Mattaay 23
23
Yasuuꞌa Ifariisiiwwa whaggi koojaawwa winneet sooya
1Malya Yasuuꞌa oodehay igwidaabwa ikwiriyaatayeehwa dehaay, 2“Ifariisiiwwa whaggi kooja Muusaay ukwirsi kehii thatheen. 3Aflaay baraak ibakii bareeh sinaakirna, aree baraah sooyeeneet toona kastooh dꞌiina. Laakiin baraah idꞌaneet toona baadꞌiina, toona baraah bhaliiyeeneet aakna haay kashagaamiyaan. 4Baraah akra rabi haakwirtiit oodehayi harkaayi kehii daaseen. Laakiin baraah aakna irabi hantaaysiti jillaay, giibalaaytoohna han kehii daastiib kiihariwna.
5Baraah sakeeneet toona kastooh oodehayi rhistiib sakeen. Baraah sanduuk iktabeet aaya hooy idꞌaneeb shagaameena, yꞌayeehwa igirmaayeehwa kehii eetkwiina, aree yhalaka isgwamiidna. 6Baraah whamooysiti mhiin tꞌaduumaateeb areeyeena, aree Iyahuudi diini gawaayeeb tidaayiit miisꞌanii areeyeen. 7Isuugi mhiinaneeb salaamameeneet areeyeena, ‘Seedna, Seedna’ ittiyoodiineet areeyeen.
8Laakiin baraak ‘Seedna’ waliikami kitdiina. Baraak gaal Ankwana tibariina, kassaak aree sanaabaana. 9Tubuuti kehii gaal han, ‘Baaba’ baadiina. Baraak gaal Baaba tibariina, aree baruuh tibreeteeb eefi. 10Gaal han bareek, ‘Seedna’ iyaad hookna kiidi. Baraak gaal Seedna tibariina, aree baruuh Umasiih ikati. 11Hookna uuwinkaab, eeraw shagaamiiniib iikti indi. 12Ugarooyooh tageegsiiniib been dhoomi indi, ugarooyooh dhoomsiiniib been aree tageegi indi.
13Baraak whaggi koojaawwa Ifariisiiwwa, tidhikwna, baraak yharay ar! Baraak tibreeteet hadꞌaayi oodehayi fiireeb assitaana. Baraak iknaayaakna shuumi kitdiina, baliib ishuumti yhariw aree baraak tehabiina. 14Tidhikwna baraak whaggi koojaawwa Ifariisiiwwa, baraak yharay ar! Tꞌibraatfaatkiyaati gawa shuumteena, aree oodehayi rhistiib toosileel tisgwamiidna. Shaawti baraak winneet amaag jasaami tiyadna.
15Tidhikwna whaggi koojaawwa Ifariisiiwwa, baraak yharay ar! Oobhari kehiiwwa toobuuti kehiiwwa iibaabteena, gaal tak udiinooh sibadlooyti jillaay sakteena. Baruuh gaal ikatiyihoob aree malu doora tunꞌeeti oor bareek tꞌiiteeb tikwasiina.
16Tidhikwna baraak yhamashayaayi maalhiiga! Gaal Ukwaasanaay gawii halafooyiiniyeek, naat kitti miyaadi. Laakiin gaal udiini gawi dimꞌaraay halafooyiiniyeek, baruuh tehalafooytiisooh itꞌabiik. 17Baraak yhamashaya yꞌafraya! Keeya winkaabu: idimꞌara han Ukwaasanaay uugaw idimꞌara mugaddas ikwasiib? 18Baraak masi, ‘Tikaraamaati mhiinii gaal han halafooyiiniyeek, naat kitti miyaadi. Laakiin bariiyooh kehii eefeent tikaraamaatee halafooyiiniyeek, tehalafooytiisooh itꞌabiik.’ tiyadna. 19Baraak aanda yhamashaya! Keeya winkaabu: uumyaaw han tari tikaraamaati mhiin oomyaaw mugaddas ikwasiib? 20Shaawti been tikaraamaati mhiinii halafooyiiniib, tikaraamaati mhiinii halafooyiini, aree bariiyooh kehii teefeet toona kastooh haay halafooyiini. 21Aree Ukwaasanaay ugawii halafooyiiniib, bariisooh halafooyiini, aree Ukwaasana tehooyteeb kwarriib han haay halafooyiini. 22Aree tibreetee halafooyiiniib, Ukwaasanaayt tehadꞌaayi han haay halafooyiini, aree batiiyooh kehii eestꞌi han haay halafooyiini.
23Tidhikwna baraak whaggi koojaawwa Ifariisiiwwa, baraak yharay ar! Baraak buuhaaraateekna; inaanꞌaawwa, tikasbaraawwa, ikammuunwa, een bareeh titamnaat takwi hooy tiyawna. Laakiin daayikaana whaggiib tiribna; wꞌadilwa, tirhamaawwa, wꞌiimaanwa, tiribna. Een bareeh haay shagaamtiineet toonaatu, eeraw han bitꞌiishneet toonaati. 24Baraak yhamashayaayi maalhiiga! Iyamee itiifa tifarꞌana, laakiin kaam tikwatꞌana.
25Tidhikwna whaggi koojaawwa Ifariisiiwwa, baraak yharay ar! Baraak tikwibbaaywa ooshhaanwa tisarad tisinhiisna. Laakiin tehooyteeb aree maagtwa akuushwa ataba. 26Ifariisi yhamashaya! Hankaab tikwibbaaywa ooshhaaniit tehooy sinhasna, malya tisarat iinhas iyadna.
27Tidhikwna whaggi koojaawwa Ifariisiiwwa, baraak yharay ar! Baraak eeraama miimash tusaraat daawriit tikatiyeeb, laakiin tehooy aya dehayiit miitatwa nhas baakayt teenaawwa, ataab umiimash tꞌiiteebaana. 28Oontꞌaaneet, tisarattee oodehayii dehaay tishboobiina, laakiin tehooytaakna haraabwa maagtwa atabta.
29Tidhikwna whaggi koojaawwa Ifariisiiwwa, baraak yharay ar! Baraak inabiyaayee dehaay miimashaab teedꞌirna, aree shibu dehayi miimasha daawrariisteena. 30Aree baraak ‘Hoobeeyeen idamaneeb kwiraab niiktiyeek, inabiya daartiit booy kinfif.’ tiyadna. 31Aflaay ugarooyookna kehii tibadehana, baraak baliib inabiya idaar areehna tikatiina. 32Aflaay hoobaakna badooyaaneet toomaag soorarimna!
33Baraak ikwakwara, ikwakwaraayi ar! Toonꞌeeti ishuumti baraak kak hooy ifuur tiyadna? 34Shaawti, ani nabiyaawwa, fagarandaawwa, whaggi koojaawwa, dehookna afandiig. Gal bareesooh baraak idaar tiyadna, sallabi tiyadna. Warib aree Iyahuudi diini gawaayeeb iithibꞌa tiyadna, aree madiinaat madiinaatii bareeh isaakw tiyadna. 35Shaawti oodehay eeshbooni booy tubuuti kehii ifaf kassuuh kehookna daayi indi. Eeshbooni booy; Haabiilii Sakariyaab Barakhiyaay oor baraak Ukwaasanaay oogawwa tikaraamaati mhiinwa eebtik tidirneeb hadiit ifaf uubooy kehookna eefi. 36Ani oosdik andi hookna, kastuuh tuun tuuna oon udamaani dehayi kehii daayi tindi.” idi.
37Yasuuꞌa “Yaa Algudus! Algudus, batuuk inabiya tidaarii aree idiigwatkina batiiyook dehaay diigwatamiyaab rajamootaayii. Wꞌambuuriyooh whii inisrikaayeeh tismarriit tookilaaytiit, ani diimaab udehayook asmarriyeet aharriiw, laakiin batuuk tiribii. 38Shibibna, Oontꞌa ugawuukna mingaayama dehookna imhi. 39Andi hookna, baraakna ‘Wꞌankwanaay oosmii yꞌiiniib been baarakamaabu!’ tiyadneeb hadiit masi rhiheeb kitdiin.” idi.
Currently Selected:
Mattaay 23: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
