COL 3
3
ख्रिस्तन जताक कोत्ताद जीवन
1दिनिचांग हे ना आक्का तम्मुळ्ळालाला मिमलान ख्रिस्तन जताक सच्चीनोर लोन्केल जित्ता शेशेदेंक वच्चीनाद तर ख्रिस्त परमेश्वर मंची शेय तीकुड यंदु कुसनीनाड आंदुड वस्तुलान फुडकुना याय स्वर्गला उंडाय. 2स्वर्गलोन माटला मिंदा मन आंचना पृथ्वी मिंदुड माटला मिंदा मन आंचाकुंडा; 3येनटीक की मीर सच्ची फोयनार इंगा मिद जीवन ख्रिस्तन जताक परमेश्वरला दाशी फेटनेद उंडाद. 4मिद जीवन यवाड ख्रिस्त उंडाड वाड प्रगट आय्यी आप्पुड मीर पण वान जताक गौरवला प्रकट शेशेदेंक वच्यार.
5दिनिचांग मी दिंटल्या याय दुन्यामलोनी माटलु उंडाय आटलान मतेसकाडना, आंटे जारकर्म, अशुद्धता, कामवासना, वाईट इच्छाल इंगा लोभ इ माटलु मुर्तीपुजा लेका उंडाय. 6इद्दे माटला इचांगे यवार आज्ञाल पाळायार वार मिंदा परमेश्वरदी कोफाम भडकास्ताद. 7मीर पण पहिला इ माटलाला जीवन जगायदुर आप्पुड इटला लेकाने मीर नडदुर. 8पण इप्पुड मी दिंटल्योनदी कोफाम, शिट्टु इंगा दुष्टपण, निंदा इंगा मी नोरता वाईट माटलु तिट्टेद, इ आन्नी माटलु इडस्काडना. 9वगा-मेगार जताक खोटा माटलाडाकुंडा येनटीक की मीर फाता मनशीन वान फनुला सहीत तीशेस काडनार.#रोम 12:2; २करिंथ 4:16; तीत 3:5. 10इंगा कोत्ता मनशीन फेटकुन्नार, यवाड मना निर्माणकर्ता स्वरुप लेका पुर्ण ज्ञान प्राप्त शेशेदेंक कोत्तांग आयकेन फोयतुनाड. 11दिनदी परिणाम स्वरुप वान दिंटल्या ग्रीक इंगा यहुदी, सुंता आयनोड इंगा कालेनोड, नेरशीनोड इंगा नेरवानोड#3:11 नेरवानोड (स्कुती) आ काळलोन्टोर किंदुड जातीटोर मंदी , दास इंगा स्वतंत्र इल्ला फरके लेद, तर ख्रिस्त आंताच इंगा आंदारला उंडाड.
12दिनिचांग मीर परमेश्वर पवित्र इंगा प्रिय इल्ला निवडाशीनोर मंदी उंडार, आंका करुणायुक्त हृदय, दया, सौम्यता, नम्रता इंगा सहनशीलता धारण शेयना. 13वगा-मेगारदी सहन शेयना इंगा यवारी आना जगडाल उंटे तर वगा-मेगारनी क्षमा शेयना; यल्ला प्रभुड मी अपराधलु क्षमा शेशा आल्ले मीर पण शेयना. 14इ आंदार मिंदा प्रेमदी याद पुर्णताद पट्टा उंडाद आदी कटकोंडा. 15ख्रिस्तद शांती मी अंतकरणला राज्य शेयाला. दानिचांग वगा फय इल्ला आयेदेंक मिद पाचारण आयनेद उंडाद; इंगा मीर धन्यवादीत उंडाला. 16ख्रिस्तनी वचनलु मी हृदयला शेंगेम उंडाला. मीर आंदार ज्ञानता वगा-मेगारकी नेरपुना इंगा चेतावनी इंडा; मी अंतकरणला परमेश्वरकी भजन, फदुल इंगा आत्मिक स्तुतीगीतलु फाडना. 17इंगा शब्दलाता लेकाते फनुलाता येम पण मीर शेशार, आदी आंता प्रभु येशु फेरता शेयना; इंगा वान तीकेल परमेश्वर आब्बानकी धन्यवाद इंडा.
ख्रिस्ती परिवारदी जीवन
18हे वडतुलाला, यल्ला प्रभुला योग्य उंडाद आल्ले मीर मना-मना मोगुन अधिन उंडा.
19हे मोगुडलाला, मना-मना वडती मिंदा प्रेम शेयना; वार जताक कठोर व्यवहार शेयाकुंडा.
20हे बिळ्ळालाला, मीर आन्नी माटलाला मी आम्मा-आब्बानदी आज्ञापालन शेयना येनटीक की इदी प्रभुनकी आवडास्ताद.
21हे आब्बागारलाला, मीर मी बिळ्ळाक कोफाम येका दाकुंडा; इल्ला कावाराद की वारदी हिम्मत तेगी फोई.
22हे दासलाला, फयता यवार मी मालकुल उंडार वार आन्नी माटलाद आज्ञापालन शेयना. मनसुलान खुश शेशे नोकर लेका सुपेदेंक लेद; तर शिंगार मनता प्रभुनदी यरपु फेट्टी शेयना. 23इंगा येम पण मीर शेस्तार आदी मन्सुला इचांग आंका शेयाकुंडा तर प्रभुन इचांग आंका मन आंची शेयना. 24प्रभुन तीकेल वतनदी प्रतिफळ मिक शिक्की इदी मिक यरका उंडाद. मीर प्रभु ख्रिस्तनदी सेवा शेस्का उंडा. 25येनटीक की यवाड अन्याय शेस्ताड वानकी अन्यायदी प्रतिफळ शिक्की, येनटीक की परमेश्वर यवारदीच पक्षपात शेय्याड.
Currently Selected:
COL 3: WNT
Highlight
Copy
Compare
Share
Want to have your highlights saved across all your devices? Sign up or sign in