1 Tesalonaika 4
4
Mabuno wakai ere ede podo enamga paugwa
1Ana agroma abaroma wagle, no erme ene mabuno ta eraiglmedi prisre, nono Yaglno Kade Jisas kagie mina ene ka gigledi di tomga i yegl paugwa, no ene okna ka di tedre, God mabuno ta wakai kanabere mere duglo bolo dumga i, ene erme ka i duglo bogl pai molo. No okna ene ka beke tomga i, erme ene duglo boglkrimedi prumga pre dikrumga. Ene erme duglo beglmedi prumga ba God kamo duglo boraiglkwa mabuno i mina ene yakidre, mabuno i ere ede ido ido pi, ere ede kade enaiglkwa pre no dumga. 2No okna Yaglno Kade Jisas kagie mina ene ka siragl mere di tedre, mabuno siragl mere erio dumga i, enene pre meglmedi prika.
3No ka swara ta ene okna beke tomga i, ene kumugl abai ya yagl abu ta bogl kunogl nekrio dumga. I siragl pre God ene mabuno yegl mere erekre, mogl pere edinaiglmedi prukwa. 4God prukwa i, ene ye mabunomo bekidre, ogono nagino mina mabuno kide ere dinamnedi sugl wakai mogl, mabuno wakai, yoba pere wakai kanaiglkwa i keme ene eraiglmedi prukwa. 5Yoba meda God pre kan erekrikwa i, ye mabuno kide yegl mere ta pogglau boglkwa i, duglo boglsre, mabuno deglbi yogwa erimere yegl, God ene yegl ta ere dinaiglmedi prukwa.
6God prukwa i, ene ye kamo i sedidre, agroma abaroma tau bogl ege swara kaima ta kunogl ne dinaiglmedi prukwa. I siragl pre yoba mabuno kide yegl mere ta erikwa i, God ye ere sugwa yagl moglkwa. No okna ka yegl mere ene di tedre, ene mabuno yegl ere dinaiglmedi di tomgo, ene pre kodigwa. 7God nono agle dugwa i, mabuno deglbi yogwa i boraiglmedi agle dikrukwa ba mogl pere edinaiglmedi nono agle dugwa. 8Yegl pre yoba swara ta ka dumga magigl i ta sedinan, ye yoba kano sedekrukwa ba God kamo sedugwa. Te, ene prio, God ene Mudu Murubuglo togo, ene meglmara suna moglkwa i, ye Murubuglomo i du kaima moglkwa pre ene ama mabuno du erio.
9Ana ene agroma abaroma deno muduno ikne ikne tenaiglkwa mabuno i pre, na ka tau mere ene di tenaglka i ta paikrumedi prika. I siragl pre God yene ere mogl, mabuno i ene beke togo, ene mabuno i erikwa. 10Yoba ene kano digo, prumga i, ene agroma abaroma pre mediglkwa yoba mudu provins Masedonia suna meglkwa i, ene deno muduno teimiwe digo, prumga. Ene yegl erikwa i, wakai erikwa ba no prumga i, ene deno muduno te ikne ikne edenaiglkwa mabuno i, ene meglmara yake ede u podo pi pai morabedi prumga.
11Te, ene enene mogl atne edidre, kiede moramnedi erio! Te, no okna ene di tomnere mere yegl, enene kogono ta panabuka i ersre, ogono mina kogon podo eraiglkwa paugwa. 12Ene yegl eribi, ene kaya mokna mo taragl swara ta inaiglkwa panabuka i, enene kogon ersre, inaiglkwa. Yoba pere ta ene ake ple di tenaiglkwa mere yegl ta paikrabuka. Te, ene kogon podo yegl eribi, yoba meda meglkwa i ama ene mabuno erikwa i kandre, wakai kanaiglkwa.
Yaglno Kade Jisas ede ikne unabuka
13Ana agroma abaroma wagle, pre mediglkwa yoba ta geglkwa i, okuo ye meglmara siragl taragl plau dinabuka i, ene kegen pre dikraiglmedi prumga. Yoba meda meglkwa i, ye yobanoma ta geglkwa igne, yoba geglkwa i okuo ta adiglkraiglmedi prikwa pre ye kide kaima prisre, kai podo erikwa ba no ene yegl ta erekraiglmedi prumga. 14Nono Jisas goglsre, adigl u kor omiwedi pre medunga pre nono ama pre pogl sinamga i, Jisas ede ikne unabuka igne, yoba okna Jisas pre mediglsre, geglkwa i, ye mudu kiano mina Jisas bogl akie heven ibo kide kodo, ede makandigle unaiglmedi God dedenan, ye mudu Jisas bogl ede ikne unaiglkwa.
15Nono Yaglno Kade yene okna ka ta di noruko, no erme ene di tomga. Ka i, yegl mere paugwa, Nono Yaglno Kade ede ikne unabuka igne i, nono tau goglkre, kor mogl pai moramga i, nono ta ede okna pi, ye tegigl yekramga ba yoba ta pre mediglsre, geglkwa i komnaye adiglbi, nono ye bogl u swara pidre, ege swara ta ogono nagino mina Jisas tegigl yenamga. 16I siragl mere plau dinabuka i, yegl mere paugwa, nono Yaglno Kade Jisas yene heven ibo kide kodo, ede atne udre, ka podo kide kaima ta dinabuka. Dinan, angelo swara ta angelo tau bitno moglkwa i ama ka podo dinan, God biugelmo borabuka. Boran, taragl komono kana plau dinabuka i, yoba ta Krais pre mediglsre, geglkwa i, ye ogono nagino mina adigl u kor enaiglkwa. 17Adigl u kor ebi, nono pre medunga yoba tau goglkre, kor mogl pai moramga i, ye bogl u swara pidre, ede egli ibo pi, kamun kua mina suna pidre, Yaglno Kade kamun mitna unabara i, ye tegigl yenamga. Nono Yaglno Kade Jisas tegigl yedre, ye bogl aimadi kamin akie moramga. 18Taragl yegl mere okuo plau dinabuka pre enene ka i poglo di pramnedi di ikne ikne edidre, deno muduno ikne ikne si gigle di teo.
Currently Selected:
1 Tesalonaika 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission