मरकुस 6

नासरत रे ईसु ककु पुछाव लिदिया

(मती 13:43–58; लुका 4:16–30)

1अनेज् डीही जे एडे सेंड़ा लेनय होंडे एतेन उडुङनय, हेनते हुँनि तयोम-तयोम चेलाकु ताय हों सेन लेनाकु। 2रुड़ुयोः हिला रे हुँनि बिनती ओड़ाः रे सिछा दुखमा सिखाव यतकु दोहोलेनय, होंडे अगम होड़ अयुम केते छकरीत यनाकु, हेनते कथा लआकु नुई एडे नोआँ दुखमा ओका एतेन वेज्‌ना? जोटोः चिलकाना गेयान हके चि नुई तआ ञमतना? हेनते नुई एतेन सकती रआ काम चिलका दिसतारोओ? 3तना बढ़ई होपोन नालगे, जे मरियम रेनि होपोन जाकुब, जोसेस जहुदा, जोटोः सिमोन रेनि बोयहा हके? तना नुई रेनकु कुड़ी बोकोतेतिकु अबुन तुली ककु दोहोना? हिनाते हुँकू हुँनि रआ बारे रे ठोकोर जोम लआकु।

4 # जोह 4:44 ईसु हुँकूइ कथावा लआ, परमेसर पड़ा एतेन दुखमाय अवला होड़ रआ अपन डीही, अपन होड़ तला रे हेनते ओड़ाः रेनकु बाय केते गोटेकु पुछाविया।

5हुँनि होंडे सकती रआ काम काय कराव बेजालआ, जंडिरा लेनकु थोड़ेः एकेन होड़ अती ते छुवाँव केते नपाय लिड्कुअय। 6हेनते हुँकू रआ का सारीयोः ञेल केते हुँनि छकरीत यनाय।

बराह गोट अगुवा कुइ बिदा लआ

(मती 10:5–15; लुका 9:1–6)

हिना एतेन गोटा पड़ा रआ डीही रे सिछा एम इञोःनय। 7ईसु बरहो झन अनेज् ठँव रे राअ् लिड्कुअय, हेनते छुत आतमा उडुङ तआ हाक ओवा केते ब-बार होड़ बिदा लिड्कुअय। 8हुँनि हुँकूइ हुकुमवा लआ, होरा ते तआ हपा बाय केते चिताना हो अलोपे इदीके, न रुटी न थइलाः, न बटु रे टका। 9सीरिफ खड़पा होड़हदेपे जोटोः बबरिया झुला अलोपे इदीके। 10हुँनि हुँकूइ कथावा लआ जे ओड़ाः रे बोलो योओपे दो हेनेन ओड़ाः रे दोहोनपे जबरे होंडे एतेन कपे बिदाइयोः, 11#बि.काम 13:51#लुका 10:4–11जोटोः जोन ठाँव रे आपे ककु जुवाब यतपे, हेनते आपे रआ ककु अयुमे रेदो होना डीही रे अलोपे दोहोन जोटोः तरवा रआ धुड़ी झड़ावेपे ताकि हुँकू एडे गोवाही पड़ीयोः।

12हुँकू होंडे एतेन उडुङ कनते सेन लेनाकु हेनते होड़कु एडे परचार लआकु, अकु रआ पाप एतेन मन रुवाड़े। 13#जाकु 5:14हुँकू अगम मुवाँ आतमाकु उडुङ लआ, हेनते जंडिरा लेनकु सुनुम ओजाः केतेकु नपाय लिड्कुआ।

जोहन बतिसमा एम अवला रआ गोजोः

(मती 14:1–12; लुका 9:7–9)

14 # मती 16:14; मर 8:28; लुका 9:19 ईसु रआ ञुमुन गोटाते छीड़याव दोहोना, होना हेरोद राजा हों अयुम दोहोलअय। जोटोः होड़कु कथायते दोहोनाकु, “बतिसमा एम अवला जोहन गोज् कनते जीवेड्-बिरीड् तनय हीना करने हुँनि एडे नोंका सकती रआ काम करावे तआ सकती इदानआँ, हिना करने हुँनि एडे नोंकय तआ सकती इदानआँ।”

15जोटोः होड़ कथायते दोहोनाकु, “नुई एलियाह हके।”

बकिन थोड़ेः एकेन होड़कु, “नुई पुरखाकु बेरा रेनि परमेसर पड़ा एतेन दुखमाय अवला होड़ मे से मिहोंड़ लेकाअय मेनयते दोहोनाकु।” 16राजा हेरोद नोआँ अयुम केते कथालअय, “नुई हेनेनी बतिसमा एम अवला जोहन हके जे रआ बोहोः एर खंडा दोहो लिड्कुअइञ, हुँनि जीवेड्-बिरीड् तनय।” 17#लुका 3:19,20हेरोद राजा जोहन एर सब् केते जेहेल ओड़ाः रे एर सीञ लिदियय हुँनि हिनाते नोंका लअय चितानतआचि हेरोदेस अनेज् कोड़ा बोयहा फिलिपुस रेनि लंञी हेरोदियस सुधा बियाह दोहोनय। 18जोटोः जोहन कइक इसा हेरोद कथावा दोहोलअय अपन बोयहा, “रेनि लंञी बियाही उचित न लगे!”

19हिना तआ हेरोदियस हुँनि तुली खीस दोहो दोहोलअय हेनते एर गोजे तआ चहावओन दोहोनय बकिन होंका का होयवलेना, 20चितानतआचि हेरोदेस जोहन बोरोवायन दोहोनय, जोटोः हेरोद ठुवायते दोहोनय चि हुँनि धरमी हेनते पबितर होड़ हके। हिना तआ बंचाव बाय दोहो यती दोहोनय, हेनते हुँनि रआ दुखमा अयुम केते हेरोद मुरुक अकबकाव दोहोनय बकिन हुँनि जोहन रआ दुखमा खुसी ते अयुम यते दोहोनय।

21ठीक मोका वेज् न जब हेरोद रआ जनम दिन रे अनेज् अधिकारीकु, हेनते सेंड़ा सिपाहीकु हेनते गलील रेनकु सेंड़ा होड़कु गोटे राअ् केते भोज ओवा लिड्कुअय। 22हेरोदियस रेनि कुड़ी होपोन ते भीतारे वेज्‌नय, हेनते रुचुः लेनय जोटोः हेरोद दुड़ूः लेनकु एरखुस लिड्कुअय, तब राजा कुड़ी कथावा लअय, “अमः जे मी चहावओ इञः एतेन कोयेमी, अमः ओवा मीअइञ।” 23किरया जोम केते हुँनि कथावा लिदियय, “इञः एतेन कोयेमी अधा राइज ओवा मीअइञ।”

24बहरा रे उडुङ कनते एंगाते सोधाव लअय, “चितानाइञ कोयेआ?”

हुँनि कथालअय “जोहन बतिसमा एम अवला रआ बोहोः कोयेमी।”

25हुँनि झटहेले भीतारे सेन कनते राजा एडे बिनती लअय, “नहाः ही इञः तआ जोहन बतिसमा एमी रआ बोहोः थाड़ी रे दन।”

26तब राजा मुरुक उदास यनाय, बकिन दो किरया जोम दोहोलअय करने जोटोः अनेज् ठँव रे दुड़ूः लेनकु गोतियाकु चलते होना काय टलावे चहावना। 27हिनाते राजा झटहेले मियड् सिपाही हुकुमवा केते बिदा लिदियय, चि जोहन रआ बोहोः खंडा केते अगुइ हुँनि जेहेल ओड़ाः रे सेन कनते जोहन रआ बोहोः खंडा कोते, 28जोटोः थाड़ी रे अगु लअय जोटोः कुड़ी ओवा लअय, हेनते कुड़ी एंगाते ओवा लअय। 29जोहन रेनकु चेलाकु अयुम कोते वेज्‌नाकु हेनते होना मुरदा इदी केते मरघाट रे दोहोलआकु।

ईसु पाँच हजार होड़कुइ खियाव लिड्कुआ

(मती 14:15–21; लुका 9:11–17; जोहन 6:1–14)

30बिदा लिड्कु चेला ईसु ठँव रे जवार नाकु, हुँकू जे काम दोहोलआकु हेनते सिखाव दोहोलिड्कुआकु, होना ईसु बतलाववा लेदियाकु। 31हुँनि हुँकूइ कथावा लआ, “एला सुनसन ठँव रे सेन कोते कटी एकेन सथावओपे।” चितानतआचि अगम होड़ सेनोः वेजोगोन दोहोनाकु, जोटोः जोमोः तआ हों फुरसत का ञमोगोन दोहोना। 32हिनाते हुँकू डोंगा रे देज् कनते एटाः सुनसन एसकार ठँव रे सेनोः यनाकु।

33ढेर होड़ हुँकू सेनोः ञेल केते थीताव लिड्कुअकु, हेनते गोटा डीही एतेन जवार कोते ओत ते पयदल दोन कोते हुँकू एतेन पहिल होना ठँव रे सेन सोदोरनकु। 34#लेखा 27:17; 1 राजा 22:17; 2 इति 18:16; हेज 34:5; मती 9:36जोटोः डोंगा एतेन अड़गु लेनय दो भीड़ ञेल केते हुँकू तेङ रे सोगव लेनय, चितानतआचि हुँकू जेकर चरवाहा कुनीकुआ अड् भीडी लेका दोहोलेनाकु, जे ओके चरवाहा हों कोनीयाँ; जोटोः हुँनि अगम दुखमा सिखाव सुरु लअय। 35जब बोंगा ढड़काव यना दो, हुँनि रेनकु चेला हुँनि ठँव रे वेज् कोते कथा लआकु, “नोआँ ठाँव सुनसन इदानआँ जोटोः बेरा अगम कुबेर यना। 36होड़कु बिदाकुमी ताकि हुँकू डीही रे सेन कोते अकु तआ जो-जोमा किरिञेअकु।”

37हुँनि हुँकूइ कथा रुवाड़ लआ, “आपे ही मुकू तआ जो-जोम तआ ओवाकुपे।”

हुँकू हुँनि कथावा लीदियाकु, “तना बार साव चंदी ठड़रा टका#6:37 बार साव चंदी ठड़रा टका मियड् चाँदी टका रआ मूल मुसिञ रआ कमायनी रआ रुटी किरिञ अगुयले, हेनते हुँकू ले खियावा।”

38ईसु हुँकूइ कथा रुवाड़ लआ, “आपे एडे उकेन एकेन रुटी इदानआँ सेन कोते ञेलेपे।”

हुँकू ठुवा केतेकु कथा लआ, “पाँच गोट रुटी हेनते बरिया हकु।”

39तब हुँनि चेलाकुइ हुकुमवा लिड्कुआ चि, गोटे हरियार बीर तेञ रे गेतेर-गेतेर दुड़ूः कुपे। 40हुँकू साव-साव हेनते पचास-पचास कोते गोटे गेतेर-गेतेर दुड़ूः यनाकु। 41हुँनि होना पाँच रुटी जोटोः बरिया हकुइ अँगाव लआ, हेनते सिरमा पड़ा संगील केते परमेसर धनियाबाद लअय, जोटोः रुटी केचाः-केचाः ते चेलाकुइ ओवाया लआ चि होड़कु तआकु ओवाकु, जोटोः बरिया हकु हों हुँकू तआ हटिङवाँ लिड्कुअय। 42गोटे जोम कोते बी यनाकु, 43बंचाव लेना रुटी जोटोः थोड़ेः एकेन हकु मे से चेलाकु बराह खचली पेरेज् केतेकु अलगाव लआ। 44जे तना रुटी जोम लआकु मे से पाँच हजार मरदनाकु दोहोलेना।

ईसु रआ दाअ् तेङ रे सेसेन

(मती 14:22–33; जोहन 6:15–21)

45ईसु झटहेले अनेज् चेलाकु डोंगा रे देजोः तअय अचुलिड्कुआ, चि हुँनि एतेन पहिल रे बयतसयदा होनहोरकू सेनोः जुनोः हिना तयोम होड़कु बिदालअय। 46हुँकू बिदा केते ईसु पहार तेङ रे बिनतीयोः सेनोः लेनय। 47अयुब् बेरा सेंड़ा डहा तला रे डोंगा दोहोलेना जोटोः हुँनि एसकारते ओत रे दोहोलेनय। 48हेनते हुँकू ञेल लिड्कुअय चि डोंगा सोझव-सोझव ते मसकील यनाकु चितानतआचि होय अकु पड़ाते तपेजोन दोहोना, भीनसरा ईसु सेंड़ा डहा दाअ् तेङ ते सेन कोते चेलाकु पड़ाते सोदोरलेनय। हुँनि हुँकू एतेन परोमोः अवला ही दोहोलेनय। 49बकिन चेलाकु हुँनि दाअ् तेङ रे सेसेन ञेल केते सोचाव लआकु चि, भूत हके मेनकेते हकाव बिरीड् यनाकु। 50चितानतआचि हुँनि ञेल कोते गोटे अगमकु बोरोयना।

बकिन ईसु हुँकू सुधा झटहेले दुखमा लेनय जोटोः कथालअय, “डीढेपे इञः हके अलोपे बोर!” 51हुँनि हुँकू ठँव रे वेज् कनते डोंगा रे देज् लेनय हेनते होय ठमकाव यना, तब हुँकू मुरुक छकरीत यनाकु 52हुँकू रआ मन कठोर दोहोलेना चलते हुँकू होना पाँच हजार होड़कु रुटी खियाव लिड्कुअय रआ छकरीत काम बारे ककु समझाव दोहोना।

गनेसरत रे ईसु जंडिरा लेनकुइ नपाय लआ

(मती 14:34–36)

53हुँकू सेंड़ा डहा होनहोंर परोम कनते गनेसरत देस रे सोदोरनकु, हेनते डुरी रे डोंगा तोल लआकु। 54हुँकू डोंगा एतेन अड़गु लेनाकु दो, झटहेले होड़कु ईसु थीतव लिदियाकु 55हेनते हुँकू अगल बगल रआ गोटा देस तिकु दोन लेना, जोटोः जंडिरा लेनकु खटिया रे गोअ् केते जने-जने खभार अयुम लआकू, तने-तने इदी बेड़हा लिड्कुआकु। 56जोटोः ईसु ओकारे हों डीही, बस्ती हेनते सहर सेनोः गोन दोहोनय, होड़कु जंडिरा लेनकु बाजार टइन्ड ते मंडव केते हुँनि एडे गोहराव ओन दोहोनाकु, चि हुँकू हुँनि रआ गेंदराः रआ अँचड़ा ही इकाएर छुवाँव वाले; जोटोः जयझन अँचड़ाकु छुवाँव यतिदोहोना गोटेकु नपाय योन दोहोना।

Currently Selected:

मरकुस 6: BIX

Highlight

Copy

Compare