Mattaay 25
25
Tamint aagiraati mitaal
1Yasuuꞌa “Beet tooyin tibreeteet hadꞌaayi, baliit lambaateehna yakisiyaaniit udooba yꞌishishni jillaay ifirꞌat tꞌaagira titamin tꞌiiteena iikti tindi. 2Bataah ayt afreeyaana, aree ayt fagaraamiyaan. 3Tꞌaagira tꞌafreeyaant lambaateehna yakisiyaana laakiin saliit naat han geeboohna yaksaat kiikeen. 4Laakiin tꞌaagira tifagaramiyaant saliit karooraateeb yakisiyaana, tilambaateehna han geeb yakisiyaan. 5Udooba yꞌee idleel, aree bataah kastaah hanꞌaariyaaniit diwiyaan.
6Whawaadi tarabeeb tageegsiyaani waliikiyaana, ‘Udooba uun ikati! Mꞌaana barooh ashishna!’ idiin.
7Tꞌaagira kastaah ibꞌarniit tilambaateehna isoomirna. 8Tꞌaagira tꞌafreeyaant tifagarnaatee dehaay, ‘Usaliitookna naat hooy hiina hoon, tilambaataan iiyaan.’ idiin.
9Tꞌaagira tifagaramiyaant, ‘Abadan, hininwa bateekwa kasteen kamhiyaan hoon. Shaawti usaliit eedliib baliib beenaat naat igarooyeekna dehaay dilibna.’ idiin.
10Laakiin bataah saliiti dalabii dehaay giigiinihoob, udooba eeya. Tꞌaagira tꞌamart udiraariit aduuma ookiik barooh iramna. Malya udheefa assamiya.
11Malya taaraw han eeyaaniit, ‘Seedna, Seedna, udheefa dehoon nigila!’ idiin.
12Baruuh ‘Oosdik andi hookna: ani kaakan hookna.’ idi.
13Aflaay oombꞌi tari toosꞌa kitkanna akay daayiib gwꞌadna.” idi Yasuuꞌa.
Mhay kishiyaayi mitaal
14Yasuuꞌa “Masi batuuh ootak wꞌiibaabiiniib tꞌiiteeti. Baruuh ikishiyaayeeh waliikiyaayt, igadhꞌeeh bareeh dehaay aamaniya. 15Ikishiyaayeeb gaal ay mhallaga ashteetiib nuuniya. Weer aree maloob nuuniya, umhaya gaal nuuniya. Baruuh gaalka toona tꞌadgiriiniyeet nuuniyaayt, malya tꞌiibaabtooh isoorarim. 16Uutak ay mhallaga ashteetiib nuunamiya igidiyeesooh giigiya. Malya imhallagaayeeh daasiyaayt shagaamiya, masi ay mhallaga aree rayiimiya. 17Ukishiya imhallaga imalu nuunamiyaab han masi maloob rayiimiya. 18Laakiin uutak gaal ashteeti mhallaga nuunamiyaab naat anu giigiya. Baruuh deelaab whaashiib ifrikayt, wꞌankwanaayeeh imhallaga hooy dhꞌishiya.
19Gwimad damaani harꞌii, een ikishiyaayi ankwana yꞌagar eeyaayt bareeh haasabiya. 20Uutak yꞌay mhallaga nuunamiyaab, ay mhallaga warib haay eeyaayt, ‘Duuruun, baruuk ay mhallaga nuuntaaheeb. Shibiba, ani ay mhallaga warib rayiiman.’ idi.
21Bariiyuuh wꞌankwana igwibi, ‘Daayiib tiweera, baruuk daayi kishiya iimaan tibariya. Baruuk shalik naateeb aamanan hook, shaawti gwidaana isꞌibik hook andi. Mꞌaa aree wꞌankwanaayook geeb afirhaa!’ idi.
22Uutak malu mhallagaayi han eeyaayt, ‘Wꞌankwanaay, baruuk malu mhallagaayeeb aamantaaheeb, shibiba, ani maloob warib rayiiman.’ idi.
23Bariiyuuh wꞌankwana igwibi, ‘Daayiib tiweera, baruuk daayi kishiya iimaan tibariya. Baruuk shalik naateeb aamanan hook, shaawti gwidaana isꞌibik hook andi. Mꞌaa aree wꞌankwanaayook geeb afirhaa!’ idi.
24Malya uutak gaal imhallagaayee nuunamiyaab eeyaayt, ‘Wꞌankwanaay, baruuk akra tak tikatiyeet toona akteen, baruuk teeraayaab bitkaayeet dirꞌaati waak harriiwa, birraab bitkaayi teera danbiileet harriiwa. 25Aflaay arkwiit barraab afirꞌa, aree imhallagaayeek whaashiib abis. Shibiba, aan aree bariiyeeka.’ idi.
26Bariiyuuh wꞌankwana igwibi, ‘Baruuk amaagwa, hasra kishiyaawwa! Aflaay ani teeraayaab baakaayeet dirꞌa anwiikeet toona tikana, aree sibidaab baakaayi teeraay harroob adanbiileet toona tikana? 27Aflaay daayiitu, aniib imhallaga ubanki kinaayi geeb daasaa. Ani atꞌagiirihoob, imhallagaayi maksab iyaay andi.
28Oon barooh imhallaga hooy ahaanaat, itamin mhallaga ibariib hiina. 29Uutak wꞌibari, gwidakaana ittiyiw indi, aree gwidaana ibariib iikti indi. Naat baabariib aree, tuuna baruuh ibariyeet han hooy giigi tindi. 30Been ukishiya tutakweet baabari uthibniib gidna. Baruuh beentooy waawi indi, aree ugirmaayiisooh toobuut iithꞌa indi.’ idi.
Tꞌanoowwa teeyaawwa
31Wꞌaadami Oor umatuuniisooh yꞌiiniyihoob, imalak kassaah geeb yꞌeen. Baruuh tibreeti matuuniib tehadꞌaayeetiyooh iistꞌa indi. 32Uudehay kassaah bariiyooh suurii itdibil iyadna. Ushakwa tꞌanu tiyaatee wawaasiiniib tꞌiiteena, baruuh han oodehay gaal uraawiika wawaasi indi. 33Baruuh tꞌanu umaygwadiyooh daasi indi, aree teeya utarhagwadiyooh daasi indi.
34Malya whadꞌa bariiyooh umaygwadiib eefeen baliinee dehaay, ‘Mꞌaana, aniib Ubaaba baarakaab ikatiyeeb baliin, tikwasaateekna ahaana. Tuduniya akhligamtaneekka tehadꞌaayi dehookna amaarti. 35Ani aharagw, aree baraak tamiyeet mꞌari tehiinaheeb, ani aywi, aree baraak naat yam gwꞌastaanaheeb. Ani girbaab iikti, aree baraak tehooyteekna shuumsitaanaheeb. 36Ani halakaab ashinha, aree baraak tistookwnaheeb, ani lhan, aree baraak timshabaabnaheeb. Ani sijniib iifi, aree baraak usijniib eetaanaheeb.’ indi.
37Malya uudehay aashbu bariiyooh dehaay igwaab iyadna, ‘Wꞌankwanaay, hinin barook naadoor hargwaa rhinaayt hook tamisna hook? Tari baruuk yam yaweeb akay nhoob gwꞌasna hook? 38Hinin barook naadoor girbaab akay tehooyteen shuumisna hook? Tari halakaab shinhaa nhoob nistookw hook? 39Nhoob barook lhaa rhina hook? Tari nhoob aree usijneeb rhinaayt hook malya eena hook?’ iyadna.
40Whadꞌa bareeyooh dehaay igwaab indi, ‘Ani oosdik andi hookna: een isanaayi idabalooyaayeeb gaalnaay dehaay naat tidꞌaneek, anii dehaay han dꞌiyaabaana.’ indi.
41Malya baruuh een bariiyooh utarhagwadiib eefeen baliinee dehaay, ‘Hoosu sigiina, baraak atooꞌitaabaana, oobliiswa imalakeeyoohwa dehaay atoomraat toonꞌi tudaayim shuumaana. 42Ani aharagw, aree baraak mꞌariit naat han tamsaayi kitteena. Ani aywi, aree baraak yam naat han gwꞌasaayi kitteena. 43Ani girbaa iifi, aree baraak tehooyteekna shuumsaayi kitteena. Ani halakaab ashinha, baraak halakaab sitookwaayi kitteena. Ani lhaa iifi, aree sijniib iifi, aree baraak amshabbaayi kitteena.’ indi.
44Baraah han bariiyooh dehaay igwaab iyadna, ‘Wꞌankwanaay, hinin nhoob barook hargwaa tari yawee rhina hook? Tari baruuk halakaab shinhaa tari lhaa, tari sijniib haayee, nhoob rhinaayt hook amshabbaayeek kinki?’ iyadna.
45Baruuh han ‘Ani oosdik andi hookna, een bareeh idabalooya gaalnaay dehaay han dꞌiyaab bitkaayneet toona, anii dehaay han kitdꞌiina.’ indi.
46Malya baraah ujasa udaayim iibi iyadna, laakiin uudehay aashbu umidhhan udaayim iibi iyadna.” idi Yasuuꞌa.
Currently Selected:
Mattaay 25: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
