Marko 7
7
1Farisifoɛ ne atwerɛfoɛ bɔ bafi Yerusalem bawa ne wale Yesu berɛ. 2Na bɛnwuni kyɛ ye asuafoɛ nemɔ fa asaa bɔ ye nwo nnde bɛdidi; kyire kyɛ bɛdidi ne, bannwunzi bɛ sa. 3(Né Farisifoɛ ne Yudafoɛ nemɔ tɛ́ tra bɛ nana mɔ amammerɛ nu, yeti sɛ bɛkɔdidi a, sana bɛnwunzi bɛ sa maa ɔbadwu bɛ batwɛ. 4Na sɛ bɛfi dwaaso bɛba awuro a, bɛnnidi, sana babia kora. Né basɔ amammerɛ pee nu twann, ebie yeɛ ole kwangoa, dansɛen,#7:4 Ɔkɔhora koso kɔyɛ kwangoa mbiri. ne kɔɔbere ayaa mɔ bɔ bɛbɔ bɛ asu.) 5Yeti, Farisifoɛ ne atwerɛfoɛ nemɔ bisale ye kyɛ: “Nzuati yeɛ w'asuafoɛ nemɔ nni nana mɔ amammerɛ so, na bɛfa asaa bɔ ye nwo nnde bɛdidi ne?” 6Yesu koso ha hyirele bɛ kyɛ: “Nyaatwomfoɛ, ngɔm bɔ Isaiah hyɛ fale ɛmɔ nwo ne, ɔfata ɛmɔ. Ɔhane kyɛ,
‘Maen he fa bɛ noa mbaen yeɛ bɛdi me ni ɔ,
nakoso b'ahone de, ɔnne me nwo koraa.
7Bɛ so me mbaen,
ofikyɛ sona ahyɛdeɛ yeɛ bɛ kyirekyire ɔ.’
8Ɛmɔ abu ɛmɔ nye bagua Nyameɛ ahyɛdeɛ so, yeɛ ɛmɔ atira ɛmɔ nana mɔ amammerɛ nu twann.”#7:8 Anaa “Serɛ-serɛ”
9Ɔtoale so kyɛ: “Ɛmɔ afa atee bie so#7:9 Anaa “Nyanza-nyanza” bapia Nyameɛ ahyɛdeɛ ne bato nekaa bie, kyɛbɔ ɔkɔyɛ a, ɛmɔkoli ɛmɔ nana mɔ ahyɛdeɛ so ɔ. 10Ofikyɛ Mose hane kyɛ: ‘Fa nidie ma wɔ maame ne wɔ baba,’ na ‘Ebiala bɔ ɔkɔha edwirɛ tɛɛ kotia ye baba anaa ye maame ne, odikyɛ bɛku ye.’ 11Nakoso ɛmɔ de ɛmɔka kyɛ, ‘Sɛ ebie ka kyire ye maame anaa ye baba kyɛ: “Nikye biala bɔ nne ye, bɔ ahaa ekonya so mvasoɛ ne te korban (kyire kyɛ, ɔte akyɛdeɛ bɔ mafa mama Nyameɛ)” ’ a, 12ɛmɔ mma ɔnyɛ hwee mma ye baba anaa ye maame. 13Yeti, ɛmɔ afa ɛmɔ amammerɛ ne basɛkye Nyameɛ dwirɛ ne. Na nningyein pee bɔ ɔte sɔa yeɛ ɛmɔyɛ ɔ.”
14Yesu frɛle mmenia ne wale ye nwo berɛ bieku, na ɔhane kyɛ: “Ɛmɔ mukoraati ɛmɔtie me, ná ɛmɔte ye bo kyɛ, 15nikye biala nne berɛ, bɔ ofi aluo kɔ sona nu bɔ ɔkora gua ye nwo fiɛ ɔ; mmom bɔ ofi sona ne nu fite ne, ɛhene yeɛ ogua ye nwo fiɛ ɔ.” 16#7:16 Sɛ ɛnea Bible biemɔ nu a, bafa edwirɛ bie bawura ɛwa kyɛ: “Bɔ ole asoɛ bɔ ɔkɔfa kotie ne, ma otie.” Nakoso sɛ ɛnea tete asaanoa ndworɔyɛ bɔ odi mu paa, ɔne bɔ wahyɛ paa nemɔ nu a, sɔ dwirɛ ne nne nu. ― 17Mmerɛ bɔ Yesu fili mmenia nanu wurale awuro bie nu ne, ye asuafoɛ nemɔ bisale ye mvandoho nanwo dwirɛ. 18Na ɔha hyirele bɛ kyɛ: “Ɛmɔ koso, ɛmɔnde ye bo? Nikye biala nne berɛ bɔ ofi aluo kɔ sona nu, bɔ ɔkɔhora kogua ye nwo fiɛ ɔ, 19ofikyɛ, ɔngɔ ye ahone nu, mmom ɔkɔ ye kunu, ná wafi ye nu waagua ɛyaen nu.” Ɔhane ɛhe fa tele aleɛ biala nwo. 20Na ɔtoale so kyɛ: “Mmom bɔ ofi sona nu ba ne, ɛhene yeɛ ogua ye nwo fiɛ ɔ. 21Ofikyɛ sona nu, ye ahone nu yeɛ adwemmɔne, adwamammɔ, awie, awudie, 22agyaa sɛkyelɛ, adufudeɛ, amumuyɛɛ, nnaka-nnaka, ahohwibra, anyeborolɛ, mmusue dwirɛ, ɛdwɛɛ, ne ngwaseasɛm fi ba ɔ. 23Ɛhemɔ mukoraati fi sona nu, na ogua ye nwo fiɛ.”
24Ofili berɛ ne, ɔhɔle Tiro ne Sidon mandanu dɔ. Ɔhɔle awuro bie nu, na né ɔmbena kyɛ ebiala nwu kyɛ wawa berɛ, nakoso wangora fea. 25Wangyɛ biala, maame bie bɔ sunzummɔne wɔ ɔwa abayaa so tele ye nga, na ɔwale berɛ ɔɔkotele ye gya bo. 26Né ɔte Greekniɛ bɔ bɛwole ye wɔ Foinike bɔ ɔwɔ Siria#7:26 Anaa “Ne ɔte Siria-Foinikeniɛ.” ne. Maame ne srɛle Yesu alaa kyɛ, otu sunzummɔne ne fi ɔwa brasua ne nu. 27Nakoso, Yesu ha hyirele ye kyɛ: “Ma ngwalaa ne ko yi kora, ofikyɛ ɔttemaye kyɛ ɛkɔfa ngwalaa paanoo kɔma ngyea.” 28Maame ne koso hane kyɛ: “Awurade, ɔte nahorɛ. Mmom bɔ ofi ngwalaa nemɔ tɛbulu naso gua ase ne, ɛhene yeɛ ngyea ne di ɔ.” 29Na Yesu ha hyirele ye kyɛ: “Bɔ aha nati, kɔ; sunzummɔne ne afi ɛwa brasua ne nu.” 30Yeti ɔhɔle, na odwuli awuro ne, onwuni kyɛ, ɔwa ne la berɛ bɔ sunzummɔne ne afi ye nu ɔ.
31Ofili Tiro mandanu berɛ, na ɔfale Sidon hɔle Galilea po ne noa ɔɔfale Dekapoli mandanu dɔ. 32Na bɛfale biaa bie bɛbrɛle ye, né ye so ati, na né ɔngora dwudwo pa. Na bɛsrɛle Yesu kyɛ ɔfa ye sa gua ye so. 33Yesu fale ye fili mmenia nanu berɛ hɔle ahameɛ, na ɔfale ye sa wuro-wurale ye so nanu. Afei ɔtele ngɔserɛ, na ɔfale ye sa hane ye temverema. 34Na ɔneane anwuro guale nwomeɛ, yeɛ ɔhane kyɛ: “Hefata!” Ye bo kyire kyɛ, “Bukye.” 35Na ɛberɛ ala, ye so ne bukyele, na ye temverema ne sangyele, na ɔhyɛle yebo dwudwole kama. 36Yesu ha hyirele bɛ kyɛ, nnɛmaa bɛbɔso bɛkyire ebiala. Nakoso, ogu so ɔbɔ bɛ noa ne, bɛ koso né bɛbɔ ye dawure. 37Ɔyɛle mmenia nemɔ nwanwa paa, na bɛhane kyɛ: “Wayɛ nikye biala yé. Wamaa bɔ ye so atĩ ne po ate edwirɛ, na ɛmumu koso adwudwo.”
Currently Selected:
Marko 7: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
