1 कुरिन्थी 12
12
पबितर आतमा रअः बराकाईत
1ए बोको बोयहाकु, ईङ चहाईङ ची आपे आतमा रेनअः बराकाईत रअः बारे रे बेस केन पड़ीपे। 2जब आपे एटाअ जाईत थिनापे, हिमीन बेरा एता लकान जिनगी जिवीडोः केनापे के आपे खुद पड़ीआपे, जाहें आपे के गुंगा मुरती रअः तयोम रे चलाअ लःअय अगवाई पेकेनाय। आउर आपे आःड थिनापे। 3हिना लःअय ईङ आपे के बेताअः दिपीईङ, ची परमेसर आतमा पखा तरअः क-कंहड़ीकु “ईसु के भाख लगाव जुनोः” नोकान काकु कंहड़ीया। आउर पबितर आतमा रअः अगवाई तरअः गी कंहड़ी सकायाकु, ची “ईसु गी परभु हेके।”
4 #
रोमी 12:6–8
पबितर आतमा रेनअः बरदान एटाअ-एटाअ भेटाव ताना। बकिर आतमा मियांड ठुकाआय। 5हिंकान गी सेवा दो काईक बरन रेनअः हुयाआ, बकिर परभु मियांड ठुका इदानियाँ। 6काम धंधा दो काईक बरन रेनअः कामीयाबु, बकिर परमेसर गी जामाकु के कामी लःअय सवांग एमेआय, हुनी परमेसर दो मियांड ठुका गी इदानियाँ।
7जामाकु के, एटाअकु आला भलाई लःअय पबितर आतमा रअः बराकाईत भेटाव ताना। 8एता लःअय ची मिहोंड़ के पबितर आतमा पखी तरअः बुधी रअः खभाईर भेटाव ताना, आउर एटाअ के हिना आतमा तरअः हिकान गी गेयान रअः खभाईर भेटाव ताना। 9हिना पबितर आतमा तरअः थोड़ेक होड़कु के बिसवास रअः, आउर थोड़ेक होड़कु के बेमराहाकु के च-चंगा लःअय बरदान भेटाव ताना। 10फिन थोड़ेक के समरथ क-कामी लःअय बराकाईत आउर थोड़ेक के परमेसर पखा तरअः उउदूः लःअय बराकाईत, आउर थोड़ेक होड़ के आतमा के प-परखाव लःअय, आउर थोड़ेक होड़ के एटाअ-एटाअ भाखा रे क-कंहड़ी लःअय बराकाईत, आउर थोड़ेक होड़ के दो भाखा रेनअः माने के उउदूः लःअय बराकाईत भेटाव ताना। 11आउर नोःआँ जामा कामी हिनी मियांड पबितर आतमा रअः चलते हुयाआ, हुनी अपन मरजी मोताबिक जामाकु के एटाअ-एटाअ बराकाईत एमेआय।
मियांड होड़ो काईको अंग
12 #
रोमी 12:4,5 एता लःअय ची जे लकान मनवा आला होड़ो मियांड एदनाआ, बकिर एटाअ-एटाअ अंग एदनाआ। आउर होना अंग एटाअ-एटाअ एदनाआ सेरे होः मियांड रे मिलाव केते मियांड होड़ो बनाव उना एदनाआ। हिना लकान गी ख्रीस्त आला होड़ो होः मियांड गी एदनाआ।
जामा तरअः बढ़ियाँ एदनाआ ची आबु जामाकु लोः पेरेमेपे
13आबु जाहुदी ताहिनबु चाहे एटाअ जाईत बंधाउवा ताहिनबु चाहे निछुंद लिनकु, आबु जामा के मियांड ठुका होड़ो बनाअः लःअय, मियांड ठुका आतमा तरअः बतिस्मा एम लअः एदनाआ, आउर आबु जामे के मियांड ठुका आतमा भेटाव ताना।
14नहाअः नेलेपे मनवा आला होड़ो होः दो मियांड ठुका अंग तरअः का-बनाव ताना, बकिर होना रे ढेर अंग एदनाआ। 15जदि जांगा कंहड़ीआय ची, “ईङ तीः नलागे, हिना लःअय होड़ो रेनअः अंग नलागे,” दो एतान नोःआँ चलते होना होड़ो रेनअः अंग नलागे? 16हिना लकान जदि लुतूर कंहड़ीआय ची “ईङ मेःड नलागे, हिना लःअय होड़ो रेनअः अंग नलागे” दो नोःआँ चलते होना होड़ो रेनअः अंग नलागे? 17जदि आबु आला जामा होड़ो मेःड गी ताही कोआ दो, आबु इरबु आयुम दाड़ी केआ। हिना लकान आबु आला जामा होड़ो लुतूर गी ताही कोआ दो आबु इरबु सुंघाव दड़ीआ? 18बकिर सही माने रे, परमेसर जामा अंग के अपन मरजी मोताबिक होड़ो रे मि-मियांड अंग के अपन-अपन ठाँव रे दोहो तदाय। 19जदि होना जामा अंग मियांड ठुका अंग ताही कोआ दो होड़ो ओकाःड़े ताही कोआ? 20बकिर ढेर अंग एदनाआ, सेरे होः होड़ो मियांड ठुका हुयाआ।
21मेःड तीः तरअः एरे कंहड़ी सकाया ची “ईङ के आम रेनअः दारकार कनोआँ” आउर बोहोअ जांगा तरअः “ईङ के आम रअः दारकार कनोआँ” एरे कंहड़ी सकाया। 22बकिर होड़ो रअः जे अंग कमजोर नेलोआ, हिना रेनअः जादे दारकार हुयाआ। 23होड़ो रेनअः जे अंग के आबु थोड़हे मान-मारजाईद समझाआबु, होना रेनअः जादे आबु धेयान एमेआबु, आउर जे अंग के आबु काबु देखाया, हिना के गेन्दरअ तरअः डबायाबु। 24बकिर होड़ो रअः जे अंग के देखाव सकायाबु होना के गेन्दरअ तरअः डडबाव रअः दरकार कनोआँ। बकिर परमेसर आबु आला अंग के नोकान बनाव तदाय, जे अंग के जादे माईनेआबु हिना अंग के बेस केन मरजाईद भेटाअः। 25जेकर से ची होड़ो रे जहान फुट आलु हुयाव कोअ, बकिर होड़ो रेनअः अंग हुनी-नुई आला बराबईर धेयान दोहोय। 26जदि होड़ो रअः मियांड अंग के दुख भेटाआ, दो होना लोः होड़ो रेनअः जामा अंग दुखोआ। जदि मियांड अंग के बड़ाई भेटाआ दो होना लोः जामा अंग खुसी मनायाय।
27निआँ लकान आपे जामा मिलाव केते, ख्रीस्त आला होड़ो हेके, आउर आपे मेसे जामे झन हुनी आला अंग हेके। 28#इफि 4:11कलीसिया रे परमेसर एटाअ-एटाअ होड़ के ठहराव तादकुआय, पहिल रे प्रेरितकु के, दुसरा रे आगमजानीकु के। तीसरा रे उपदेस एमोः कु के, फिन समरथ काम का-कामीकु के फिन च-चंगा लःअय बरदान, फिन हुंकू के जे भ-भलाईया कु के ठहराव तदकुआय, फिन कलीसिया रअः कामी रे अ-आगवाई कु के, आउर हुंकू के बरने-बरन रअः भाखा क-कंहड़ीकु के। 29हिना लःअय जामे प्रेरित काकु ताहिनोआँ, जामा आगमजानीकु काकु ताहिनोआँ। हिना लकान परमेसर आला बचन सि-सिखावकु काकु ताहिनोआँ। जामाकु समरथ कामी वाला काकु ताहिनोआँ। 30एतान जामे के च-चंगा रअः बरदान भेटाव ताना? जामा एटाअ भाखा कंहड़ीआ? जामा भाखा रअः माने उउदूः वाला ताहिनोआँ? 31निआँ लःअय ची आपे पबितर आतमा आला एम लअः बरदान रे, जामा तरअः बड़े बराकाईत के न-नाम लःअय बेअलय जोड़ लगाय पे।
आउर ईङ आपे के मियांड खास होरा उदूः पेईङ।
Currently Selected:
1 कुरिन्थी 12: ASR
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0