Luugaay W'injiil 11
11
Toosileel
1Yint gaat Yasuuꞌa mhiin gaalnaay siileeli. Baruuh faayisiyanihoob, ikwiriyaatayeesooh gaal bariiyooh dehaay, “Wꞌankwanaayuun, Yuuhanna ikwiriyaatayeeh allamiyeet tehayꞌaatiit, toosileel allamaa hoon!” idi.
2Yasuuꞌa bareeyooh dehaay, “Siileelteenihoob,
Baabuun tibreeteeb eefeeb!
Uusmuuk mugaddas baꞌiikti,
tehadꞌaayeetuuk baꞌeeti! Baruuk harriiweet tibreeteeb teefeet toonaatiit, tubuutiib han batiikti.
3Bꞌeebka timꞌariitoon hiiyya hoon.
4Tumaagnaaytoon afooya,
hinin han toomaag iwariyoon oodehay afoonay,
aree jarrabamtiib baadꞌiya hoon.” idi.
5Malya Yasuuꞌa bareeyooh dehaay, “Gaal bareesookna araaw ibariib, whawaadi tarabeeb wꞌaraawooh bayiit, ‘Wꞌaraawuunay! Mhay hadhi siisalifaheeb, 6Araawu gaal iibaabtii eeyaheeb, barooh aniiweena naat han kaabari.’ tindiya. 7Malya uuraaw ugawiit hooytee kwinhiit, ‘Yhaa baagallabaheeb! Udheefa suur akay hakwaaru, yꞌari unꞌaaliib geebu diwaaba. Ani yakiit barook hadhiib aniiweetook toona kaꞌadgiran.’ indi. 8Ani andi hookna, uun baruuh araawooh ikatiyeet toonaatii barooh yakiit yhadhi kiiyhi. Laakiin baruuh kassoohoob iraatamtiib sikwꞌaab kiikuuyt, barooh harriiweenaaka iniiw.
9Aflaay ani andi hookna: Raataana, aree beet toona ittiyiw tiyadna. Hariwna, aree imaar tiyadna. Udheefa kwilna aree baruuh dehookna itnigil indi. 10Raatiiniibka iniin. Harriiwka marri. Aree udheefa inkwiilka baruuh dehaay itnigil indi.
11Bareekna ibaabeeb, wꞌooruuh hadhiib hooy harriiweek, aweeb iniiw keeyaabu? Aashoob hooy harriiweek, wꞌaashooy mhiin kwakwar iniiw han? 12Tari baruuh kwihiib harriiweek, talꞌanoob iniiw han? 13Aree bareekna tikatiineek, baraakna yꞌamag, yꞌareekna kak daayiina tiyawneeb tikteenna. Aflaay Baabuukna tibreeteeb eefi, oodehay barooh Eeshuuk Imugaddasa raateen kak winneet gwidaana iyaaw indi!” idi.
Yasuuꞌaawwa Baꞌalsabuulwa
14Yasuuꞌa gilluusi takii jin iifirꞌa. Aajin ifirꞌanihoob, uutak ugilluusi hadiidiya aree uudehay hooy ajjabamiyaan. 15Laakiin bareesooh gali, “Baruuh Baꞌalsabuul eejini hadꞌaay, eejin farꞌiini.” idiin. 16Wari aree, barooh jarrabtiib yhariwnayt, tibreetee alaamaat raatiyaan.
17Laakiin Yasuuꞌa bareeyeeh iginꞌaayeeb tiifiit toona ikanaayt bareeyooh dehaay: “Tehadꞌaayi tuukna malu mhiin daatniit katꞌami tindi, uugaw malu mhiin itꞌadhiidh, dhibi indi. 18Oobliis uukna malu mhiin itꞌadhiidheek, kak tehadꞌaayeetuuh tingadi? Baraakna, ani eejin Baꞌalsabuulii mhaliini tiyadnayt, ani een andi. 19Oontꞌa ani Baꞌalsabuulii eejin mhalaniyeek, bareeyookna harꞌii sakeen uudehay bareeh kak mhaleena? Aflaay malya, baraah gaadiyaayeekna iikti iyadna. 20Laakiin ani Ukwaasanaay yꞌakriree eejin mhalaniyeek, aflaay Ukwaasanaayt tehadꞌaayi bareeyookna dehaay yꞌaati.
21Akra tak winneet gadhꞌamaab ugawooh ookna ingwꞌiidihoob, umraayuuh diimaab asgaabi. 22Laakiin weer tak akrakaab, barooh thꞌatiit garriibihoob, igadhꞌi ibaruuh dehaay adehamaab iiktiyeeb hooy iniin, aree tiganiimi ishꞌadhdhiidh.
23Anii geeb baahaay uutak been, anii kehii eefi. Aree anii geeb oodehay baasimarriib uutak, baruuh itbariir.” idi.
Eejneet Mꞌageer
24Yasuuꞌa “Aajin wꞌaadamii itfarꞌanihoob, nageema mhiin hooy fiineeneeb yhariwna aree barooh kiimriin. Malya aajin, ‘Oogaw whooy nifirꞌeeb beeti nitꞌigir niyad.’ iyadna. 25Aajin yꞌeenihoob, oogaw atimhigaa nhasaa aree shibooba imeerna. 26Malya aajin giigeena, aree wari jin asaramaab bareesoohka winneet amagkaab geeboohna haay yꞌeen. Aree difiit beentooy ikweerna. Aakhir been uutak whaaluuh suureeka amaagkaab ikati.” idi.
27Yasuuꞌa een ibhali masi hadiidee, takat oodehayi bitikii waliiktaayt, “Barook tifriit kadhishtaat tuundi libaabta.” tidi.
Sidik Libaabiyaan
28Yasuuꞌa “Beet tuuna sidiku, laakiin baliin Ukwaasanaay ibhali maaswiit isnaakiir, libaabeenkaaba.” idi.
Yuunisiit Tꞌalaama
29Uudehay gwidakaab ikeeneet midda, Yasuuꞌa “Uun baruuh amaag taas ikati. Baraah mꞌuujisaateet alaama raateena, laakiin unabi Yuunisiit tꞌalaama nuun, weet alaama ittiyiw kitdiina. 30Unabi Yuunis Neenawaay oodehayii dehaay alaamaat iikti. Wꞌaadami Oor han ootaasii dehaay alaamaat iikti indi. 31Oosꞌiidiit hadꞌa whukwimiit yintiib yakiit oon ootaasi dehay atehimi tindi. Batuuh tubuuti agiyaay eetaayt, Suleemaaniit tifagarandiiti bhali sinaakrooyt tehariw. Laakiin tooy Suleemaaniika winka gaal eefi. 32Neenawaay uudehay han whukwimiit yint yakiit oon ootaas atehimi iyadna. Unabi Yuunis Ukwaasanaay ibhali bareeyooh dehaay hadiidiyanihoob, baraah tuubiyaan. Tooy laakiin Yuunisiika winka gaal eefi.” idi.
Ugarooy Nuur
33Yasuuꞌa, “Lambaat shidhhaniit kwanbiis tari diwaani whii daasiini gaal han kiihaay. Laakiin baruuh tageega mhiin daasiini. Aflaay oogaw shuumeen baliin rheenee dehaay adgireen. 34Tuliiliituuk ubashariitook lambaati. Tiliiliyaataak daayiit ikatiineek, kassuuh ugarooyuuk han nuur eettiib. Laakiin tiliiliyaataak amagt ikatiineek, ugarooyuuk han thibnamiini. 35Aflaay been uunuur hook eefeeb, thibin biikaayeet toona, daayiib shibiba. 36Shaawti kassuuh ugarooyuuk nuur eettiibeek, aree tarab han thibnamaab biikaayneek, baruuh winneet buubiini. Malyaab tulambaati nuur tꞌiiteena dehookna buubiini.” idi.
Yasuuꞌa Ifariisiiwwa Whaggi Koojaawwa Atehimiini
37Yasuuꞌa ibhali faayisiyanihoob, tak Fariisi bariiyooh dehaay mꞌariitiit aduumaat idꞌi. Aflaay Yasuuꞌa giigiyaayt timꞌariitii dehaay geeb isꞌa. 38Laakiin been Ufariisi Yasuuꞌaab timꞌariiti hankaay yꞌayeeh shigwidhaab baakaay rhiyanihoob, ajjabamiya.
39Malya Wꞌankwana bariiyooh dehaay, “Oontꞌa baraakna Ifariisi ookaaswa tukoobaawwa tisarat tisinhiisna, laakiin tehooytaakna haamtiiwwa maagnaaytwa atabta. 40Baraakna uudehay yꞌafrii! Been tehooy idꞌiib, tisarat han dꞌiyaab kiiki han? 41Laakiin tukoobaatiit hooyteeb teefeet toona imiskiina hiina. Aree naatka dehookna nhast iikti tindi.
42Tidhikwna baraakna Ifariisi! Timꞌadayaataakna ifeerneet tibuhaara tꞌiiteena inanꞌaaywa igirfaaywa kasteeh warit shakwiinaateewwa tutamnaat takwi Ukwaasanaay dehaay tifarꞌana. Laakiin oodehay titalisna aree Ukwaasana kaꞌareetaana. Oodehay irawee dehaay tishboobiineet toonaatu, aree adil tidꞌaneet toonaatu, masi Ukwaasanaay dehaay tutamnaat takwi tifarꞌaneet toonaati. 43Tidhikwna, baraakna Ifariisi! Iyahuudi diini gawiib timiisꞌanii tisuuriit areeteena. Isuugaayeeb daayiib salaamamteeneetwa hamooysamteeneetwa areeteena.
44Tidhikwna, baraakna imiimasha tꞌalaama baabariib uudehay kanaab baakaay kehii hiireereeneeb tꞌiiteebaana.” idi Yasuuꞌa.
45Whaggi koojaayee gaal bariiyooh dehaay igwibi, “Seednaay! Teen teena tindiyihoob, neewtiniya hoon.” idi.
46Yasuuꞌa “Baraakna whaggi kooja han, tidhikwna! Oodehay diga rabi tireebna, aree baraakna iknaayaakna bareetooh shamaamtiib gaat giibalaaytookna han kehii kadaastaana.
47Baraakna tidhikwna! Inabiyaayee dehaay miimashaab teedꞌirna, aree baliin bareeh hoobaakna daaraaba. 48Aflaay hoobaakna igwibibneet toona agbilteena aree baraak iknaayaakna tibadehana. Baraah inabiya idaarna, aree baraakna imiimashaayeehna teedꞌirna. 49Toon toonaatii, Ukwaasana tifagarandiiteesooh, ‘Ani bareeh nabiyaawwa, linguumaawwa dehaay diigwati andi. Baraah galib bareesooh idaar iyadna, aree warib amaag iiwari iyadna.’ idi. 50Aflaay tuduniya badootaneekka ifaf kasseeh inabiyaayi booy, uun uutaas raatamami indi. 51Haabiiliib ubooyiiwwa, beeb tikaraamaati mhiinwa Oomhiin Umugaddasi bitikwa itoodaar Sakariyaay ubooyiiwwa hadiit, oon ootaasi kehii eefi. Awooh, andi hookna, uun uutaas kastooh beet toona raatamami indi.
52Tidhikwna, baraakna whaggi kooja! Tukanaanti dheefaay umiftaha taftaana, laakiin iknaayaakna shuumaab kitteena. Aree baliib ishuumiin tehabiina.” idi.
53Yasuuꞌa beentooysii giigiyanihoob, Ifariisiiwwa whaggi koojaawwa winneet bariiyooh amꞌakuura badooyaaniit, barooh gwidaana raatiyaan. 54Aflaay barooh naat diyee yꞌibikni jillaay bariiyeeh ibhali igwꞌadna.
Currently Selected:
Luugaay W'injiil 11: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
