Lûkə 8
8
Balân ábə́ bá pɔ́ŋí Yésuwə á mbís
1Á mbís ɛ púndá Yésuwə a kǐ á mikí mínə̂n na mítə́kə̂n álí byá ndúm ɛ mbâ tɛ́ŋgɛnɛ janiya lí Dyǔ. Bawútú bá mɔ dyǔm na bábɛ̂ bá bílí na mɔ́. 2Balân ábə́ bá wɔ́ŋí midî mí bî na banyambɛ̂ jǐta ábə́ a pwisíní bɔ́ pə́ bá bílí na mɔ́. Balân bâ bá bílí, Meríyə́ awə̌ a fí a nkí n Mátála, awə̌ a fúlíní midî mí bí shyǎmbɛ á nyǔ, 3Johána, mwalân mú Kúsa, awə̌ a bílí nlú n babwə bá ndutu bá Hɛ́rɔdə, Susána, na balân bápə́pə̂ jǐta. Balân bâ bá bílí ɛ bwəlan byə̌m bí bɔ álí kúmbɛ́ Yésuwə na bawútú bá mɔ.
Ŋganú ɛ mɔʼ awə̌ a kǐ ɛ sǔ mbuta
4Baʼ jǐta bá fí á mikí álí paʼ ɛ́ mín Yésuwə. Ngə bá shúmání fǔm bufɔ́ a pɔ́ŋí bɔ́ ŋganú nána, 5“Mɔ nfɔ́ a bílí awə̌ a kǐ álí sǔ mbuta ɛ́ ngvwi. Ngə a bílíní yɔ́ ɛ sǔ, duŋgu lí kfúndí á nji, áfə́ baʼ ábə́ bá bílí ɛ́ túm bá dyáŋtí yɔ́ na makwi, ti manɔn má pílí má sɔ́mí mɔ́. 6Duŋgu lí kfúndí a málɛ́ átin ti mbvum ɛ́yî ɛ́ kə́kí ndé ɛ́ gvúlí á ɛ́tútú nána ndɔʼ ɛyə̌ ɛ dí á malɛ́ ámǐn ɛ sə̌ ɛ́ kɔ́ngɔ́ madí. 7Duŋgu lípə́pə̂ lí kfúndí áfə́ mídfungu mí bílíní. Á púndá ɛyə̌ mbuta ɛ kɔ́líní, mídfungu mí káŋí mbuta álí kɔʼ. 8Ndé duŋgu lípə́pə̂ lí kfúndí á ndɔʼ ɛ mbâ. Mbvum ɛ́yî ɛ́ kɔ́lí ti ɛ yɛ́ jǐta. Duŋgu lí bílɔŋ bí ngvwi bî n wɔ́ŋ bilɔŋ ká mbúki.” Ngə Yésuwə a malíní a byábí pə́ nána, “Ká njá awə̌ a wɔ́ŋí matwî a wú.”
Yǔm ɛ́yə́ ɛ́ bwə́lí Yésuwə a tfúm ŋganú
9Á mbís ɛ púndá bawútú bá Yésuwə bá kɔ́ndɛ́ mɔ́ nána a tɛ́lɛ bɔ́ yándá lí ŋganú ɛni. 10Ti a pɔŋí bɔ́ nána, “Dyǔ lí bə́kí nyə́ wunja, álí bí kfun ɛ janiya lí Dyǔ. Ndé baʼ bápə́pə̂ bá wúlán yɔ́ ngə ŋganú, álí bwə nána,
bá mín ndé bá sə̌ ɛ́ yəm,
bá wú ndé bá sə̌ ɛ sɔ́ntan.”
Yésuwə á túkú ŋganú ɛ li sǔ mbvum
11“Sɔnsɔ́nǎn kə̌ wə̌ n túku nyə́ ŋganú ɛni. Mbvum ɛ dí ɛyala ɛ́ Dyǔ. 12Mbvum ɛ́yə́ ɛ́ kfúndí a nji ámǐn ɛ́ lúfú bá ábə́ wə̌ti bá wúkí ɛ ɛyala ɛ Dyǔ, dɛ́vɛl ɛ̌ paʼ bɔ́ yɔ́ ɛ fúl á nlə́m ngə bá si dúbɛ́ní Dyǔ bá kwísí lishuŋgɛ. 13Mbuta ɛyə̌ ɛ́ kfúndí á malɛ́ átin ɛ́ lúfú baʼ ábə́ wə̌ti bá wúkí ɛyala ɛ́ Dyǔ bá kasí yɔ́ na munyɛŋgɛ. Ndé ɛyala ɛ́yî ɛ́ búkiyǎ wudya á nlə́m m bɔ. Bá dúbɛ́ Dyǔ a mǎ púndá ɛyə̌ ɛ yábyǎ átin, wə̌ti púndá ɛ makiksɛ ɛ pilí, bá tfwəm. 14Mbuta ɛyə̌ ɛ kfúndí á mídfvungu átin, ɛ́ lúfú baʼ ábə́ wə̌ti bá wúkí ɛyala ɛ Dyǔ, a líshúkan, wudi wú nkínshíyə, sə́m ɛ li wɔ́ŋ byə̌m bí mbâ jǐta, na luŋgɛ́ lí mbâ a nkínshíyə bí lwínjí bɔ́ milə́m. Ɛ́yî ɛ́ bwə bɔ́ bá si púl ɛ yɛ́ bipum bí mbâ. 15Ndé mbuta ɛyə̌ ɛ kfúndí á ndɔʼ ɛ mbâ ɛ́ lúfú bá ábə́ bá wúkí ɛyala ɛ́ Dyǔ na nlə́m m bɔ nsə́sə̌n ti bá kɔ́ŋgɔ́ní yɔ́ a nlə́m n bɔ átin. Ɛ́yî ɛ́ bwə nána, bá tfúl milə́m kə́ŋkə́ŋ bá jyɛ́ bípum bí mbâ.
Ɛ sə̌ ɛ́ shwɛlí ɛtrúkán ɛ́yə́ bá yúlíní
16Mɔʼ ká nfɔ́ a sə̌ yǔl ɛtrúkán a shwɛ́lí yɔ́ á ɛkfuʼ áshí tɔ a shwɛlí yɔ́ a wúti áshí. Ndé ǎ kəlí yɔ́ ámǐn álí bwə nána mɔʼ na mɔtɛ́ awə̌ ǎ kwilí á ndáʼ ǎ mín wǔm. 17Yǔm tɛ́ ɛ́yə́ ɛ́ dí a kfun átin, ɛ nyít á mpóma. Yǔm tɛ́ ɛ́yə́ ɛ sɔ́mɔ́ní a kfun átin ɛ́ bíyan, ɛ nyít a ɛbúkatîn. 18Áfánikə̌ nyí nǔŋ púndá, ngə nyí wúkání. Mɔtɛ́ awə̌ a sɔ́ntání kfûn ɛ janiya lí Dyǔ, Dyǔ lí bán pə́ mɔ́ sɔ́ntan. Ndé awə̌ a wɔ́ŋiyǎ sɔ́ntan á bɔ́lɔ́n ká mǎ sɔ́ntan ɛyə̌ a wɔ́ŋíní.”
Nyǎ mú Yésuwə na bǎn bá nyǎ bá mɔ
19Nyǎ mú Yésuwə na bǎn bá nyǎ bá mɔ, bá pílí mɔ́ ɛ mín, ndé bá púliyǎ ɛ́ paʼ á nsaŋ m mɔ á ɛ́tútú ɛ́ límuti lí baʼ álə́ lí kámbú mɔ. 20Mɔ nfɔ́ a byábí á Yésuwə nána, “Nyǎ n wə na bǎn-bá-nyǎ bá wə bá tyə́bí á ɛbúkatîn, bá sa wə̂ ɛ mínán.” 21Yésuwə a pushú bɔ́ nána, “Baʼ ábə́ bá wú ɛyala ɛ́ Dyǔ, bá bwə̌ yǔm ɛ́yə́ ɛ́ byábíní bɔ́ bá dí nyǎ na bǎn-bá-nyǎ bá myə.”
Yésuwə a fwɛ́sí ɛkful
22Bǔn bufɔ́, Yésuwə a kwilí á bwálu na bawútú bá mɔ, ti a byábí á bɔ́ nána, “Sí túm á pɛsi ɛ mbô ɛníní.” 23Ngə bá bílíní ɛ kə, Yésuwə a kfúndí wuyɔ́. Ti ɛkful ɛnə̂n ɛ́ tání bɔ́ áwútitîn wú mádí. Madí má bútí ɛ́ kwílí a bwálu kə́ŋkə́ŋ bá bútí ɛ kani nána bwálu bú kwilí á madí átin. 24Bawútú bá mɔ bá kǐ mɔ́ ɛ wumu, bá pɔŋá mɔ́ nána, “A sísə̂, ɛ sísə̂, sí kə ɛ́ wá!” Yésuwə a wumú ti a kándí ɛkful. Ɛkful ɛ́ fwɛ́sí ti madí ámə́ má bílí ɛ́ pulu má dyɛ́ pǐ. 25Ti a kɔndɛ́ bawútú bá mɔ nána, “Nyí dúbɛ̌ mî?” Ndé bá bílí manyáká, bɔŋ pə́ bú kú bɔ́, ti bá kɔ́ndɛ́ bɔ́mə̌n nána, “Njá mɔ́lə́ ani, awə̌ ǎ kándí ɛ́kful na madí kə́ŋkə́ŋ má wúkán mɔ́!”
Yésuwə a pwisí mɔ awə̌ midî mibî mí bílíní á nyǔ
26Yésuwə na bawútú bá mɔ bá túmbí mbô ámǐn a Gálilî, ti bá pílí a pɛsi ɛníní á pɛsi mbú ɛ Gerasinə.#8:26 Gerasinə: Dungu lí kâti ɛ wusú ɛ wɔ́ŋí Gadara, Dungu lí pə́pə̌ lí wɔ́ŋí Gɛgɛsa. 27Ngə Yésuwə a nyítíní á bwálu, a tání mɔ awə̌ a bílí mwǎn a nkí awə̌ midî mibî mi bílíní á nyǔ jǐta. Ɛ̂ m mə̌ dyɛ jǐta ɛ́yə́ mɔ ani a bíliyaní ɛ́ fá maba a nyǔ. A bíliyǎ ka pə́ ɛ́ dyɛ a ndáʼ, ndé á sɔŋgɔ. 28Ngə a míníní Yésuwə a fə́mí liji, a shwátí nyǔ ɛ́ mɔ á makwi má Yésuwə ti a byábí nána, “Yésuwə, Mwǎn a Dyǔ lí Ngvum, yə̌ ɛ̌ sakání mi? Nǎn yɔ́m wə, ɛ si kɔ́ksɛ́ mí.” 29A byábí nâ á ɛ́tútú nána Yésuwə a kándí mudî m bî mû nána n nyít mɔ́ á nyǔ. Mudî m bî mû m bílí mɔ́ ɛ taki bitî jǐta. Ká ngə bá bílíní mɔ́ ɛ́ tfúl na mgbɔ́kɔbí, a lúŋgú mgbɔ́kɔbí yî ɛ pá, ti mudî m bî mû n kánání mɔ́ á ɛ́sínj. 30Ti Yésuwə a kɔndɛ́ mɔ nána, Yán dǐn lí wə lí díní? A Pushú mɔ́ nána, “Limuti.” A pushú mɔ́ nâ á ɛ́tútú nána midî míbî jǐta mí mə́ mɔ́ ɛ kwilí á nyǔ. 31Midî mi bî mî mí yɔ́mbí Yésuwə nána a si pum bɔ́ á ɛjúká ɛ́yə́ ɛ́ wɔ́ŋiyǎ líshúʼ. 32Sɔnsɔ́nân, ndíŋgí n nə̂n n ngwi m bílí fâ bɛbɛ, ɛ́ bílí ɛ dyá áfâ á nsaŋ ŋ wukul áshí. 33Ti midî míbî mî mí yɔ́mbí Yésuwə nána “Lúm sə́ á ngwi ɛ́yî, ɛ bə̂ sə́ wunja álí kwilí bɔ́ átin.” Yɔ̂ Yésuwə a bəkíní midî míbî mî wunja, ti mí nyítí á nyǔ ɛ́ mɔ ani. Ngə mí nyítíní á nyǔ ɛ́ mɔ ani, mí kwílí á nyǔ ɛ ngwi ɛ́yî átin. Áfâ-áshí-áshí ndíngí n ngwi ɛ́yî ɛ́ búkú, ɛ́ kanán mífílí á mbə́ŋ ámə́ m bílí á nsaŋ m mbô, ɛ́ kfúndí á madí átin, ti ɛ́ wúlí. 34Batátiya bá ngwi ábə́ bá bílí ɛ́ tátí ngwi ɛ́yî, bá míníní yə̌ ɛ́yə́ ɛ́ bwə́lání, bá kí mifílí shám, bá kánání nkala mú yǔm ɛ́yə́ ɛ́ bwə́lání á nkí átin na á mabú ámə́ má wútání. 35Ngə baʼ bá wúkíní nkala mû bá kǐ ɛ mín yə̌ ɛ́yə́ ɛ́ bwə́lání. Ngə bá pílíní á Yésuwə, bá tání mɔ awə̌ midî mí bî mî mí nyítíní á nyǔ a shumání álí wútan Yésuwə, na mabaʼ má mɔ a nyǔ, a mə̌ ɛ́ dyɛ̌ bwâm. Bɔŋ bú kúwí bɔ́ baʼ básə́sə̌n. 36Baʼ ábə́ bá míní yǔm ɛ́yə́ ɛ́ bwə́lání, bá pɔ́ŋí baʼ ngə Yésuwə a pwisíní mɔ ani. 37Ti baʼ básə́sə̌n á pɛsi ɛ mbú ɛni bá pɔ́ŋí Yésuwə nána a fálu a ndɔʼ ɛ bɔ á ɛ́tútú nána bɔŋ wúnə̂n wú kúwí bɔ́. Ti Yésuwə a kwilí á bwálu, a kǐ mɔ́. 38Mɔ awə̌ midî míbî mî mí nyítíní á nyǔ, a yɔ́mbí Yésuwə nána, “Sûn wə̌ n kə́ na wə.” Ndé Yésuwə a pɔŋí mɔ́ nána, 39“Tǐm á nkí n wə ɛ pɔ̂ŋ baʼ yǔm ɛnə̂n ɛyə́ Dyǔ lí bwəlíní wə.” Ti mɔ ani a kǐ á nkí átin a butí baʼ ɛ pɔŋ yǔm ɛ́yə́ Yésuwə a bwəlíní mɔ́.
Yésuwə a bwəlí mwǎn awə̌ a gvúlí a tîm á lungɛ́, a pwisí pə́ mwalân awə̌ a n wɔ́ŋ nyambɛ̂ a makǐ
40Ngə Yésuwə a timbíní á pɛsi ɛ mbô ɛ níní, baʼ jǐta bá kásí mɔ́ na munyɛŋgɛ á ɛ́tútú nána bá bílí mɔ́ ɛ sinj. 41Ti mɔ nfɔ́ awə̌ bá bílíní ɛ bə̌ŋ bá Jáyírusə a pilí á mɔ. Jáyírusə a bílí á ndíŋgí m bâʼ ábə́ bá bílí ɛ janiya ndáʼ ɛ makáni ɛ baʼ bá Ísrɛl. A kfúndí á mákwi má Yésuwə, a yɔ́mbí mɔ́ nána bá kə̂ á ndáʼ ɛ́ mɔ. 42Á ɛ́tútú nána ápɔkɔ̂ a mwǎn a mwalân mɔ awə̌ a bílí mimbvú dyǔm na míbɛ̂ a n mə̌ ɛ́ wútan álí wá.
Ngə Yésuwə a bílíní ɛ kə, limuti lí bâʼ lí kámbú mɔ́. 43Á limuti lí bâʼ lî átin mwalân nfɔ́ a bílí á wə́ awə̌ a wɔ́ŋí nyambɛ̂ awə̌ makǐ má bílíní mɔ́ ɛ fí á nyǔ m mɔ ɛ mwalân ɛtîtɛ́. Nyambɛ̂ ani a m mə̌ mɔ́ ɛ dyɛ á nyǔ mimbvú dyǔm na míbɛ̂, ndé mɔ ká nfɔ́ a púliyǎ mɔ́ ɛ pwisí. 44Ti a nyítí á mbís ɛ́ Yésuwə a nyɔtí lishúkí lí nku m mɔ ámə́ m bílí mɔ a nyǔ. Áfâ áshí áshí makǐ mâ má lɛ́ní. 45Yésuwə a kɔndɛ́ nána, “Njá a nyɔtí mî?” Mɔ ká nfɔ́ a púshúwá. Ndé Píta a byábí nána, “A sísə́, ngáʼ baʼ jǐta bá kámbú wə, bá nyíshí wə̌?” 46Ndé kánâwə̌ Yésuwə a byábí nána, “Mɔ a nyɔtí mi, á ɛ́tútú nána ŋ wúkí ngə ngínya ɛ nyítíní mi á nyǔ.” 47Ngə mwalân ani a yəmbíní nána a sî púlá ɛ́ shwɛlí nyǔ ɛ́ mɔ, a bílí ɛ sáʼ na bɔŋ. A kfúndí mɔ́ á mákwi. Ti a byábí á wusú wú baʼ básə́sə̌n yǔm ɛ́yə́ ɛ́ bwə́lí mɔ́ ka a nyɔ́tí Yésuwə, na ngə a pwíní áfâ áshí áshí. 48Ti Yésuwə a byábí á mɔ́ nána, “Wə mwǎn-a-mwalân dúbɛ lí wə lí pwísí wə. Kə̌ na musaŋgu.”
49Ngə Yésuwə a bílíní ɛ byá, nkə̌ a ndúm a fí á ndáʼ ɛ́ Jáyírusə. Ti a byábí nána, “Ɛ si takí mulɛ̂, mwǎn n wə ámə́ ɛ wá.” 50Ngə Yésuwə a wúkí na, a pɔŋí Jáyírusə nána, “Ɛsi wú bɔŋ, dúbɛ nána mwǎn n wə á pwí.” 51A púndá ɛyə́ Yésuwə á pílíní á ndáʼ ɛ́ Jáyírusə, a púshwǎ nána mɔ a mpə́pə̂ a kwíli a ndáʼ átin ɛ́ si túm Píta, Jɔnə́, Jémsə na sáŋ na nyǎ bá mwǎn ani. 52Baʼ básə́sə̌n ábə́ bá bílí áwə́, bá bílí ɛ ji, bá fá pə́ malɛwu. Yésuwə a pɔŋí bɔ́ nána, “Nyí si ji pə́, mwǎn ani a nan gvúlíyǎ wə́, wuyɔ́ bɔ́ ǎ nalíní.” 53Baʼ básə́sə̌n bá bílí mɔ́ ɛ wɛli á ɛ́tútú nána bá mbí nána mwǎn ani a m mə̌ ɛ́ wá. 54Ti Yésuwə a kúwí mɔ́ ɛkɛ́, ti a byábí a mɔ́ nána, “Mwǎn, tyə́ ámǐn.” 55Ti mudî m mɔ n tímbí mɔ́ á nyǔ, ti a wumú áfâ áshí áshí. Yésuwə a pɔŋí bɔ́ nána bá bə́ mɔ́ lidyá. 56Sáŋ na nyǎ bá bílí manyáká, ndé Yésuwə a pɔŋí bɔ́ nána bá si pɔŋ ká mɔ yǔm ɛ́yə́ ɛ́ bwə́lání.
Currently Selected:
Lûkə 8: bwt
Highlight
Copy
Compare
Share
Want to have your highlights saved across all your devices? Sign up or sign in
