1 Tesalonaika 5
5
Ermine, abuglage sumara wan moramga paugwa
1Ana agroma abaroma wagle, nono Yaglno Kade aunake ede ikne unabuka i pre no ka tau ene di tenamga i ta paikrukwa. 2I siragl pre enene pre kan erikwa i, nono Yaglno Kade i, yoba ka tage tenabuka igne i yoba pre pogl sikre meglbi, tabre plau dinabuka. Kunogl gogl yoba ta eduer suna yoba kipamara ede yugugl ugo, yugu nem kandre, wai kuglmere yegl, yoba kankre meglbi, ege i plau dinan, ye wai kuraiglkwa. 3Yoba yene ikne ikne di tedre, Yoba ta no sikriko, kiede mogl, ame wakai dumniwe di, yegl di meglbi, God tabre ye ere sinan, yoba swara kaima ta teke ede meda pikrabuka. Abu ta gak kuragledi erukwa igne, nagie giugl tabre kana prumere mere yegl, ege kide i, tabre plau dinabuka.
4Yoba mim erumara meglkwa i, God yoba ka tage tenabuka ege i, tabre kana ye meglmara plau dinabuka. Kunogl gogl yoba ta eduer suna ugo, yugu nem kandre, wai kuglmere mere yegl, ye wai kuraiglkwa ba ene meglkwa i, ene mim erumara moglkrikwa pre ege i ene meglmara yegl ta plau dikrabuka.
5Ene pre mediglkwa yoba meglkwa i, abuglage sumara moglsre, ermine wan meglkwa mere yegl paugwa. Nono mim erumara moglsre, eduer wan munga yoba ta moglkrumga pre 6nono siragl mere wan, mogl pai erumga i kan pogl sidre, yomere pamere wan moramga paugwa. Yoba pre mediglkrikwa i, ye siragl mere wan, mogl pai erikwa i, kiurikwa pre ye ugl du paigwa mere yegl paugwa ba nono yegl ta erekramga paugwa.
7 Eduer yogwa i, yoba ugl du pai, pre pogl sikrikwa ege yogwa. Te, eduer yogwa i, yoba spak erikwa ege yogwa. 8Ba nono munga i, ermine wan munga yoba munga mere yegl paugwa pre nono nomano mina pre pogl sidre, yomere pamere wan moramga paugwa. Soldia kuda kugugl gagl edimere mere yegl, nono God kamo pre medigl moglsre, deno muduno ikne ikne tomun, nono ain pitno mina padunga mere yegl panabuka. Te, God nono ere i kodumiwedi pre gi dumun, nono ain bitno gagl edumga mere yegl panabuka.
9Ana God okuo yoba ere sinabuka igne i ye nono ere inan, nono ama suna mogl, yubun ikramga i, nogugl paugwa. I siragl pre God nono ka tage noragledi di padiglkrukwa ba nono Yaglno Kade Jisas Krais kogon erumara i mina ye ka ta di paduglkwa i, Na yobanama ere ibo, ye yubun ama i dinaiglmiwe di, ka yegl di padigl kodugwa.
10Nono Yaglno Kade nono pre goglkwa i, nono pre medunga yoba ta munga i, mudu ye bogl akie aimadi kamin kor moramga pre goglkwa. Nono pre medunga yoba tau pre pogl sidre, ermine ugl paikre, kor munga mere yegl erumga i ya te, pre mediglkwa yoba tau ama ugl pai meglkwa mere yegl erikwa i, mudu ye bogl akie moramnedi pre goglkwa. 11Ana nono mudu Yaglno Kade bogl aimadi kamin kor moramga ka i, ene poglo di prisre, ikne ikne deno muduno si gigledi tedre, agroma abaroma yakenaiglmedi erio. Na prika, ene erme mabuno i ere meglmedi prika ba ene ege ege ere pai moglsre, mabuno i mina yake pai moraiglkwa pre diga.
Pol ka dudumara boglkwa
12Ana agroma abaroma wagle, nono Yaglno Kade yoba tau kogon dedidre, ene suglno moraiglmedi dedugo, meglkwa i, ene ye kano praiglmedi prumga. I siragl pre ye ene meglmara kogon podo ersre, God kamo ene beke teigwa. 13Ye kogon wakai erikwa i pre ene ye deno muduno tedre, pre i mitna edenaiglkwa paugwa. Te, no ene mudu kigl nonga dikre, akie wakai moraiglmedi prumga.
14Agroma abaroma wagle, ene mabuno tau ama eraiglmedi prumga i, yegl paugwa, yoba tau kogon erakiure, yoko meglkwa i, ene ka teo. Te, yoba tau ye pre mediglkwa gigle dikrukwa i, ene si gigle di tedre, yoba tau deno muduno mina yobuglo paikrukwa i ama si gigle di teo. Te, ene yoba swara ta deno tabre kubro tekrio.
15Yoba ta ene ere kide ere tebi, ene mabuno kide ta ere ikne ede tekrio. Ene mabuno ta eribi, agroma abaroma tau wakai moraiglkwa i, ene mabuno i keme ere ikne ikne edidre, yoba meda meglkwa i ama mabuno yegl ere teo.
16Ene gun ege ege yedre, 17kamage ege ege ersre, 18ege kide mo ege wakai yenabuka igne ama God di wakai yei te pai molo. I siragl pre ene Krais Jisas yobama meglkwa i, God ene mabuno yegl eraiglmedi prukwa.
19God Murubuglomo ene meglmara suna kogon ta erabuka i, ene si kegl dinamnedi erekrio. 20Te, yoba God kamo kep ere dumne dinaiglkwa i, ene ye kano sedekre, 21wakai ere kinano gudu prio. Ye God kamo pamere ta dibi, ene ka wakai i prisre, duglo bolo. 22Ene yegl ersre, te, mabuno kide kane kane ta panabuka i, ene ta ere dinamnedi erio!
23Agrama abarama wagle, na ene pre kamage erika i, nono deno muduno wida di padigl norukwa God i, ene yobuglo bogl tenan, ene mabuno du keme ersre, yoba du moraiglmedi kamage erika. Na yegl mere kamage ersre, ama ene deno muduno mina ya kiano mina ya ogono nagino mina aglau ta erekre, mabuno wakai duglo bogl meglbi, Jisas ede ikne unabedi kamage erika. 24God ye ene mabuno du boraiglmedi agle dugwa yagl moglkwa i, ye nono ake ple di noragle dugwa i, ka dumara ege ege adigl moglkwa pre ye swara ene mabuno du eraiglmedi ere tenabuka.
25Agroma abaroma wagle, ene ama no pre kamage ere norio. 26Te, ene agroma abaroma mudu God yobama akie muniwedi prisre, ikne ikne nuguno kugro, kogl kare di io. 27Te, na Yagl Kade kagie mina ene erme ka gigledi di teiga i, na pepa magigl boglka i, ene agroma abaroma mudu kere teo!
28Ana nono Yaglno Kade Jisas Krais ye ene yoko kaima ere wakai ere te pai morabedi prika.
Currently Selected:
1 Tesalonaika 5: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission