Luugaay W'injiil 4
4
Uubliis Yasuuꞌaab Jarrabiya
1Yasuuꞌa Eeshuuk Imugaddasaayee tabaa Urduniit abaatii dehaay yꞌagar. Aashuuk barooh umingaay beeti salooliyaan. 2Beentooy uubliis fadhig tamuunt yina barooh jarrabiya. Kastooh toon tumidda Yasuuꞌa mꞌariit tamaab kiiki. Aree baliit tiyina ingadnihoob, baruuh winneet yharagw.
3Uubliis bariiyooh dehaay, “Ukwaasanaay Wꞌoor tikatiyeek, oon wꞌawi ‘Hadhiib akaa!’ diyaa!” idi.
4Yasuuꞌa igwibi, “Tuun batuuh ooktaabiib kataabtu: ‘Wꞌaadami mꞌariit toobhaanaatii kiidhhan.’ diyaabu.” idi.
5Uubliis barooh tageegi mhiin beeti haay tageegiyaayt, kasteeh tubuutiit tehadꞌaayi baliit gaat damtalawtiib rhisiya. 6Aree baruuh bariiyooh dehaay, “Kasseeh een yhasheet hadꞌaayeewwa matuunwa iyaaw hook andi. Tuun tuuna aneeb attiyeewiyaatu, aree batooh ani aharriiweebka aniiw. 7Aflaay aneeb anbiideek, tuun kastuuh bariitook iikti tindi.” idi.
8Yasuuꞌa igwibi, “Tuun tuuna ooktaabiib kataabtu: ‘Wꞌankwana Ukwaasanaayook abida aree barooh oobhaat shagaama.’ indi.” idi.
9Uubliis barooh Algudus haay ibaayt, Wꞌankwanaay ugawi mooyi kehii isingad. Baruuh “Ukwaasanaay Oor tikatiyeek, tooysii nꞌati faraa! 10Tuun batuuh ooktaabiib kataabtu:
‘Ukwaasana imalakeeh
barook daayiib eegwꞌadiini jillaay waseeyiini.
11Baraah yꞌayeeyoohna kehii itfiyik hook iyadna, aflaay iragadaayeek awi han iithꞌa kiidi.’ diyaabu” idi.
12Laakiin Yasuuꞌa igwibi,
“Uuktaab: ‘Wꞌankwana Ukwaasanaayook baajarrabaa!’ indi.” idi.
13Uubliis kastooh toonaatii Yasuuꞌaab jarrabiyaayt faayisiyanihoob, baruuh weer door ookiik barooh yꞌish giigiya.
Yasuuꞌa Naasiraay Itoorraab
14Yasuuꞌa Ishuuki akriree Jaliil beeti yꞌagar. Bariiyuuh usakana kasseeh yhadabeeb itmassaaw. 15Yasuuꞌa oodehay Iyahuudi diini gawiib allamiya. Kassuuh uudehay barooh yhamidna.
16Yasuuꞌa Naasiraab tehooy hamaay iiktiyeet beeti eeya. Aree toona diimaab sakiyeet tꞌiiteena, toosab Iyahuudi diini gaw shuumiya. Aree baruuh agriiyi jillaay asti ingad. 17Baruuh unabi Isyaasiib ooktaab ittiyeewaay. Yasuuꞌa ooktaab ingilaayt, oomhiin beet tuuna hooy kataabt tiiktiyeeb imri:
18“Wꞌankwanaay Aashuuk anii kehii eefeen.
Usakana udaayiib oodehay yhamraab
askatiimee dehaaywa,
wꞌabaak itfadiigeet toonaati sootii dehaaywa,
whamashay rhisaniyee dehaaywa,
yꞌatootraab asfadiigee dehaaywa Wꞌankwana diigwatiyaheeb.
19Aree Wꞌankwana udehayooh hooy agbiliiniyeeb whawil asookiinee dehaaywa, diigwatiyaheeb.” idi.
20Malya Yasuuꞌa ooktaab iksisaayt, ukhaddaam nuunsiyaayt isꞌa. Kassuuh uudehay Iyahuudi diini gawiib iifiin winneet barooh ishbibna.
21Aree Yasuuꞌa bareeh infaraadiit, “Amsi oon uktaabiib timaasiwneet tuuna sidik tiki.” idi.
22Uudehay kassaah daayiinaayt bariiyooh hadiidiyaana, aree bariiyooh uyafii eeyaan tinꞌimaati bhaliyeeb ajjabamiyaan. Baraah raatiyaana, “Uun baruuh Yuusifi oor kiiki han?” idiin.
23Yasuuꞌa bareeyooh dehaay, “Baraak een eemtaal anii dehaay tiyadneet toona kaꞌeetehakan: ‘Whakiimay, ugarooyook mheelaa! Kafarnaahuumiib sakiya diyee nimaasiweet teena tooy tumadiinaatiyook sakaa!’ tiyadnaheeb.” idi.
24Yasuuꞌa masi, “Oosdik andi hookna, tumadiinaatiyooh agbilama nabi kiihaay. 25Oosdik andi hookna, unabi Eelyaay udamaaniib, Israaꞌiileeb gwidaat ibraatfaatki iifiin. Taabri mhay hawlaawwa asagwir tirgaawwa assamiyaanihoob, uubri kwidhiyaayt kassooh whaashiib akraat hargwi daata. 26Unabi Eelya teen timꞌateeb gaanaatii dehaay han diigwatamaab kiiki. Laakiin Siidooni haashiib tumadiina Sirfaatiib tiifiit ibraatfaatki beeti diigwatamiya. 27Unabi Alyashꞌaayiib udamaaniib, Israaꞌiileeb gwida dehay bhadh iibriin iifiin. Laakiin Nꞌuumaan Usuuriyaayi nuun gaal han bareesooh mheelamaab kiiki.” idi.
28Iyahuudi diini gawiib iifiin uudehay kassaah een ibhali imaasiwnihoob, winneet yhaseen. 29Baraah yakiyaaniit Yasuuꞌaab tumadiinaatii iskwiin. Barooh ukanbuulii nꞌati iigidni jillaay, oorbaay mooyi kehii tiifiit tumadiina beeti haay reewiyaan. 30Laakiin Yasuuꞌa kassooh oodehayi bitikii sakiyaayt giigiya.
Yasuuꞌaabwa Ootak Ijineeyaaywa
31Malya Yasuuꞌa Kafarnaahuum iidneet Jaliileeb tiifiit tumadiina beeti hoogiya. Aree oodehay Toosab allamtiib badooya. 32Ibhaliyaah takweet iibriinayt, uudehay bariiyooh utꞌaliimiib winneet ajjabamiyaan.
33Iyahuudi diini gawiib jin abkaab iiktiini tak iifi. Uutak tageegi hissii gagariya, 34“Aah! Yasuuꞌa Unaasiraayi! Naan hoon harriiwa? Kwidhistiyoon dehaay yꞌaabwa han? Baruuk aab tikatiyeeb akteen hook, Ukwaasanaay Umugaddas Oongaal tikatiya!” idi.
35Yasuuꞌa eejin idninaayt, “Tim akaat hooy firꞌaa!” idi. Malya aajin ootak kassooh oodehayi suurii dhibisiyaaniit, barooh adaayaab baakaay hooy ifirꞌana.
36Uudehay kassaah ajjabamiyaaniit taktakee dehaay, “Aan naa bhaliiya? Baruuh eejin akrireewwa takweeteewwa isfarꞌa. ‘Firꞌana!’ indiyihoob, itfarꞌana.” idiin. 37Yasuuꞌiib usakana kasseeh yhadabeeb iifiin yhasheeb ibrar.
Yasuuꞌa Gwida Dehay Mheeliya
38Yasuuꞌa Iyahuudi diini gawii giigiyaayt, Siimooniib oogaw shuumiya. Beenhoob Siimoon tehamtuuh akra abaaki tiibri, aree baraah Yasuuꞌa tootakat dehaay mheeliyeet toona raatiyaan. 39Aflaay Yasuuꞌa batiiyooh kuuramiyaayt yꞌabaaki idnin. Aree yꞌabaaki tutakatii ifirꞌana. Batuuh gaalhoob yaktaayt, bareeyooh dehaay shagaamta.
40Tuuyin dhibtiyihoob, kassuuh uudehay gwida jinsaayeet lhanay iibriin yꞌamshaayeehna haay eeyaan. Yasuuꞌa een bareeh gaalka yꞌayeeh kehii daasiyaayt, bareeh mheeliya. 41Gwida dehayii han jin hooy ifirꞌana. Aajin waliikiyaaniit, “Uun baruuk Ukwaasanaay Wꞌoorwa!” idiin. Laakiin aajin baruuh Umasiih iiktiyeet toona iktiinnayt, Yasuuꞌa eejin idaanin aree bareeh hadiidsaab kiiki.
42Tuuyin talawtanihoob, Yasuuꞌa mingaayama mhiin ibi. Kassuuh uudehay ifirꞌaniit, barooh yhariwna. Barooh imriinihoob, bareesooh oogiig habuuy jarrabiyaan. 43Laakiin Yasuuꞌa bareeyooh dehaay, “Ani timadiina tirawteeb eefeen oodehay han Ukwaasanaayt tehadꞌaayeeti sakana udaayiib ibakii aniiweet toonaati. Ani toon toonaatii dehaay diigwatamaabi.” idi. 44Yasuuꞌa Yahuudaay whaashiib Iyahuudi diini gawaayeeb usakana udaayiib bhaliiya.
Currently Selected:
Luugaay W'injiil 4: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
