1 Tesalonaika 3
3
Timoti pi Tesolonaika yoba kandre, ede ikne Pol ya Sailas miurara ugwa
1Ana no ene kide kodo, ede bage ta omga igne, no ede pi dumo Atens we dimara i, omga. No dumo Atens munga ba no ene adigl gigledi meglmo mo moglkrimo mo di, kinano yogo, no kan mogl, okuo ene kanamga i kuno ta erekrabedi prisre, no Sailas bogl dumo Atens mogl pai mugl, 2Timoti swara ene meglmara pi kanebedi dedubuglko, ye ede ogwa. No agro Timoti moglkwa i, ye no bogl akie God kogonmo ersre, Krais kamo wakai i, ede eglke enabedi kogon ere munga. No Sailas bogl ye dedubuglka i, ye ene ake ple di tedre, ene pre mediglkwa i si gigle di tenabedi pre dedubuglko, ye ene meglmara ugwa.
3No Sailas bogl prubuglka i, Timoti ene pre mediglmara i si gigle di tenan, ene yubun imara i nomane kide idre, yage si dinaiglmedi prubuglka. I siragl pre enene prikwa i, God ye nono yubun tau inaiglmedi di padigl kodugwa. 4No kamun kuade ene bogl akie munga igne ene ege mere di tedre, Nono yubun tau inamga pamiwe di tomgo, ene prikwa. Te, erme no ene di tomnere mere kuno yegl plau dugo, ene yubun tau igwa i, ene pre kan ere kodigwa. 5Ene yubun tau igwa i pre na kinana yogo, no kan mogl, okuo ene kanamga i, na kide prisre, Timoti tabre pi, ene pre mediglmara adigl gigledi meglmo mo i kanabedi dediga. Na prika i, kowai nono kinano sugwa yagl ikra ene kinano sinan, ene yage sibi, no kogon ene meglmara erumga i, u yoko pi dinabedi prisre, Timoti dedigo, ye ene meglmara ugwa.
6Ana no nomane yegl sidre, Timoti ene pi kano dedubuglka ba erme ye ene meglmara pi kandre, ede ikne ugwa. Ye ede ikne udre, no ka wakai di noro, ene Jisas pre medigl pai moglsre, agroma abaroma ikne ikne deno muduno teimiwe di, yegl di norukwa. Ye ka yegl mere di norsre, ama ene Tesalonaika yoba pre ikne edidre, no okna ene bogl akie munga igne wakai mungra we di, ene yegl dimiwe dugo, no prubuglka. Timoti yegl didre, te, no ene kanamnedi prumnere mere yegl, ene no ama kanamnedi primiwe di, Timoti ka yegl mere di noruko, prubuglka. 7-8Timoti ka wakai yegl di norukwa pre no ye bogl akie gun yomga. No kogon erumnara i, yoba ege mere ere kide ere noriko, no yubun podo imga pre kide pramga ba ene Yaglno Kade pre mediglmara adigl gigledi meglkwa i pre no deno muduno aragan eruko, no aglke kor gun yedre, erme wakai kaima muniwedi prumga.
9Ana no ene pre ege mere God di wakai yei tomga. No God gumoglo mina kamage erumga igne, ene pre gun podo kaima yedre, kamage erumga. 10No gun yomnara i mina etne ya eduer akie ene pre ege ege kamage ersre, God konbauna ta yauro noran, no aglke kor ene kanamnedi God di prumga. No ene kandre, God kamo tau ene praiglkwa yoko pai moglkwa i di tomun, pribi, ene pre mediglkwa i, u gigle kaima dinabedi prumga.
11Ana no yegl prisre, Neno Kade God ya nono Yaglno Kade Jisas Krais yene konbauna ta yauro noribr, no ene meglmara unamnedi kamage ere munga. 12Te, no ama kamage erumga i, Yaglno Kade ene ake ple di tenan, ene pre mediglkwa yoba ikne ikne deno muduno tedre, yoba mudu ama deno muduno tenaiglkwa mabuno i, ene meglmara kau kaima sinabedi kamage erumga. No ene deno muduno podo kaima tomnere yegl, ene ama deno muduno podo ikne ikne tedre, yoba meda meglkwa i ama tedre, eraiglmedi pre kamage erumga. 13No ene pre kamage yegl mere ersre, te, Yaglno Kade ene deno muduno si gigle di tenan, ene adigl gigledi mogl ebi, nono Yaglno Kade Jisas ede ikne unabedi kamage erumga. Na diga i, ene yegl mere adigl gigledi mogl ebi, Yaglno Kade Jisas ye yobama mudu bogl akie unaiglkwa igne, ene Neno Kade God gumuglo mina adigl meglbi, God ene mabunono kandre, Yoba i mabuno du erikwa pamiwa. Aglauno ta paikrumiwe dinabuka pre kamage erumga.
Currently Selected:
1 Tesalonaika 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission