मरकुस 5

मुवाँ आतमा ते जकड़ाव लेनी रआ नपायोः

(मती 8:28–34; लुका 8:26–39)

1ईसु हेनते हुँनि रेनकु चेला डहा होनहोंर गिरासिनियाँ देस रे सोदोरनाकु। 2हुँनि डोंगा एतेन अड़गु लेनय, झटहेले मियड् छुत आतमा झपाव लेनी होड़ मरघाट एतेन उडुङ कोते ईसु एडे सेनलेनय 3हुँनि मरघाट रे दोहोयोओन दोहोनय, हुँनि सिकड़ तेहों ककु तोल बुजा यतिदोहोना; 4चितानतआचि हुँनि घड़ी-घड़ी मेड़हेड् रआ बेरा जोटोः सिकड़ तिकु तोलयती दोहोना, बकिन होना सिकड़ हों टोटाः एंडालअय, बेरा हों टुकरा-टुकरा एंडालअय, हेनते ओके हों हुँनि ककु काबु बुजा यतिदोहोना। 5हुँनि रोज सीञ न ञीन्द, पहार हेनते मरघाट तला रे दड़ाँ इञोगोन दोहोनय जोटोः घोल यते दोहोनय, हुँनि अनेज् ते ही पकार ते कोटेज् घवोगोन दोहोनय।

6हुँनि संगिङ एतेन ईसु ञेल केते दोन दपराम नय जोटोः इकड़ुम कनते जँगा ठँव रे हुमकुरयानय, 7हेनते हुँनि हकाव लअय जोटोः अगम जोड़ते, “ओय ईसु परम परधान परमेसर रेनि होपोन, अमः इञः एतेन चितानम चहावओ? इञः परमेसर रआ ञुमुन ते भीख कोय यनाइञ इञः अलोम सतावीञ!” 8(हुँनि नोंका हिनाते कथालअय चितानतआचि ईसु पहिल रे कथा दोहोलअय “ओय छुत आतमा नुई होड़ बयेमी!”)

9ईसु हुँनि सोधाव लिदियय, “अमः रआ चितान ञुमुन हके?”

हुँनि कथालअय, “पलटनकु#5:9 पलटनकु पलटनकु मनेकी लिगियोन - 6000 सिपाही रेनकु सेना चितानतआचि आले ढेर पुरे आले!” 10हेनते हुँकू ईसु एडे मुरुक गोहराव लेनाकु, “आले छुत आतमा नोआँ देस एतेन संगिङ अलोम बिदा ले।”

11होना एडे पहार रे सुकरीकु रआ मी गोहडा चरावओन दोहोलेनाकु, 12हेनते छुत आतमा गोहराव कनते बिनती लेनाकु, “आले सुकरीकु तला रे बिदा ले, ताकि हुँकू सुधाले दोहोना” 13तब ईसु हुँकूइ हुकुम ओवा लिड्कुअय, हेनते छुत आतमा उडुङ कनते बार हजार सुकरीकु एडे समाव यनाकु, हेनते ढेरंगा एतेन दोन झपड़व कोते डहा रे डुबाः गोज्‌यनाकु।

14सुकरी चरवाहाकु सहार हेनते डीही दोन सेनोः कोते खभाइर लआकु, होना एडे जे होयवना होना ञे-ञेलकु वेज्‌लेना, 15हुँकू ईसु ठँव रे वेज्‌लेनाकु जोटोः हुँनि ञेल केते बोरो यनाकु जेकर एडे मुवाँ आतमा पलटन समाव दोहोना, हुँनि झुला पेनेट कनते अछाते दुड़ूः ञेल लेदियाकु। 16जे होड़ नोआँ गोटा अपन मेंड् तिकु ञेल लआ, हुँकू होड़कु-कू बतलाववा लआ, चि चिलका मुवाँ आतमा तना होयवलेना जोटोः सुकरीकु रआ पुरा खभार अयुमवा लिड्कुअकु।

17हेनते हुँकू ईसु एडे गोहराव कोतेकु कथावा लिदिया आले रआ सीमान एतेन सेनोःमी।

18ईसु डोंगा रे रकाबोन दोहोनय घनी, जे होड़ एडे मुवाँ आतमा उडुङ लेनय हुँनि गोहराव कोते ईसु एडे कथालअय, “इञः अमः सुधा इकाएर दोहोवाइञमी।”

19ईसु हुँनि मना लिदियय, “हेनते हुँनि कथावा लिदियय अमः अपन ओड़ाः सेनोःमी जोटोः अपन होड़कु बतलाववाकुमी, चि परभु अमः तआ मयाकेते चिलका सेंड़ा काम तड्अय मेनवाँ लिदियय।”

20हुँनि सेनोःनय हेनते दस सहर अवला दिकापुलिस पहटा रे परचार केदय, ईसु चिलका इञः तआ सेंड़ा काम तड्अय होना परचार लअय, गोटे होड़कु तजूक यनाकु।

गोज् लेनी कुड़ी हेनते जंडिरा लेनी लंञी

(मती 9:18–26; लुका 8:40–56)

21ईसु डोंगा रे देज् कनते सेंड़ा डहा होनहोंर परोम लेनय, डुरी रे सोदोर ही लेनय चि अगम होड़ हुँनि ठँव रे जवार लेनाकु। 22होंडे याइर ञुमुन मियड् होड़ जे बिनती ओड़ाः रेनि सरदार दोहोना वेज्‌नय हेनते ईसु ञेल केते जँगा दुबा रे लबःड् कोते अरजी लेनय। 23हुँनि मुरुक ईसु एडे गोहराव कनते बिनती लेनय, हेनते कथालअय हुडिञ दुलारा मइयाँ तिंङ गोजोः लेका तनय, दू हुँनि तेङ रे अती दोहोयमी हेनते नपाय कोते जीवेड् दोहोनय।

24ईसु हुँकू तुली सेनलेनय, हेनते अगम होड़ हुँनि तयोम ते सेन लआकु, होंडे अगम होड़ ईसु धका यति दोहोलेनाकु।

25होंडे लगातार बराह बरीस एतेन मयाम तुयोः अवला रोग ते परेसान लेनी लंञी दोहोलेना, 26हुँनि नपायोः मेनते दवहा एतेन अगम दुख उठाव लअय, जोटोः अनेज् रआ गोटा जीनिस केजा केदय, चितानहों का फयदाना, बकिन जोटोः हों रोगी यनय। 27हुँनि ईसु रआ बारे अयुम केते भीड़ रआ तयोम एतेन सेन कनते हुँनि रआ गेंदराः छुवाँव लअय। 28लंञी सोचाव दोहोलअय अगर इञः हुँनि रआ गेंदराः हीञ छुवाँवेए रेदो नपाय योओइञ।

29हेनते हुँनि मयाम तुयोः एतेन झटहेले नपाय यनाइञ मेनकेते अनेज् होड़ो रे ठुवा केदय चि अपन रोगी एतेनाइञ नपाय यना। 30ईसु झटहेले महसुस केदय इञः एतेन सकती उडुङना होना, हेनते होड़ भीड़ पड़ाते घुमराव कनते ञेल केते सोधाव लिड्कुअय, “गेंदराः तिंङ ओके छुवाँव लआ?”

31तब चेलाकु ताय हुँनि कथावा लीदियाकु, “तना काम ञेल यतकुआ चि भीड़ अमः पड़ातेकु सटावओना, हेनते कथायतेअम ‘इञः ओके छुवाँव’ लीदिञा?”

32बकिन ईसु छु-छुवाँवी ञेल तआ गोटा पड़ाय बोगाः लआ, 33इञः तआ चिलका भलाइ होयवना होना ठुवा केते, लंञी बोर ते एकला वेज्‌नय हेनते ईसु रआ जँगा रे लबःड् कोते जे होयव न होना गोटा सनारी बतलाव लअय। 34ईसु हुँनि कथावा लअय “मइयाँ अमः रआ सारीयोः ते नपाय यनाम अब सांति ते सेनोःमी जोटोः जंडिरा एतेन बंचावओमी।”

35ईसु कथा ही यते दोहोनय चि बिनती ओड़ाः रेनि अगुवा ओड़ाः एतेन मियड् होड़ वेज् कनते कथालअय, अब जोटोः गुरु अलोम एर परेसानी, मइयाँ तम गोज् यनाय।

36जे दुखमा कथायते दोहोनाकु होना ईसु अनसुनी केते, बिनती ओड़ाः रेनि अगुवा कथावा लअय, “अलोम बोरोयोः सिरीप सारीयोमी।” 37ईसु अनेज् तुली पतरस, जाकूब हेनते जाकुब बोयहाते जोहन बय केते ओके हों कायएर वेज्‌वा लिड्कुआ। 38हुँकू हकिम रआ सोदोर कनते ईसु होंडे मुरुक रौवा-बौवा इयाम जोटोः घो-घोल ञेल लिड्कुअय। 39हुँनि भीतरी रे बोलो कोते कथालअय, “मुरुक चितान तआ इयाम यतेआपे जोटोः रौवा-बौवा घोल यतेआ? कुड़ी ञीदो गोनय काय गोज् तना।”

40नोआँ अयुम केते होड़कु हुँनि लंदावा लिदियाकु, बकिन हुँनि गोटे बहराते बिदा लिड्कुअय हेनते जे एडे कुड़ी दोहोलेनय होंडे कुड़ी एंगात-अपात किन हेनते चेलाकुतय सुधा भीतारे बोलो लेनाकु। 41हेनते ईसु कुड़ी रआ अती सब् केते कथालअय “तलीता कुमी” नोआँ रआ माने “इञः कथावइत मीअइञ ओय मइयाँ बिरीड्मी।”

42हुँनि बराह बरीस रेनि कुड़ी, झटहेले बिरीड् कोते सेन बुहड़ी केदय, ञेल केते होड़कु छकरीत यनाकु। 43हेनते ईसु कथालअय, “नुई तआ चितानकुन जो-जोम तआ ओवायपे” हेनते हुँकू चेताव केते हुकुमवा लिड्कुअय चि नोआँ दुखमा ओके हों अलोकु ठुवाके।

Currently Selected:

मरकुस 5: BIX

Highlight

Copy

Compare