Mattaay 24
24
Tuduniyaati agiyaayt alaama
1Yasuuꞌa Ukwaasanaay gawii giigiyaayt usalaliib hiireeree, ikwiriyaatayaah bariiyooh dehaay eeyaaniit, udiini gaw abniimaab iiktiyeeb eebna shibuub hooy yhariwna. 2Yasuuꞌa raatiya, “Teen teena kasteeh rhiteena? Oosdik andi hookna: tooy awi gaal han uraawi kehii ituuꞌish kiidi; yꞌawi kassaah nꞌati dhadhibi iyadna.” idi.
3Yasuuꞌa oorba Saytuuni kehii iisitꞌihoob, ikwiriyaatay oodꞌooh dehaay eeyaaniit, “Sooyaa hoon, tuun tuuna nhoob iikti tindi? Bariiyook wꞌaayiib naat alaama iikti iyadna? Tuduniyaati agiya aree?” idiin.
4Yasuuꞌa igwibi, “Gaal han biitil hookna, gwꞌadna. 5Aniib oosmii gwida yꞌi iyadna, ‘Ani Umasiih akati.’ iyadna, aree gwidaab eetilna. 6Baraak finaabwa finaay sakanaawwa iimsaw tiyadna. Laakiin baahasiikna, taan taana ibakii ikatiin. Laakiin tuduniyaati agiya masi yꞌiini. 7Haashka haash weer imuuthꞌa indi, whadꞌaaka whadꞌa ooraaw iithꞌa indi. Hargwiitwa, buutiit mibꞌeestwa iikti iyadna. 8Taan taana kastaah oofraayiit tilhanayti hankaay badooyeen ikatiin.
9Malya bareek haakamamiit titoodiirni jillaay nuuni hookna iyadna. Aree anii sabii kassaah uudehay iirib hookna iyadna. 10Been oodoor gwida dehay wꞌiimaanii itꞌigir iyadna, baraah taktak suugi iyadna, aree taktak iirib iyadna. 11Aree gwida gwisri nabiya lawi iyadna, aree gwida dehay iitlis iyadna. 12Tuumaag gwidaat tikatiyi sabbii, gwida dehay ooreer hooy lalꞌi iyadna. 13Laakiin wꞌagiya ookiik akraa ingadiibka iidhhan indi. 14Uun tehadꞌaayeeti usakana udaayi kastooh tuduniyaatiib hadiidami indi, kasseeh yhasheeb aree badehaat iikti indi. Malya tuduniyaati agiya iikti indi.
15Yint gaat shingiraana Unabi Daanꞌeel haay hadiidiyeet rhi tiyadna. Batuuh oomhiin umugaddasiib iikti tindi, (oodehay agriisaana afhisaana!) 16Malya baliin Yahuudaay eefeen ibakii eerba ookiik ifooriin. 17Ugawiyooh kehii daayiiniib uutak, naati miyaayi jillaay nꞌati biitikwayeet toonaati. 18Tidirꞌaateeb daayiiniib halakaayi harawaay baaꞌagaarna. 19Baliin eembꞌi tinakwalayaawwa, yꞌareet dꞌooranaawwa idhikwna. 20Idhabaakna oowiyaay door tari sabtiit yint biiꞌakaayni jillaay siileelaana. 21Malya been oodoor akra gwirha iikti iyadna. Baliin igwirha tuduniya akhligamtaneekka oontꞌa ookiik bareeh tꞌiiti gwirha daayaab kiikeen. Masi harꞌook han iikti kiidiin. 22Laakiin Ukwaasana suur akay baliit tiyina isnakwis; baruuh sinakwisaab biikaayeek aree, gaal han kiidhhan. Baruuh udehayooh iwaasamaayi jillaay tiyina isnikwis indi. 23Beenhoob gaal han, ‘Shibibna, Umasiih tooy eefi!’ Tari ‘Baruuh beentooy eefi!’ indiyuukna, baaꞌaamanaana. 24Gwisri masiihiyaawwa gwisri nabiyaawwa lawi iyadna. Baraah wawint alaama iikwsi iyadna, adgireeneek, oodehay kasseeh iwaasamaab ikatiineek han iitil iyadna. 25Aflaay shibibna, tuun tuuna akaat baakaay whankaay sooyan hookna.
26Shaawti gaal han sooyiiniyuukna, ‘Baruuh beentooy umingaayiib eefi.’ indiyuukna, baafirꞌana. Tari ‘Baruuh uun ikati, ugawiit tehooyteeb eefi.’ indiyuukna, baaꞌaamanaana. 27Utalaw oomhii talawiiniib uyindhib han yꞌasiini. Wꞌaadami Oori wꞌaay han bak iikti indi. 28Misuusinnaayt daatiniyeeb oomhiin ikwiikwꞌay kehii kwimeen.
29Baliit teeyina, baliin igwirhaayi harꞌii,
tuuyin thibnami tindi,
aree tuutrig unuurooh buubsi kitdi.
Yhayikw tibreetee dhadhibi iyadna.
Tibreeteeb eefeent taana digami iyadna.
30Beet tooyin Wꞌaadami Ooriit alaama tibreeteeb lawi tindi. Kastaah tubuutiit gabiila gadabi iyadna. Baraah Wꞌaadami Oor tibreetee bꞌaluukiib akrirwa matuunwa barii yꞌee rhi iyadna. 31Uudꞌa uuwin fuufami indi, aree baruuh tubuutiit teejha tifadhig ookiik imalakeeh iifdig indi. Baraah bariiyooh oodehay iwaasama tuduniyaati agiya gaalnaay ooraaw ookiik iidbil iyadna. 32Oon udaris aree utiini hindii kanna: utiini hindi lꞌiid nꞌakw ikati, aree taarat itfarꞌaneek, tehibi dawilt tikatiyeet toona kanna. 33Baraakna han taan taana akee rhiteenihoob, uudoor dawilu, udheefa katim ikatiyeet toona kanna! 34Ani oosdik andi hookna: uun uutaas taan taana ikatiineeb ookiik iiyyi kiidiin. 35Tuubuutwa taabreewwa iyaayiina, laakiin aniib ibhali door han iiyyi kiidiin.
Uumbꞌeewwa tuusꞌaawwa atookakinaab kiikeen
36Been uumbꞌi tari tuusꞌa naadoor iikti tindiyeeb imalak itibreeteeb kiikanna, Wꞌoor han kiikan. Laakiin Ubaaba uubhaat ikteen. 37Noohiib udamaaniib tiifiit tunaatiit, aflaay Wꞌaadami Oori wꞌaayiib han bak iikti tindi. 38Nooh falluukaat yꞌameeb hadiit, ukwaani hankaay iifiin eembꞌi, uudehay tamiina, gwꞌiina, iidꞌirna aree isidꞌirna. 39Bareeh kasseeh uukwaan eeyaayt iyhaneeb ookiik, naan iikti tiideeb kanaab kiikeen. Beet tuuna aree Wꞌaadami Oor yꞌiiniyeeb oodoor bak iikti tindi. 40Malu da tudirꞌaatiib daayeen, gaal yakami indi, uuraaw aree ituuꞌish indi. 41Maloot mꞌat hiddaab harroob riyaatiib huugi iyadna, gaat yakami tindi, tuuraaw aree ituuꞌish tindi.
42Aflaay Wꞌankwanaayuukna naadoor yꞌiiniyeeb kitkannayt, baraak gwꞌadna. 43Laakiin toon toona afhamaana: ugawikina whawaadiib ugwihara toosꞌa keetaat yꞌiiniyeeb ikteeniyeek, gwꞌadee naayiini. Malya ugawooh kiisigwihar. 44Aflaay Wꞌaadami Oor baraak bitsꞌayaamayni door han yꞌiini akay, ibakii marna.
45Aflaay ukishiya wꞌiimaan ibariibwa ufagarwa aabu? Uun baruuh ukishiya wꞌankwana ugawiyeeh kishiya eeraw sꞌabiktiit, timꞌari udooriyooh dehaay iniiw ikati. 46Been wꞌankwanaayuuh itꞌagiirihoob, bak sakee marriyeeb ukishiya, daayiina dehaay iikti tindi. 47Ani oosdik andi hookna: wꞌankwanaayuuh barooh umraayooh kassooh barooh isꞌibik indi. 48Laakiin ukishiya amaag ikatiyeek, aree ugarooyooh dehaay, ‘Aniib wꞌankwana idleeli, willa itꞌigir kiidi.’ indiyeek, 49aree malya baruuh ikishiya yꞌaraweeh eethibꞌeek, yhaab gwꞌanaayi geeb tamiiniyeekwa gwꞌiiniyeekwa, 50been ukishiyaay ankwana baruuh biisꞌayaamayi door yꞌiini. Aree baruuh biikaaneet saaꞌaatiib yꞌiini. 51Baruuh ukishiya katꞌiit riftat iikwasi indi. Malya barooh yharay ari geeb daasi indi. Beentooy aree baruuh waawi indi, ugirmaayooh toobuut haay iithꞌa indi.” idi Yasuuꞌa.
Currently Selected:
Mattaay 24: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
