngakã su mmaa, odi moa fa nyaa, afei ɔye bɛtire, na aleɛ ba bɛtire nanwo. 29Na aleɛ ne tĩ a, ɔtwe ye dadeɛ kɔ ye nwo, ofikyɛ mmerɛ aso kyɛ bɛpɛ.”
30Yeti, osa hane kyɛ: “Nzu anwo yeɛ yɛfa Nyameɛ Ahennie ne yɛtoto ɔ? Na mvandoho beni yeɛ yɛfa yɛhyirehyire nu ɔ? 31Ɔte kyɛ sinapi mmaa; mmaa bɔ bɛdua ye wɔ aseɛ ye aso de, yeɛ ɔte kaa ɔ. 32Nakoso sɛ bɛdua a, onyi yɛ piri tra atɔsodeɛ mukoraati, na ɔyeye asaa ngandinga maa ewienu nnomaa yɛ bɛ buye ye fɔnwoo nabo.”
33Yeti, mvandoho sɔa mɔ yeɛ Yesu fa hane edwirɛ ne hyirele bɛ, kyɛbɔ ɔkɔyɛ a, bɛkɔte yebo ɔ. 34Wanga hwee wangyire bɛ bɔ mvandoho bokka so ɔ. Nakoso, sɛ ɔka ɔne asuafoɛ ne ngome a, okyirekyire nikye biala nu kyire bɛ.
35Odwuli nnɔsoa ne, ɔha hyirele asuafoɛ ne kyɛ: “Ɛmɔma yɛhɔ nzue ne si dɔ.” 36Yeti, bɛguale mmenia nemɔ atee bɛyiele ne, bɛɛbokale Yesu so, ofikyɛ né ɔte ɛlɛen nanu dada, na ne ɛlɛen foforɛ koso boka ye so. 37Wangyɛ biala, mvrama kandinga bie hyɛle yebo tuli, na né asorɔkye ne bu fa ɛlɛen naso, ɔhale sɔa, ahaa bɛmono. 38Nakoso Yesu de, né wala sumu bie so wɔ ɛleɛn ne si dɔ. Yeti, bɛtingyele ye, na bɛha bɛhyirele ye kyɛ: “Kyerɛkyerɛniɛ, yeti yɛbaawu ne, ɔmva wɔ nwo?” 39Yeti Yesu dwɔsole, na ɔteane mvrama ne né nzue ne kyɛ: “Yɛ konn! Yɛ dinn!” Na mvrama ne yakyile, na ɔyɛle dinn. 40Na obisale bɛ kyɛ: “Nzuati yeɛ né ɛmɔsuro ne? Nzu ɔ, ɛmɔlle gyidie?” 41Né esuronyi aha bɛ paa, yeti bɛbisale bɛ nwo kyɛ: “Sona beni ɛhe? Bɔ mvrama ne ɛpo po tie ye ne.”
Currently Selected:
Marko 4: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
