मरकुस 11

ईसु खुसी ते जेरुसलेम रे सेनाय

(मती 21:1–11; लुका 19:28–40; जोहन 12:12–19)

1जब ईसु जेरुसलेम रआ जयतुन पहार ढेरंगा रे बसावलेना बयतफगे जोटोः बयतनियाह डीही रे वेज्‌नय दो हुँनि चेलाकु मे से बारहोड़ नोंका कथा केते बिदा लिड्किनय, 2“ठँव रआ डीही रे सेनबन जोटोः सोदोरोअबन तुंगी मियड् गधा छउवा जे हुँनि तेङ रे ओके हों ककु देज् तना तोल लेनी ञमोअय, हुँनि राड़ा अगुइबन। 3अगर ओकेकुन सोधव बन, ‘नुई चितानतआ बन रड़ा यातिया?’ मेनगी रेदो कथायबन, परभु तआ नुई रआ दरकार इदानआँ, जोटोः झटहेले नोंडे इकाएर अगु वइयाकु।”

4हुकिन सेन कोते बहरा संडक डुरी रे मियड् दुवार ठँव रे गधा छउवा तोल लेदीकिन ञम लीदिया जोटोः राड़ायती दोहोनकिन, 5होना एडे तींगु लेनकु मे से हुकिन सोधाव लेड् किनाकु, “चितानबन पड़ीयना?, गधा छउवा चितान तआ बन रड़ा यतिया?”

6जे लेका ईसु कथा दोहोलअय हीनालेका हुँकू एडेकिन कथा लआ, तब इकाएर इदीवा लिड्किनाकु। 7हुँकू, ईसु ठँव रे गधा छउवा अगुकेते हुँनि तेङ रे अपन गेंदराः डबना लआकु जोटोः हुँनि तेङ रे ईसु दुड़ूः लेनय। 8कइक होड़ होरा ते गेंदराः बिल लआकु; जोटोः अधा डहुड़ा बिल लआकु 9#सिरिञ 118:25,26जे हुँनि रआ तयोम मड़ाङ से-सेनयन दोहोनाकु हुँकू हकाव-हकाव केते नारा लगाव यते दोहोनाकु,

“होसाना#11:9 होसाना नोआँ रआ माने परमेसर रआ इसतुति!

बढ़ियाँअय हुँनि जे परभु रआ ञुमुन ते वेजोअय!

10अबुन रेनि बबा दाऊद रआ राइज वेजो गोना, परमेसर हुँनि बढ़ियाँअय! सिरमा रे होसाना।”

11ईसु जेरुसलेम रे सोदोर कनते सेंड़ा बिनती ओड़ाः रआ राच रे सेनलेनय जोटोः गोटा पड़ा ञेल केते बरहो चेलाकु सुधा बयतनियाह सेनोः लेनय, चितानतआचि बोंगा हासुरोन दोहोना।

बे जोओ लेना अंजीर काट

(मती 21:18,19)

12दोसरा हिला ईसु बयतनियाह एतेन उडुङ लेनय दो हुँनि रंगिज् लिदिया 13तब अंजीर#11:13 अंजीर लोवा लेका जोओ जोटोः कटोः अवला काट संगिङ एतेन ञेल केते जोओ ञमोः मेनकेते ठँव रे सेनलेनय, होंडे सेकम छोड़ाय चितानहों का ञमना, चितानतआचि जोओयोः रआ बेरा का दोहोना। 14ईसु काट कथावा लअय, “तीहिञ एतेन अमः रआ जोओ ओके हों कहियो एरोकु जोमलेए।”

चेलाकु ते अयुम यते दोहोनकु।

सेंड़ा बिनती ओड़ाः एतेन लेन-देनोः कुइ उडुङ लआ

(मती 21:12–17; लुका 19:45–48; जोहन 3:13–22)

15हुँकू जेरुसलेम रे वेज्‌लेनाकु, जोटोः ईसु सेंड़ा बिनती ओड़ाः रआ राच रे बोलो कनते जे होंडेकु किरिञ केजा यते दोहोलेनकु, हुँकू बहराते उडुङ यतकु दोहोलेनय, ढिबवा बदलाकु#11:15 ढिबवा बदलाकु रोमी जोटोः युनानीकु, जहुदीकु रआ ढिबवा गिरजा ओड़ाः रे दान रकाबे तआ बदला यते दोहोनाकु रआ टीबुल जोटोः पेरवाँ केजाकु रआ मचिया उलटाव लअय। 16जोटोः हुँनि सेंड़ा बिनती ओड़ाः रआ राच रे चितान समान सुधा हों कयएर इदी अगुवायतकु दोहोना। 17#जसा 56:7; जिर 7:11हुँनि उपनीत केते कथावा लिड्कुअय, “जे लेका परमेसर रआ बचन ओल लआ इदानआँ चि, ‘इञः रआ ओड़ाः गोटे जाइत रेनकु रआ बिनती ओड़ाः कहालवओ?’ बकिन आपे दो नोआँ रे-रेज्कु रआ लोपाः पे बनाव केदा।”

18नोआँ दुखमा अयुम केते मुध पुरोहितकु जोटोः धरम पोथी सि-सिखवकु हुँनि गोजे तआ बेरा ञम बेढ़ायते दोहोनाकु। बकिन भीड़ ईसु रआ सिछा ते छकरीत दोहोनाकु हिना करने बोरोयोन दोहोनाकु।

19अयुब् जुवार हुँकू सहर एतेन बहरा तिकु उडुङ लेना।

रोहोड़ अंजीर काट एतेन सिखावोः

(मती 21:20–22)

20दोसरा हिला ञीन्दवा अंजीर काट पड़ाते सेनो गोन दोहोनाकु, हुँकू होना काट रेहेड् हमाः रोहोड़ लेनाकु ञेल लआ। 21तब पतरस होना दुखमा पहम लअय जोटोः ईसु कथावा लिदियय, ओय गुरु, “जे लेका अंजीर काट मी कथावा दोहोलआ होना ञेलेमी रोहोड़यना।”

22“परमेसर एडे सारीयोपे” मेनकेते ईसु हुँकूइ कथावा लआ। 23#मती 17:20; 1 कोरि 13:2सनारी कथायतेअइञ अगर ओके हों नोआँ पहार कु कथावा चि, नोंडे एतेन रचागोमी जोटोः समुदार रे सेनोःमी जोटोः मन रे अलो संका के सीरिफ सारीयोः, इञः जेञ कथाय होना होयावओ दो हुँनि तआ हेंका होयावओ। 24हिनाते इञः कथावा यतमिअइञ ओका हों जे परमेसर एडे बिनती केते कोयेअपे हुँनि तआ सारीयोः चि ञमयना जोटोः अमः तआ होयव एंडायोओ। 25#मती 6:14,15जोटोः कहियो तींगु कोतेम बिनती घनी अमः रआ मन रे ओकेरआ कुन बिरोद पहामोः रेदो मफी मी तब सिरमा रेनि बबा हों अमः रआ गुनाह हों माफियय। 26[अगर काम मफीयते रेदो, सिरमा रेनि बबा आपे रआ गुनाह हों एरोय मफी लेए।]#11:26 थोड़ेः एकेन नोआँ लेकाना पहिल रे अती ते ओल लआ कोनाआँ

ईसु रआ अधिकार बारे सवाल

(मती 21:23–27; लुका 20:1–8)

27जब हुँनि जेरुसलेम रे वेज्‌नय जोटोः सेंड़ा बिनती ओड़ाः रआ राच रे दड़ाँ योन दोहोनय, होंडे मुध पुरोहित, धरम पोथी सि-सिखवकु जोटोः मुध होड़कु हुँनि ठँव रे वेज् कनते सोधाव लेदियाकु। 28ओकेरआ हुकुम तेम कम यतेआ? “नोआँ गोटा कामे तआ हाक ओके ओवा तड्मिआँ।”

29ईसु हुँकू उतारावा लअय, “मियड् सवाल इञः हों सोधाव यतपेअइञ उतारा ओवाञ रेदो बतलाव वापेआञ चि नोआँ काम ओकेरआ हाक ते कराव यतेअइञ। 30इञः बतलाव वाइञपे, चिताना जोहन रआ बतिसमा, सिरमा पड़ा एतेन दोहोलेना चि होड़कु पड़ा एतेन?”

31तब अकु-अकु कथा ओपड़ेञ नाकु, “‘अगर सिरमा पड़ा एतेन’ बुन मेनगी रेदो ईसु कथायय, ‘दो हुँनि एडे चितान तआ कपे सारीयोओ?’ 32अगर अबुन कथायबुन होड़कु पड़ा एतेन, दो होड़ रआ हों बोर इदानआँ, चितानतआचि होड़ सनारी जोहन परमेसर पड़ा एतेन दुखमाय अवला होड़ हके होना गोटेकु मनावोन दोहोना” 33हिनाते हुँकू ईसु उतारावा लआकु, “आले कले ठुवावना।”

ईसु हुँकूइ कथावा लआ, “तब इञः हों एरोइञ बतलाव लेए इञः ओका हाक ते नोआदार कराव यतेअइञ!”

Currently Selected:

मरकुस 11: BIX

Highlight

Copy

Compare