Luugaay W'injiil 8
8
Iteeraay Mitaal
1Beenaay harꞌii, Yasuuꞌa madiinaatwa gariyaatwa gaanaatii weet beeti iibaabiya. Oodehayii dehaay Ukwaasanaayt hadꞌaayeeti sakana udaayiib hadiidi. Ikwiriyaatay itamna malu bariiyooh geeb iifiin. 2Aree mꞌat galit Yasuuꞌa jineewwa, lhanayteewwa mheelaab iiktiyeet han geeb iifiin. Taan bataah: Maryam Majdaleenaab iidneet suur Yasuuꞌa asarama jin hooy firꞌaab iiktiyeetwa, 3Khuusaab, Heeroodisiib uwakiiliit takat Yoowannaatwa, Soosannaatwa, gwidaat waritwa iiktiin. Taan taamꞌa umaaliisoohna bareeh iishtamna.
4Winneet gwida dehay gwidaat madiinaatee eeyaaniit immarraayna. Aree uudehay madiinaat madiinaatii Yasuuꞌii dehaay yꞌiina, baruuh een eemtaal hadiidiya: 5“Dirꞌaateega teeraayooh yꞌiidi jillaay ifirꞌa. Baruuh iteeraayooh iigideet midda, teera gwadi salaliib dhibiya. Baruuh eetamiya, aree aakilay eeyaaniit iteera aamiyaani idꞌiin. 6Weer teera liilaawi kehii dhibiya, been iteera fuutiitiyanihoob, yadhꞌuuyti naawii balamiya. 7Weer teera naweeti hooyteeb dhibiya. Laakiin tinawi geeb yakiyaaniit iskitni idirna. 8Weer teera aree daayi haashiib dhibiyaayt, yakiya. Harroob haay eeya, iteeraayka sheeb hadiit gwidaka firaay haay eeya.” idi.
Yasuuꞌa een iidihoob, baruuh waliikiya, “Eemsiiw angwil ibariib been baꞌiimsaw.” idi.
9Ikwiriyaatayaah een eemtaal naan haay isehariiweeb barooh raatiyaan. 10Yasuuꞌa “Baraakna Ukwaasanaayt tehadꞌaayeetiit tikwabasnay attiyeewiyaabaana. Laakiin eeraw mitaalee sooyani, aflaay
Aan baraah shibbee karhiyaana,
maaswee kaꞌafhamiyaan.
11Aan aamtaal oontꞌaaneet eefeen: Iteera Ukwaasanaay ibhaliiya. 12Iteera usalaliib dhibiyaab, baliin een ibhali eemsiiwna, aree malya uubliis dehaay yꞌiit ibhali iginꞌaayeesooh tafiiniyeeb oodehay ikati. Aflaay baraah aamaniit biidhhanni jillaay ibhali iginꞌaayeesooh tafiini. 13Iteera uliilaawi kehii dhibiyaab, baliin een ibhali eemsiiwnihoob afirhaa agbileena, laakiin gadam kiibariin. Baraah shalikt midda aamaneena, laakiin ijarrabamti door baraah fidnaab yakeen. 14Iteera tinaweeti bitik dhibiyaab, baliin een ibhali eemsiiwna, laakiin usalaliyoohna sakeeneet midda, udamaani gwirhaawwa, uumraaywa, tuduniyaatiit nafirnaywa bareeh isakitna. Aree baraah bashikw firaay haay kaꞌeeyaan. 15Laakiin iteera whaash udaayiinaay dhibiyaab, baliin een ibhali eemsiiwna aree daayi ginꞌa takwakwnaayeeb ideebna. Aan baraah amtaraamiit gwida firaay haay yꞌeen.” idi.
Tulambaati Mitaal
16Malya Yasuuꞌa, “Lambaat shidhhaniit, karooraati hooyteeb kwanbiis, tari nꞌaali whii daasiini gaal han kiihaay. Laakiin oogaw shuumeen uudehay oonuur rheeni jillaay tageega mhiin daasiini. 17Dhꞌimaana lawi baadiit naat han daayi kitdi. Aree kwabaasna ituukkin baadiit tari rhami baadiina han daayi kitdi. 18Shaawti een ibhali kak teemsiiwneeb daayiib gwꞌadna. Naat ibariibka gwidakaana ittiyiw indi, laakiin naat baabariibka beet ibariyeeb hiisiiniyeet tuuna han hooy giigi tindi.” idi.
Yasuuꞌiit Toondeewwa Isanaawwa
19Oontꞌa Yasuuꞌiit tuundeewwa isanaawwa barooh rhiini jillaay eeyaan. Laakiin dehayiit guudti sabbii bariiyooh ikatama adgiraab kiikeen. 20Gaal bariiyooh dehaay, “Deetuukwa isanaayaakwa barraab ingadiin, eerheek yhariwna.” idi.
21Yasuuꞌa “Deetuuwwa aniib isanaawwa, baliib Ukwaasanaay ibhali sinaakirtiit haay shagaameen ikatiin.” idi.
Yasuuꞌa Ubaraam Isingad
22Yint gaat Yasuuꞌa ikwiriyaatayeeh dehaay, “Yakaana, ubhari dar ooraaw niibi!” idi. Aflaay baraah falluukaat yꞌamniit hantaayaan. 23Baraah ubhariib iibaabee, Yasuuꞌa diwiya. Ubhariib gaalhoob akra baraam eeya. Tufalluuka yam titab, aree baraah akra bidhꞌiib daayaan.
24Ikwiriyaatay giigiyaaniit barooh isibꞌarna. Baraah “Seedna! Seedna! Aayam miyaayoon yhariwna.” idiin.
Yasuuꞌa yakiyaayt ubaraamwa, eeyam yꞌitrigiswa idnin. Ubaraam ingad aree naatka hayaayta. 25Malya Yasuuꞌa ikwiriyaatayeeh raatiya, “Wꞌiimaanuukna keeya?” idi.
Ikwiriyaatay winneet irkwiiniit ajjabamiyaan. Baraah gaal ooraaw raatiyaana, “Uun aabu? Ubaraamwa eeyamwa danniin, aree baraah barooh isnaakirna.” idiin.
Yasuuꞌa Jin Abkaab Iiktiini Tak Mheeliya
26Jaraasiin iidni haash Jaliili fiireeb eefeeb iyami dar ooraaw iktimna. 27Yasuuꞌa tufalluukaatii tikwiyanihoob, tumadiinaatii tak jin abkaab iiktiini imꞌashaash. Uun uutak gwida daman halakaab akwaay kiiki, tari gawiib kwiraab kiiki. Laakiin imiimashaayi bitik ikwiir. 28Uutak Yasuuꞌaab rhiyanihoob, bariiyooh suurii dhaabiyaayt, winneet win hissii waliikiya, “Yasuuꞌa Ukwaasana Winneet Utageegaay Oor, naan hoosu harriiwa? Winneet atꞌajiir hook, baajasaayaheeb.” idi. 29Yasuuꞌa ootakii itfarꞌaneet toona eejin sooyaabu. Aajin ootak gwida doora abkaaba. Aree barooh yꞌayeewwa iragadaawwa shinshilaatee imhakwaarna aree itigwꞌideek han, baruuh tishinshila katꞌi. Aree aajin barooh umingaay beeti salooliin.
30Yasuuꞌa ootak raatiya, “Oosmook aab iyadna?” idi.
Utakiib gwida jin shuumaabayt, baruuh “Oosmu ‘Gwidaab’ iyadnaheeb.” idi. 31Aan aajin Yasuuꞌaab doorka irmidniit inꞌalna, oodi shuumaana biidiyeet toona hooy yhariwna.
32Beentooy oorbaay kehii ikwiir gwida khansireet dirimt iifiin. Aajin ikhansireeb shuumiini jillaay wꞌidin iniiweet toona Yasuuꞌiib winneet yhariwna. Aree Yasuuꞌa bareeh wꞌidin yhii. 33Aajin ootakii ifirꞌanihoob, ikhansireeb shuumiyaan. Aree ikhansireet dirimt igidiyeesooh dhaabiyaaniit, oorbaay shidhꞌaayii igidehana aree whoodhiib tikwiyaaniit bareeh aayam iyheen.
34Ikhansireega beet toona tutikeet rhiyaanihoob, willa tumadiinaawwa tidirꞌaawwa beeti dhaabiyaaniit usakana hadiidiyaan. 35Uudehay kassaah beet toona tutikeet rhiini jillaay ifirꞌana. Baraah Yasuuꞌii dehaay eeyaanihoob, ootak aajin hooy giigaa, Yasuuꞌiib iragadaayi geeb sꞌee, akwaay akay whaaluuh shibooba imriin. Aree baraah winneet irkwiin. 36Beet toona rhaa iifiin baliin, ootak aajin abkaab iiktiineeb kak inꞌireet toona oodehay sooyaan. 37Malya Jaraasiineeb whaashi dehay kassaah winneet mirkwaay hooy daayaabuuyt, baraah Yasuuꞌa hooy giigiyeet toona raatiyaan. Aflaay Yasuuꞌa tufalluuka yꞌamaayt giigiya.
38Aajin hooy farꞌa iiktiineeb uutak Yasuuꞌiib winneet yhariw, “Geebook giigsaaheeb.” idi. Laakiin Yasuuꞌa iribaayt, bariiyooh dehaay, 39“Ugawook beeti agara! Ukwaasana dehook sakiyaneet toona hadiida!” idi. Aflaay uutak Yasuuꞌa dehaay idꞌiyeet toona kastooh tumadiinaatii dehaay hadiidiya.
Ayaat Ootwa Lhaat Takatwa
40Oontꞌa Yasuuꞌa yꞌagarihoob, gwida dehay bariiyooh wꞌaay yhigitnayt, baraah barooh daayiib yꞌashishna. 41Malya Yaayiirus iidni tak Iyahuudi diini gawi suurkina eeya. Baruuh eeyaayt Yasuuꞌiib iragada suurii dhibiya, aree bariiyooh oogaw geeb iibiyeet toona winneet hooy yhariw. 42Baruuh tamna malu hawla tiibriit gaalalaayt ootuuh amshaat tiifi.
Yasuuꞌa usalaliib sakiyeet midda, uudehay igwida bariiyooh kehii tuusamiyaan. 43Aree beentooy takat lhaat, tamna malu hawlaayeeka booy tiitfaf tiifi. Tuun batuuh kasseeh imhallagaayeeh hakiimaayi mheeliib giigsaati. Laakiin gaal han adgiraa batooh sinꞌiraab kiiki. 44Tutakat Yasuuꞌi harꞌiisii eetaayt, bariiyooh whalakiit shinki tehita. Igidiyeesooh uubooy hooy ingad.
45Yasuuꞌa raatiya, “Aaw tehiyaheeb?” idi. Tak fidhadhat iribhoob, Bitrus “Seednaay, uudehay kwalaleeka aree hook tuusameen.” idi.
46Laakiin Yasuuꞌa, “Aadami gaal tehiyaheeb, yꞌakrir hoosu ifirꞌaneet toona hissiyan.” idi.
47Malya tutakat tunaatuuh lawtaneet toona tikanihoob, idhee eetaayt, Yasuuꞌii suurii dhibta. Kassooh oodehayi suurii Yasuuꞌaab tehitaneet toona hadiidta. Aree kak igidiyeesooh tinꞌireet toona han hadiidta. 48Malya Yasuuꞌa tootakatii dehaay, “Yaa tꞌoorii, wꞌiimaanuuk mheeliya hooki, asgaa giigii!” idi.
49Yasuuꞌa masi bhaliiyee, Yaayiirus, Iyahuudi diini gawi suurkina iiktiinaay ugawii gaal eeya. Baruuh “Tꞌootuuk tiya. Seednaab shaawti baagallabaa!” idi.
50Yasuuꞌa een ibhali imaasiwihoob, Yaayiirusii dehaay, “Baarakwiya, aamana nuun! Tꞌootuuk iinꞌir tindi.” idi.
51Yasuuꞌa Yaayiirusiib oogaw iktimihoob, baruuh Bitruswa, Yuuhannaawwa, Yaaguubwa, tꞌooti baabaawwa, tꞌootiit deewwa nuun, gaal han geebooh shuumsaab kiiki. 52Beenhoob kassuuh uudehay tꞌoor waawiina aree nawwaatiin. Yasuuꞌa “Baawaawaana! Tꞌoor ayaat kitti, laakiin diwtini.” idi.
53Baraah bariiyooh ifaayidna. Tꞌoor ayaat tiiktiyeet toona kanaa iifiin. 54Laakiin Yasuuꞌa tꞌooti wꞌayi yꞌabikaayt “Tꞌootuunay, yakii!” idi. 55Tꞌoor ishuukaah dehaay yꞌagarna, igidiyeesooh yakta. Malya Yasuuꞌa batooh naat mꞌariit iyawneet toona bareeh sooya. 56Tꞌooti faru winneet ajjabamiyaan. Laakiin Yasuuꞌa beet toona tutikeet gaal han biisooyayneet toona bareeh sooya.
Currently Selected:
Luugaay W'injiil 8: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
