Marko 8
8
1Sɔ ngyẽa nanu ne, mmeni lɔen bie sa wale Yesu berɛ, na né bɛlle hwee bɔ bɛkoli ɔ. Yesu frɛle ye asuafoɛ nemɔ, na ɔha hyirele bɛ kyɛ: 2“Mmenia nemɔ yɛ me anwunvo, ɛlɛsa yeɛ bafa batena me nwo wa ɔ, ná belle hwee bɔ bɛkoli ɔ. 3Sɛ me maa bɛfa ɛhɔen bɛkɔ awuro a, annea a né bapɛ bafi atee nu. Na ebiemɔ te dede paa.” 4Ye asuafoɛ nemɔ hane kyɛ: “Ɛwa ate ye nwo, ye de nisua yeɛ yekonya paanoo bɔ ɔkɔso sɔ mmenia hemɔ ɔ?” 5Yesu bisale bɛ kyɛ: “Paanoo nyɛɛ yeɛ ɛmɔle ye wɔ berɛ ɔ?” Bɛhane kyɛ: “Nzoo.” 6Na ɔmaa mmenia ne tena-tenane ase. Afei ɔfale paanoo nzoo ne, na ɔlale Nyameɛ ase. Yeɛ obubuli nu fa mane ye asuafoɛ nemɔ kyɛ bɛ koso, bɛhyɛ bɛma mmenia nemɔ. 7Né bɛle egyein kaa wɔ berɛ, Yesu hyirale so, na ɔhane kyɛ bɛfa ɛhene koso bɛma bɛ. 8Mmenia ne lili maa bɛ ko yili, na asuafoɛ nemɔ sesale ye boso ngɛndɛen nzoo bɔ wayiyi dɛm. 9Mmrienzua kɔyɛ 4,000 yeɛ ne bɛwɔ berɛ ɔ. Oguale bɛ atee nala, 10ɔne ye asuafoɛ nemɔ fole ɛlɛen, na bɛhɔle Dalmanuta mandam nanu dɔ.
11Farisifoɛ nemɔ wale berɛ, na bɛne ye sule aporowaa paa. Né bɛpena kyɛ bɛsɔ ye bɛnea, yeti bɛhane kyɛ ɔyɛ nzɛngyerɛneɛ bɔ ofi anwuro ma bɛnea. 12Ɛhe maa ye wora bɔle paa na ɔhane kyɛ: “Nzuati yeɛ mmenia bɔ bɛwɔ berɛ ɛnɛ ne#8:12 Anaa “Aworɛ ndoɔtoasoɛ he.” pena nzɛngyerɛneɛ ɔ? Meka mekyire ɛmɔ kyɛ, bɛngonya nzɛngyerɛneɛ biala.” 13Yeti, ɔyakyile bɛ berɛ, na ɔfole ɛlɛen ne sa hɔle nzue ne si dɔ.
14Ná asuafoɛ nemɔ wora fili kyɛ bɛkɔfa paanoo, na né bɛlle hwee wɔ ɛlɛen nanu, paanoo komapɛ yeɛ né bɛle ye ɔ. 15Yeti, ɔha hyirele bɛ kyɛ: “Ɛmɔma ɛmɔ nye la berɛ, na ɛmɔnea ɛmɔ nwo yé wɔ Farisifoɛ ne Herode mmɔka#8:15 Anaa “Yiste—nikye bɔ ɔmaa esam tu.” nwo.” 16Na bɛhyɛle yebo bɛhane kyɛ, “Sãa yamva paanoo.” 17Yesu nwuni ye sɔ ne, obisale bɛ kyɛ: “Nzuati yeɛ paanoo bɔ ɛmɔ amva nati, ɛmɔ dwudwo ne? Yeti, ɛmɔ nwuni bɔ meka ne, na ɛmɔ telle yebo? 18‘Ɛmɔle anyeɛ, nakoso ɛmɔnnwu nikye, ɛmɔle asoɛ, nakoso ɛmɔ nnde dwirɛ.’ Aso Ɛmɔngaye? 19Mmerɛ bɔ mmubule paanoo nnu nu mmane mmenia 5,000 ne, ye boso bɔ ɛmɔ sesale ne, né ɔte kɛndɛn nyɛɛ?” Bɛhane kyɛ: “Buru-ne-nyɔ.” 20“Na mmerɛ bɔ mmubule nzoo nanu mmane mmenia 4,000 ne, ye boso bɔ ɛmɔ sesale ne, né ɔte kɛndɛn nyɛɛ?” Bɛhane kyɛ: “Nzoo.” 21Yeti, obisale bɛ kyɛ: “Ɛmɔnya bɛnwuni bɔ ɛhene kyire ɔ?”
22Bɛdwuli Betsaida ne, ebiemɔ fale anyesiniwaaniɛ bie brɛle ye, na bɛsrɛle ye kyɛ ɔfa ye sa ha ye. 23Yeti, ɔsɔle anyesiniwaaniɛ ne nu, na ɔfale ye fili kuro nanu. Afei ɔtele ngɔserɛ guale ye nye naso, na ɔfale ye sa sɔle ye nu. Yeɛ obisale ye kyɛ: “Ɛnwu nikye?” 24Biaa ne mane ye ti so, na ɔhane kyɛ: “Menwu kyɛ mmenia nate berɛ, nakoso bayɛ kyɛ mmakaa ne.” 25Yesu sa fale ye sa guale biaa ne nye naso, na afei de onwuni nikye yé. Ye nye ne bukyele, na né ɔkora nwu nikye biala kama. 26Yesu fale ye hɔle awuro, yeɛ ɔha hyirele ye kyɛ: “Nnɛkɔ kuro nanu dɔ.”
27Yesu ne ye asuafoɛ nemɔ fili berɛ hɔle Kaesarea Filipi nguraa nemɔ nu. Mmerɛ bɔ bɛnate atee so ne, obisale ye asuafoɛ nemɔ kyɛ: “Mmenia keka kyɛ, nde sona beni?” 28Bɛyele ye noa kyɛ: “Ebiemɔ nwa Yohane Suboniɛ, ebiemɔ nwa Elia, yeɛ ebiemɔ koso nwa ɛte adiifoɛ nanu kõ.” 29Yesu bisale bɛ kyɛ: “Ɛmɔ koso, ɛmɔnwa nde sona beni?” Petro ha hyirele ye kyɛ: “Wɔ yeɛ ɛle Kristo ne.” 30Yeɛ Yesu hyɛle bɛ kitii kyɛ, nnɛmaa bɛka ye nwo dwirɛ bɛkyire ebiala.
31Afei ɔmaa bɛnwuni kyɛ, odikyɛ Sona Awa ne nwu amaneɛ paa, ná mbanyi nemɔ, sɔfo mbanyi, ne atwerɛfoɛ nemɔ ye ye ma maa beku ye, ná ɛlɛsa si ne, ɔkɔdwɔso. 32Ɔhane edwirɛ he wɔ bɛ mukoraati nyunu, nakoso Petro hwene ye hɔle ahameɛ, na ohwili ye nyunu. 33Yeɛ Yesu kakyile ye nwo neane ye asuafoɛ nemɔ, na ohwili Petro nyunu kyɛ: “Fi berɛ kɔ dɔ, Satan! Ɛndwene Nyameɛ adwene, sona adwene yeɛ ɔwɔ wɔ ti anu ɔ.”
34Yesi ne, Yesu frɛle mmeni lɔen ne né ye asuafoɛ nemɔ, na ɔha hyirele bɛ kyɛ: “Sɛ ebie pena kyɛ odi me si a, ma ɔpa ye nwo si, ɔfa ye asɛnnua, na ɔhɔ so li me si. 35Ofikyɛ ebiala bɔ ɔpena kyɛ ɔbɔ ye ngoa#8:35 Anaa “Kra.” nwo waen ne, okofi ye sa. Nakoso, ebiala bɔ mene nzɛmba nati, ye ngoa kofi ye sa ne, ye sa kɔha ye. 36Na sɛ ebie nya wiase amukoraati, na ye ngoa fi ye sa a, mvasoɛ beni yeɛ okonya ye ɔ? 37Anaa nzu deinn yeɛ sona kɔhora kɔfa kɔsesa ye ngoa#8:37 Anaa “Kra.” ɔ? 38Na ebiala bɔ mene me dwirɛ nanwo kɔyɛ ye fɛle wɔ mmenia#8:38 Anaa “Aworɛ ndoɔtoasoɛ.” bɔ bɛsɛkye agyaa ne abɔnefoɛ he anu ne, ye koso, ye nwo kɔyɛ Sona Awa ne fɛle mmerɛ bɔ wawa ye Baba anuonyam nu bɔ abɔfo krongron boka ye so ne.”
Currently Selected:
Marko 8: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
