Marko 6
6
1Yesu fili berɛ hɔle ye kuro, na ne ye asuafoɛ nemɔ boka ye so. 2Odwuli Homeda ne, ɔhyɛle yebo yɛle ngyerɛkyerɛ wɔ sua bɔ beyia nu nanu. Na bɛ bɔ betie ye nanu pee nwo dwirili bɛ, na bɛbisale kyɛ: “Nisua yeɛ akoaa he suane sɔ nningyein ne? Nzuati yeɛ bama ye nyanza sɔ ne? Na ɔyɛle sɛɛ po yeɛ ɔkora yɛ sɔ anwanwadeɛ ne? 3Nná Mary awa kapentaniɛ ne ɛhe? Nná oliema yeɛ ole Yakobo, Yosef, Yuda, ne Simon? Na nná oliema mmrasua yeɛ yɛne bɛ wɔ wa ne?” Yeti, ɔyɛle sintidua mane bɛ. 4Yeɛ Yesu hane kyɛ: “Sɛ diifoɛ bie anuonyam kɔbɔ ye a, né ɔte ye kuro, ye abusuafoɛ, ne ye bɔbɔ ye awurofoɛ nu.” 5Yeti, wanyɛ anwanwadeɛ pee wɔ berɛ, bɔ ɔyɛle ala yeɛ ole kyɛ ɔfale ye sa guale mmenia kaa bie so sale b'anwonyerɛ. 6Ɔyɛle ye nwanwa kyɛ né bɛlle gyidie ɔ. Yeti, ohyinini nnamue nemɔ nu hyirehyirele bɛ.
7Yesu frɛle buru-ne-nyɔ ne, na ɔhyɛle yebo somane bɛ nyɔ-nyɔ, na ɔmane bɛ sunzummɔne so tumi. 8Afei, ɔha hyirele bɛ kyɛ, nnɛmaa bɛfa hwee bɛtu atee ne, sana pɔmaa. Nnɛmaa bɛfa paanoo, aleɛ bɔtɔ, na nnɛmaa bɛfa sikaa bɛwura b'abɔsoɛ nu, 9mmom bɛwura mmaboa, nakoso nnɛmaa bɛfa ndadeɛ nyɔ. 10Na ɔha hyirele bɛ kyɛ: “Awuro biala bɔ ɛmɔ kowura nu ne, ɛmɔtena berɛ kodwu kyɛ ɛmɔ kofi berɛ bɛkɔhɔ ɔ. 11Nekaa biala bɔ banne ɛmɔ, anaa bandie ɛmɔ ne, sɛ ɛmɔfi berɛ bɛkɔ a, ɛmɔ poro-poro ɛmɔ gya bo mvuture bɛgua berɛ, ná wayɛ adanzeɛ wama bɛ.” 12Yeti bɛsili nu bɛhɔle, na bɛha bɛhyirele mmenia kyɛ bɛsakra b'adwene. 13Bɛtuli sunzummɔne pee, na bɛfale ngoo bɛpopale mmeni pee bɛsale b'anwonyerɛ.
14Ɔhene Herode tele ɛhe anwo dwirɛ, ofikyɛ ne Yesu dumaa atrɛ ahɔ nekaa biala, na ne mmenia keka kyɛ: “Yohane Suboniɛ adwɔso afi ewue nu! Yeti yeɛ ɔkora yɛ nzɛngyerɛneɛ pee sɔ ne.” 15Nakoso ebiemɔ hane kyɛ: “Elia ane,” yeɛ ebiemɔ koso nwa: “Ɔte diifoɛ te kyɛ tete adiifoɛ nemɔ ala.” 16Nakoso mmerɛ bɔ Herode tele ɛhe ne, ɔhane kyɛ: “Yohane bɔ mbɛle ye ti ne yeɛ watingye ne!” 17Né Herode agya oliema Filipo aye Herodia, ɛhene ati yeɛ ɔmaa bɛhyele Yohane bɛkyekyele ye bɛtole prizin ne. 18Ofikyɛ daa né Yohane ka kyire Herode kyɛ: “Mmeraa mma atee kyɛ egya eliema aye.” 19Yeti, né Yohane nwo dwirɛ wura Herodia nu, na né ɔpena ye ku ye, nakoso wangora. 20Né Herode se kyɛ Yohane te teneneeniɛ, na ɔte krongron, ɛhene ati né suro ye, na ɔbɔle ye nwo waen. Sɛ ɔte Yohane dwirɛ ne a, né wayɛ basaa, nakoso ne ye nye gye ye nwo kyɛ okotie ye. 21Nakoso, Herodia nyane ye nwo atee bie. Ɛlɛho bɔ ne Herode di ye awoda ne, ɔyɛle paati mane ye atitire, asahene, ne Galilea mbanyi sɔ nnɔsoa ne. 22Na Herodia awa brasua gole maa Herode ne bɛ bɔ ɔne bɛ didi ne nye gyele ye abilie nanwo paa, yeti ɔhene ne hane kyɛ: “Nikye biala bɔ ekuro ne, ka, na ngɔyɛ ngɔma wɔ.” 23Na ɔhane ndaen kyɛ: “Nikye biala bɔ ekobisa ne, sɛ ɔte m'ahennie ne bue po a, ngɔfa ngɔma wɔ.” 24Yeti, ɔhɔle ye maame berɛ, na obisale ye kyɛ: “Nzu yeɛ nne#6:24 Anaa “Mmisa” ɔ?” Na ɔha hyirele ye kyɛ: “Yohane Suboniɛ ti.” 25Ɛberɛ ala yeɛ otuli mirika hɔle ɔhene ne berɛ ɔ, na ɔhane kyɛ: “Mepena kyɛ ɛfa Yohane Suboniɛ ti to plɛte so ma me kesaalae.” 26Edwirɛ ne yɛle ɔhene ne yea paa, nakoso ɔnate ndaen bɔ waha, ɔne ɛwɔfoɛ bɔ bɛwɔ berɛ nati, bɔ abayaa ne hane ne, wammɔ wangua. 27Ɛberɛ ala, ɔhene ne somane adumfoɛ nanu kõ, na ɔhyɛle ye kyɛ ɔɔpɛ Yohane ti bra. Yeti, ɔhɔle prizin dɔ ɔɔpɛle Yohane ti, 28na ɔfa tole plɛte so brɛle abayaa ne, na ye koso, ɔfa ɔɔmane ye maame. 29Mmerɛ bɔ Yohane asuafoɛ nemɔ tele bɔ wasi ne, bɛɛfale fuin ne besiele ye.
30Asomafoɛ nemɔ sa wale Yesu berɛ, na bɛhane bɔ bahora bayɛ ne bɔ bahyirehyire namukoraati bɛhyirele ye. 31Na ɔha hyirele bɛ kyɛ: “Ɛmɔbra, ná ɛmɔɔwura nekaa bie bɛle ɛmɔ nwomeɛ kaa.” Ofikyɛ ne mmeni pee di berɛ akɔ-ne-aba, na ne bennya mmerɛ po né badidi. 32Yeti, bɛfale ɛlɛen kyɛ bɛkwaawura nekaa bie dinn. 33Nakoso, ebiemɔ nwuni kyɛ bɛkɔ, na mmeni pee koso tele, yeti bɛtuli mirika bɛfili nguro nanu bɛlili bɛ nyunu moa. 34Yesu fili ɛlɛen nanu dwuli bɔ onwuni mmenia bɔ bɛgua berɛ ne, bɛyɛle ye anwunvo, ofikyɛ né bayɛ kyɛ mmoan bɔ bɛlle ebie bɔ ɔnea bɛ ne. Yeti, ɔhyɛle yebo hyirehyire bɛ nningyein pee. 35Odwuli nnɔsoa ne, asuafoɛ nemɔ wale ye berɛ, na bɛha bɛhyirele ye kyɛ: “Ɛwa ate ye nwo, na aleɛ koso asa. 36Yeti, gua mmenia ne atee, kyɛbɔ ɔkɔyɛ a, bɛkɔhora bɛkɔhɔ nguro ne nnamue bɔ wapɛ yɛ nwo wayia ne bie nu, na baatɔ aleɛ bali.” 37Nakoso Yesu ha hyirele bɛ kyɛ: “Ɛmɔma bɛ aleɛ ma bɛli.” Na bɛbisale ye kyɛ: “Yɛɛtɔ paanoo dɛnare 200 yɛbrɛ bɛ ma bɛli anaa?” 38Na obisale bɛ kyɛ: “Paanoo nyɛɛ yeɛ ɛmɔle ye wɔ berɛ ɔ? Ɛmɔɔnea.” Bɛɛneane ne, bɛhane kyɛ: “Nnu, yeɛ egyein nyɔ.” 39Yeti, Yesu ha hyirele bɛ kyɛ, bɛma mmenia ne tena kue-kue wɔ nzenzaen#6:39 Anaa “Paake.” naso. 40Yeti, bɛtenane ase kue-kue, né ebiemɔ te 100, yeɛ ebiemɔ te 50. 41Afei Yesu fale paanoo nnu ne egyein nyɔ ne, na ɔneane anwuro hyirale so. Na ɔfa mane asuafoɛ nemɔ kyɛ bɛfa bɛma mmenia ne. Na ɔhyɛle egyein ne koso mane bɛ mukoraati. 42Yeti, bɛ mukoraati, bɛlili maa bɛ ko yili, 43na bɛsesale ye boso ngɛndɛn 12 tɛkyɛ, né egyein ne bokka so. 44Mmrienzua 5,000 yeɛ bɛlili paanoo ne ɔ.
45Ɛberɛ ala, Yesu maa asuafoɛ nemɔ fole ɛlɛen hɔle nzue ne si dɔ wɔ Betsaida ɛpo ne noa dɔ, na ye de, oguale mmenia nemɔ atee. 46Oguale bɛ atee yiele ne, ɔhɔle bokaa naso dɔ kyɛ ɔkwaabɔ mbaeɛ. 47Aleɛ sane ne, né ɛlɛen ne wɔ ɛpo ne afia, na Yesu ngome yeɛ ne ɔwɔ aseɛ naso ɔ. 48Né onwu ye kyɛ mvrama ne bɔ yia bɛ, yeti né wayɛ se wama bɛ kyɛ bɛkɔha ɛlɛen ne. Ná odwuli alobahene ne, ɔfale ɛpo naso hɔle bɛ nwo dɔ, na ɔyɛle kyɛ osa bɛ nwo. 49Nakoso, bɛnwuni kyɛ ɔnate ɛpo naso ne, bɛteɛteane nu, ofikyɛ né bɛse kyɛ banwu honhom bie. 50Mmerɛ bɔ bɛ mukoraati bɛnwuni ye ne, esuronyi hane bɛ. Nakoso, Yesu ha hyirele bɛ kyɛ: “Ɛmɔha ɛmɔ ahone bɛto ɛmɔ kunu! Me ane, nnɛmɔ suro.” 51Na ɔfo tenane ɛlɛen nanu ne, mvrama ne yakyile. Na ɔyɛle asuafoɛ ne nwanwa paa, 52ofikyɛ ne bennya bɛtele paanoo nwo dwirɛ nabo, né b'ahone nya tele yebo.
53Bɛpɛle nzue ne bɛhɔle ye si dɔ ne, bɛɛdwuli Genesaret, na bɛfale ɛlɛen ne bɛsiele berɛ. 54Bɛfi ɛlɛen nanu bɛdwuli ala pɛ, mmenia nwuni ye, 55na bɛfale mirika bɛhyinini mandanu berɛ mukoraati, bɛfale bɛ bɔ bafokyɛ bɛguale bɛen so bɛhɔle nekaa biala bɔ bɛtele kyɛ ɔwɔ ne. 56Na nekaa biala bɔ ɔkɔhɔ ne, kyɛ ɔte akuraa nu, kuro nu, anaa nnamue nu ne, ɔkɔhɔ ne, né bafa bɛ bɔ bafokyɛ ne bagua dwaaso berɛ, na bɛsrɛle ye kyɛ ɔma bɛfa bɛ sa bɛha ye atadeɛ ne noa mbaen. Na bɛ bɔ bɛyɛle sɔ namukoraati nwo tɔle bɛ.
Currently Selected:
Marko 6: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
