COL 2
2
1हे ना आक्का तम्मुळ्ळालाला, नाद इल्ला इच्छा उंडाद की मिक यरका कावाला की, मी इचांग इंगा आल्ले यवार लावदीकिया शहरला उंडार इंगा यवार नन्नु यवार कंडलाता सुडालेर, इल्ला मी आंदार इचांग निन यंता मेहनत शेस्तुनान इदी मिक तेल्वाला, 2आदी मेहनत दिनिचांग की, वार मनुक उत्तेजन शिक्काला इंगा मीर प्रेमला वगातळा जुळायाला. बुद्धीद पुर्ण खात्री शिक्काला इंगा परमेश्वरदी रहस्य आंटे ख्रिस्तद पुर्ण ज्ञान वारकी यरका कावाला.
ख्रिस्तन जताक संयुक्त आय्येद
3-4हे ना आक्का तम्मुळ्ळालाला, ख्रिस्तला बुद्धी इंगा ज्ञानदी धन दाशी फेटनेद उंडाद. यवारुच मिमलान तीयांग माटलाडी फसाय मताराद. आंका निन इदी शपतुनान. 5येनटीक की निन फयता जरी मी देगाटेल धुराम उंडान पण आत्माता मी देगार उंडान इंगा मिद व्यवस्थीत जीवन इंगा ख्रिस्तला मिद मजबुत विश्वास सुशी निन आनंद शेस्तान. 6इंगा दिनिचांग, यल्ला मीर येशु ख्रिस्तन प्रभु आंका स्वीकार शेस्तीर आल्ले मीर वान दिंटल्या नडना.#इफिस 4:17. 7मीर वान दांटल्याने मुळ्ळु फट्टी इंगा वाढास्का फोंडा इंगा यल्ला मिक नेरपीनेद उंडाद आल्ले मीर विश्वासला मजबुत आयकेन फोंडा, इंगा धन्यवाद शेस्केन उंडना.
खोटा शिक्षण विरुद्ध इशारा
8हे ना आक्का तम्मुळ्ळालाला, मीर दिनदी काळजी तिस्कोंडा की, यवाराना मिमलान आ तत्त्वज्ञानता इंगा फसाय मते व्यर्थ माटलाता ताबाला तिस्कुनाराद; याय मन्सुल नेरपीने संप्रदाय तीकेल उंडाय पण ख्रिस्तन तीकेल लेव. 9येनटीक की ख्रिस्तला परमेश्वरदी आंता परिपुर्णता शरीर रुपता निलस्ताद. 10वाड आंता अधिकार इंगा शक्तीक प्रमुख उंडी ख्रिस्तन संगतीला मीर परिपुर्ण आयनार, 11इंगा ख्रिस्तन सुंता विधीता मी पापमय जगीक शरीर तिशेदेंक वस्ताद, याद शेयता कालेद इल्लोनदी सुंता विधी उंडाद दांटल्या मिद पण सुंता आयनाद. 12यवान जताक मीर बाप्तिस्माला बुडशेदेंक वस्तीर इंगा यवाड वान साव लोन्केल लेप्या आद्दे परमेश्वर शक्ती मिंदा विश्वास फेट्टीने इचांग वान जताके मीर पण लेशीनार, 13इंगा मिमलान पण यवार अपराधला इचांग, इंगा देहस्वभावदी सुंता कालेद आंका सच्चीनोर उंटीर, परमेश्वर ख्रिस्तन जताक जित्ता शेशा, इंगा मी अपराधलु क्षमा शेशा;#इफिस 3:13. 14इंगा नियमदी आदी लेख याद मना फेर मिंदा इंगा मना विरुद्ध उंड्या खोडास काड्या इंगा दान क्रुस मिंदा खिळाशी आदी वाड रद्द शेशा. 15वाड सत्ताधीकारीलान इंगा अधिकारीलान मिंदकेल दिंची वारदी खुल्लम-खुल्ला तमाशा शेशा इंगा क्रुसता वार मिंदा विजय मिळाय मत्या.
16दिनिचांग मी तिने-तागे मिंदकेल, फंडगा, अमावस्या लेकाते शब्बाथ बद्दल यवारनीच मिद न्याय शेयानीया कुंडा. 17इ माटलु तर वच्चे माटलाद साट उंडाय; पण ख्रिस्तने प्रत्येक माटाला प्रमुख उंडाड.#इब्री 8:5; 10:1. 18यादुच मनशी खोटा नम्रता इंगा स्वर्गदुतलाद पुजा शेशी मिमलान मी बक्षीसकेल धुराम शेयाराद; इल्लोन मनशी कमशीने माटलाक महत्व इस्ताड इंगा जगीक मनता उत्तेंगाने घमंडता फुगास्ताड. 19इल्लोन मनशी नत्तीन फट्टी निलवाड; आ नत्तीता आंता फयलोनी यमकाल जुळाशी इंगा नसला तीकेल पालन पोषण आय्यी फय मजबुत आयकेन फोयेताप्पुड दानदी दैवी वाढ आयतुनाद.
20दिनिचांग दुन्यामलोन शिक्षा इचांग मीर ख्रिस्तला सच्ची फोयनार, तर दुन्यामला उंडीन लेका मीर येनटीक नडस्तार इंगा वार नियमलाद पालन शेस्तार? 21इदी फट्टाक, आदी तिनाक, दान शेतल्या तिस्कुनाक,#१तीमथी 4:3. 22इ आन्नी माटलु उपयोगला यकोचेताप्पुडे नष्ट आय फोई येनटीक की इ माटलु फक्त मनसुलाय आज्ञाल इंगा शिक्षाल उंडाय. 23इ विधीला स्वता इच्छाद उपासना, मनुद नम्रता इंगा शारीरिक अभ्यास उंडाद आंका दांटल्या खरेम ज्ञानदी भाषा उंडाद, पण शारीरिक वासनालनी थांबाय मतेदेंक इटलाद येमीच उपयोग लेद.
Currently Selected:
COL 2: WNT
Highlight
Copy
Compare
Share
Want to have your highlights saved across all your devices? Sign up or sign in