मरकुस 14

ईसु रआ बिरोद रे जोजना ब-बनाव

(मती 26:1–5; लुका 22:1,2; जोहन 11:45–53)

1 # उठलु 12:1–27 पसका जोटोः बे-खमीर रुटी रआ परब सोदोरोः तआ बारसिञ बंचाव दोहोलेना, ईसु, एर रु एंडाय तआ मुध पुरोहितकु जोटोः धरम पोथी सि-सिखवकु धोखा ते सब् केते उपाय ञमयन दोहोनाकु। 2बकिन “परब हिला कोवन कहीं होड़कु रे बकझक अलो होयावकोः मेनकेते कथायते दोहोनाकु।”

मियड् लंञी सोहों सुनुम ईसु एडे दुल लअय

(मती 26:6–13; जोहन 12:1–8)

3 # लुका 7:37,38 होना बेरा ईसु बयतनियाह रे जब छेवड़ा रोग लेनी सिमोन ओड़ाः रे मंडी जोमोः तअय दुड़ूः दोहोलेना, मियड् लंञी पिलीब् दीरी लेकान सीसी रे खँटी जटामासी रआ महंगा सोहों सुनुम अगुकेते वेज्‌लेनय, जोटोः सीसी रआ तेङ पड़ा रापुड् केते हुँनि एडे दुल लअय। 4दो ओके-ओके कयरव कोते कथा लआकु, “नोआँ सोहों सुनुम चितान तअय नास एंडा यतेआ?” 5जोटोः हुँकू हुँनिकु कयरव वा केदा, “चितानतआचि नोआँ सोहों सुनुम दो पे साव चंदी ठड़रा टका एतेन हों बगरा टका ते केजा सकाव कनाअने जोटोः रंगिज् होड़कु तआ हटिञ केदाअने!”

6ईसु हुँकूइ कथावा लआ, मुनि बयेपे “मुनि लंञी चितान तआ परेसान यतियपे? नुई दो इञः तआ बढ़ियाँ काम कराव तदय। 7#नियम 15:11रंगिज्‌कु आपे सुधा रोज दोहोनाकु, जोटोः हुँकू सुधा जहियापे चहावओ तहियापे अछा काम सकावेए बकिन इञः आपे सुधा गोटा हिला एरोञ दोहोना। 8नुई लंञी जे करेक दोहोना कराव सकाव लअय, हुँनि इञः हरेञ रआ तेयारी रे पहिल एतेन इञः होड़ो रे सोहों सुनुम ओजाः लअय। 9आपे सनारी कथावइत पेअइञ चि गोटा दुनियाँ रे जे एडे बढ़ियाँ दुखमा रआ परचार होयावओ हुँनि रआ इयाद रे, हुँनि रआ काम हों चरचा होयावओ।”

जहुदा इस्करियोती ईसु धोखा ओवाय तआ तेयार लेनय

(मती 26:14–16; लुका 22:3–6)

10जहुदा इस्करियोती बराह चेलाकु मे से मियड् दोहोलेनय हुँनि मुध पुरोहितकु एडे ईसु एर सबी तआ दुखमायोः हुँकू एडे सेनलेनय। 11नोंका अयुम केते हुँकू खुस लेनाकु, तब हुँकू जहुदा टका ओवा तआकु वयदा लआ। जोटोः जहुदा ईसु धोखा ते एर सबी तआ मोकाय ञेल यन दोहोना।

चेलाकु तुली अखरी पसका परब रआ मंडी

(मती 26:17–25; लुका 22:7–14,21–23; जोहन 13:21–30)

12पसका परब रआ पहिल हिला जे बेगर जोजो रुटी रआ दिन दोहोना जब पसका परब तआ भेडी छउवा रआ बली रकब् यते दोहोनय, होना हिला चेलाकु ईसु सोधाव लेदियाकु, “अमः ओकारेम चहावओ चि आले सेन कोते पसका परब रआ मंडी तेयारेयाले?”

13ईसु बरिया चेलाकिन नोंका कथा केते बिदा लिड्किनय, “सहार रे सेनोःबन जोटोः मियड् होड़ गगरी रे दाअ् इदीई ञमेयाँ, हिनी बन ओतोङ 14हेनते जे ओड़ाः रे हुँनि सेनाय होना ओड़ाः रेनि मालिक बन कथावा, गुरु कथा यतेअय, ‘इञः अपन चेलाकु सुधा पसका परब रआ मंडी जोम अवला गोतियाकु रआ कोठली ओकारेए?’ 15हुँनि अबन तआ सींगराव झबरव लआ बार पटन तेङ सेंड़ा गोतिया कोठली बतलाव वबानय, अबुन तआ हेंडे बन तेयारे।”

16चेलाकिन उडुङ कनते सहर सेन लेनाकिन जे लेका ईसु हुकिन एडे कथा दोहोलअय हेंका किन ञमलआ जोटोः पसका भोज किन सरा-जमा लआ।

17अयुब् जुवार ईसु बरहो चेलाकु तुली हुँनि होंडे वेज्‌लेनय। 18#सिरिञ 41:9जब दुड़ूः कोते जोमोः यन दोहोनाकु, ईसु कथा लआ, “इञः आपे सनारी कथावा यतपेअइञ, आपे मे से मिहोंड़, जे इञः सुधाय जोमोःयना इञः एर सबेञय।”

19हुँकू अगम उदास यनाकु, जोटोः हुँनि एडे मिहोंड़-मिहोंड़ तिकु कथा लआ, “तना हुँनि इञः हके?”

20ईसु कथा रुवाड़ लअय, “बरहो मे से ही मिहोंड़ हके, जे इञः तुली थाड़ी रे अती जोड़ाव यतेअय। 21मनवाँ होपोन दो सेनाय ही, जे लेका धरम पोथी रे हुँनि बारे ओल लआ इदानआँ। बकिन ओह हुँनि होड़ तआ जेकर दोवसते मनवाँ होपोन एर सबे अवलाया। हुँनि होड़ तआ बढ़ियाँ होयाव कनाअने चि हुँनि रआ जनम अलो होयाव दोहोलेन!”

परभु भोज

(मती 26:26–30; लुका 22:14–20; 1 कोरिन्थी 11:23–25)

22जब हुँकू जोमोः गोन दोहोलेनाकु, ईसु रुटी सब् केते कथालअय जोटोः परमेसर एतेन आसीस कोय केते हेनते रुटी केचाः केते अनेज् चेलाकु ओवा तेञ ते कथालअय, “ने नोआँ जोमेपे,” “नोआँ इञः रआ होड़ो हके।” 23फिन हुँनि अँगुर रास रआ डुभा सब् केते परमेसर धनियाबाद केते हुँकूइ ओवा लआ; जोटोः हुँकू गोटे होना मे से ञू लआकु। 24#उठलु 24:8; जिर 31:31–34हिनाःतेर हुँनि हुँकूइ कथावा लआ, “नोआँ इञः रआ होना मयाम हके जे गोटे तआ एम यतेआ। नोआँ परमेसर करार तड्अय रआ चिन हके। 25इञः आपे सनारी कथावइत पेअइञ जब परमेसर रआ राइज रे नवाँ अँगुर रास कइञ ञूए, तब रे नोआँ दाखरस फिन एरोञ ञू लेए।”

26फिन भजन#14:26 भजन पसका परब रे भजन संहिता एतेन सिरिञ याते दोहोनकु सिरीञ केते ईसु जोटोः हुँनि रेनकु चेलाकु जयतुन पहार तेङ रे सेनोः यनाकु।

पतरस रआ बारे आगमजानी

(मती 26:31–35; लुका 22:31–34)

27 # जख 13:7 ईसु हुँकू कथावा लअय, “आपे गोटे ठोकोर जोमेअपे, चितानतआचि धरम पोथी रे ओल लआ इदानआँ, ‘इञः चरवाहा गोजेयाइञ, जोटोः खुड़हा रेनकु भीडी छिती-छनो अकु।’ 28#मती 28:16बकिन इञः जीवेड्-बिरीड् कोते आपे एतेन मड़ाङ गलील परदेस रे सेनाइञ।”

29पतरस हुँनि कथावा लअय, “चहे गोटे बाय केते सेनोः दो सेनोःकु बकिन इञः ठोकोर एरोञ जोमलेए।”

30तब ईसु हुँनि कथावा लअय, “इञः सनारी कथा यतेअइञ चि, तीहिञ ही ञीन्द बार इसा मुरगा रागे एतेन पहिल, पे इसा इञः मी कोवानीञा।”

31तब पतरस जोटोः जोड़ एम केते कथालअय, “दो अमः सुधा गोजोः पड़ावोः रे हों इञः अमः रआ एरोञ कोवन लेए!”

हेंका गोटे चेलाकु कथा लआ।

गतासमनी बिठा रे बिनती लेनय

(मती 26:36–46; लुका 22:39–46)

32फिन हुँकू गतासमनी ञुमुन ठँव रे सेन लेनाकु, जोटोः होंडे ईसु अनेज् चेलाकुइ कथावा लआ, “नोंडे दुड़ूः कोपे जबरे इञः बिनती इञोः।” 33जोटोः हुँनि पतरस, जाकुब जोटोः जोहन, अनेज् सुधा इदी लिड्कुअय। ईसु अगम दुखी जोटोः माकुल दोहोलेनय। 34जोटोः ईसु हुँकूइ कथावा लआ, “इञः रआ मन तीञ अगम माकुल इदानआँ, नोआँ हमाः चि इञः रआ जीवि उडुङोः लेकाआ, अबन नोंडे दोहोकोते चँड़चित दोहोनबन।”

35ईसु फिन मड़ाङ सेनलेनय जोटोः ओत रे हुमकुरिया कोते बिनती इञोः नाय, “अगर होयव सकावोओ दो नोआँ दुख रआ बेरा इञः एतेन टलावोः।” 36मेनकेते कथालअय, “बबा#14:36 ईसु मसी अरामिक दुखमा रे अबा कथा तड्अय नोआँ रआ माने बबा हके ओय बबा अमः सुधा दो गोटा होयव सकावोओ, नोआँ दुख रआ डुभा इञः एतेन ओचोः एंडायमी, बकिन इञः रआ हिछा मोताबिक कोवन अमः रआ हिछा पुरायोः।”

37ईसु अनेज् चेलाकु ठँवरे सेनलेनय दो हुँकू फिन ञीदो ञेल केते पतरस एडे कथालअय, “ओय सिमोन, अमः ञीदो यनाम? तना अमः मी घंटा हों जगल काम दोहो बेजाना? 38जगल दोहोनपे जोटोः बिनती इञोःपे ताकि अलोपे एर परखावकोः। आतमा दो तेयारा बकिन गतार कमजोरा।”

39ईसु फिन सेनोः लेनय जोटोः पहिल लेका बिनती लअय। 40हेनते फिन रुवाड़ कोते ञीदोः ञेल लिड्कुअय, चितानतआचि ञीन्द लहा ते मेड् का बोगाः गोन दोहोना, जोटोः हुँनि चितान उतारा ओवाया होना हों ककु ठुवायते दोहोना।

41ईसु जब तिबारा चेलाकु एडे वेज् कनते हुँकूइ कथावा लआ, “तना नहाः हमाः गितिग् तनापे जोटोः सथाव ओनापे? बस अगम होयाव यना! अब बेरा वेज्‌यना, जोटोः मनवाँ होपोन पापीकु रआ अती रे एर सबे याकु। 42बिरीड्पे, एला सेनेअबुन। इञः सब्‌कु ठँवरे सोदोर यनाकु!”

ईसु रआ एर सबे

(मती 26:47–56; लुका 22:47–53; जोहन 18:3–12)

43ईसु कथाय तुंगी जहुदा जे बरहो मे से मिहोंड़ दोहोलेना, अनेज् तुली अगम होड़कु वेज्‌लेना हुँकू तलवर जोटोः हपा सब् दोहोलआकु। हुँकू मुध पुरोहित जोटोः धरम पोथी सि-सिखवकु जोटोः मुध होड़कु बिदा दोहोलिड्कुआकु। 44धोखा ते एर ससब्-ई, नोंका पहिल एतेन बतलाव दोहोल, “जे ओके हों इञः चोहना याइञ हिनी ही ईसु हके, हिनी अछाते सब् केते धेयान ते सिपाहीकु रआ देख-रेख रे इदीपे।”

45हुँनि सोझे ईसु एडे वेज्‌नय जोटोः कथालअय “ओय गुरु” मेनकेते चोहना लिदियय, 46तब होड़कु हुँनि सब् केते कबजा रे कीदियाकु। 47ईसु सुधा तींगु लेनी मे से मिहोंड़ तलवर ओर केते सेंड़ा पुरोहित रेनि बन्धुवा एडे छेंव चलाव लअय हेनते हुँनि रआ लुतुर खंडा केदय। 48ईसु हुँकू एडे कथालअय, “तना आपे डकु समझाव कोते इञः सब् तआ तलवर जोटोः हपा अगुकेते वेज्‌तनापे? 49#लुका 19:47; 21:37सेंड़ा बिनती ओड़ाः रआ राच रे इञः रोज हिला आपे सुधा दोहो कोतेञ बतलाव यते दोहोना, दो आपे कपे सब् लीदिञा, बकिन नोंका हिनाते होयावओना चि धरम पोथी रआ दुखमा पुरायोः।”

50होनाघनी गोटे चेलाकु हुँनि बय केतेकु ञीर केदा।

51मियड् कोड़ा बे झुलाते मलमल चदार उयू कोते ईसु तयोम सेनोः लेनय, हेनते होड़कु हुँनि सबे तआ तयोम एतेनकु जोला दोहोलिदिया। 52दो मलमल चदार गिडी केते ढेन्डले ते दोन यनाय।

जहुदी पंचायत रे ईसु

(मती 26:57–68; लुका 22:54,55,63–71; जोहन 18:13,14,19–24)

53हुँकू मुध पुरोहित एडे ईसु इदी लिदियाकु, गोटे मुध पुरोहित, मुध होड़, जोटोः धरम पोथी सि-सिखवकु हुँनि सेंड़ा पुरोहित ओड़ाः रेकु जवार लेना। 54पतरस थोड़ेः सगिंङ हमाः ईसु रआ तयोम-तयोम सेनलेनय जोटोः सेंड़ा पुरोहित रआ ओड़ाः सोदोर कोते भीतार राच रे बोलोनय, जोटोः सिपाहीकु सुधा दुड़ूः कोते सेंगेल जिरोगोन दोहोनय। 55ईसु रु एंडाय तआ मुध पुरोहित जोटोः जहुदी-महासभा रे दुड़ूः लेनकु हुँनि रआ बिरोद रे गोवाही ञमयन दोहोनाकु, बकिन का ञमना। 56गोटे हुँनि रआ बिरोद रे झुठा गोवाह एमयन दोहोनाकु, बकिन हुँकू रआ मी-लेका गोवाह का दोहोना।

57तब थोड़ेः एकेन होड़ हुँनि रआ बिरोद रे बिरीड् कोते झुठा गोवाह एमलआकु। 58#जोह 2:19आले नुई नोंका कथाय अयुम लेदियाले, इञः अती ते बनाव लआ नोआँ सेंड़ा बिनती ओड़ाः धसाव एंडायइञ, जोटोः पे रोज तयोम एटाः अइञ तींगुआ जे अती ते बनाव लआ कोवन। 59सेकरो रे हुँकू रआ गोवाही मी-लेका कोवन।

60सेंड़ा पुरोहित तला रे तींगु कोते ईसु सोधव लअय, “अमः चितान उतारा हों कम एमेआ? नुकु होड़ अमः बिरोद रे नुकु चितान गोवाह एम यनाकु, तना अमः एडे उतारा कोनाआँ?”

61ईसु मटियाव नय जोटोः चितान उतारा हों काय एम लआ, सेंड़ा पुरोहित फिन हुँनि सोधाव लअय, “तना अमः इसतुति लायक परमेसर रेनि होपोन मसी हके?”

62 # दानि 7:13 ईसु कथालअय, “इञः हके, आपे मनवाँ होपोन हुँनि परम सकती अवला रआ जोम होरे दुड़ुःगोः जोटोः सिरमा रआ रीमिल एतेन वेजोः ञेलेयापे!”

63जोटोः सेंड़ा पुरोहित अनेज् रआ झुला चिराय ते कथालअय, “अब जोटोः गोवाह रआ चितान दरकार! 64#लेबी 24:16आपे नुई एतेन परमेसर रआ निंदा कथाय अयुम कीदियापे, अब आपे रआ राय चिलकाआ?”

गोटे कथा लआकु, मुनि दोसीदर मुनि गोज् एंडाय चही।

65तब ओके दो हुँनि एडे थूः लआकु, ओके दो मेड्-अहा डबना लआकु जोटोः मुटकाव लेदियाकु जोटोः सोधाव लेदियाकु, “अगर अमः अगामजानी होड़ हके दो बतलावेमी ओके हुमाः लिड्मिआँ,” जोटोः सिपाहीकु हुँनि सब् केते थपड़ाव लिदियाकु।

पतरस ईसु कोवन लिदियय

(मती 26:69–75; लुका 22:56–62; जोहन 18:15–18,25–27)

66पतरस जब ओतेत राच रे दोहोनय, सेंड़ा पुरोहित रेनि मियड् धँगड़ीन होंडे वेज्‌नय, 67हेनते पतरस जिरोगोः ञेल लिदियय, जोटोः एकटक ञेल केते कथालअय, “अमः हों दो, हुँनि नासरत रेनि ईसु तुलीम दोहोलेना।”

68तब हुँनि कोवन मेनोअय, “इञः नइञ ठुवायती, नइञ समझाव तन चि अमः चितानम मेन यतेआ।” तब बहरा राच रआ डेगना रे सेननय हिमेन रे मुरगा राअ् केदा।

69पतरस ञेल केते हुँनि धँगड़ीन, जे हुँनि ठँव रे तींगु दोहोनय हुँकू एडे कथालअय, “नुई हीकु मे से मिहोंड़ हके।” 70पतरस फिन कोवन मेनोअय।

थोड़ेक डिरी कनते ठँव तिकु तींगु दोहोना हुँकू पतरस कथावा लआकु, “सनारी अमः हिकु मे से हके, चितानतआचि अमः हों गलील रेनमी हके।”

71तब हुँनि अपने अप सरपाव लेनय जोटोः किरया जोम केते कथालअय, “इञः हुँनि होड़ जेकर बारे पे कथा यतेआ हुँनि कइञ ठुवावना।”

72तयोम ते झटहेले मुरगा राअ् लअय, तब पतरस पहम लअय चि, ईसु हुँनि एडे जे कथा दोहोलअय “बार इसा मुरगा रागे एतेन पहिल अमः, पे इसा इञः मी कोवानीञा” नोआँ दुखमा पहम कनते खोभराव-खोभराव ते इयाम लअय।

Currently Selected:

मरकुस 14: BIX

Highlight

Copy

Compare