Masmur 42
42
ETET 2
MASMUR 42-72
Wambekero wamakata Amisye Ai no Apa Yavar
1Susyo Kora awa ransyerano ananyao. Nto irati akari po vatano matayao ukiny maugavo ransyerane rai ai.
2Maisyare rusa awa ngkamandi, weti bekero mana njayaisye rai,
maisyare omai tavon, sya jugara so bekero sya Amisye Winai.
3Amisy Winyi njayaisy, sya jugara so bekero de mararai Winaiji,
nanduija umba syakaore beaje Nai no Nya yavar?
4Siman, naman inami ngkaru nsoyan,
syonae syo anaisye raisyi.#42:4 syonae syo anaisye raisyi: ayao Ibrani mo ratoe maisyare so: ‘‘inami ngkaru mbe anaibe syo raisy.’’
Masyote anteter sya marova wo inakekebe ware:
‘‘Nya Amisye Pi ro, yara aemeno nai ramu ge?’’
5Inanuga so ranimaumbe, arono rui inaemen akato wusyine rai,
arono ono masyoto akokoe#42:5 ono masyoto akokoe: Kel. 23:14-19; Maz. 118:27 rai, rito no Yavaro AMISY,
itavono vatano wanui mai, iteto usye rai,
reambovambe, reansananibe nggwagwaimbe, kinyo ransyeran kangkamane rai.
6Mbe animaibe inanuga so mamaun?
Mbe animaibe rinanimaumbe no inanuga so rai?
Koveamo inanaveano Amisye obo amen,
weye Opirati sya Amisy, Po inapaya irati kakai rai,
weti indati syo kove raura seo Ai jakato.
7Inanuga so mamaun, weti inaemen akaore Amisye Winai,
nai varoro mana Yordan, muno unato Hermon, nai unato Misar.
8Amisy, Nyo anakotaro nsosobe raude rinai tutir ti mo inatawanto,
ama vambunine maisyare mana vuko mpanyoan nsopato pene rai wemaisy.
Inanimaumbe mo inapinto,
maisyare manayam akoe Nyo raugaje ti mo inapinto wemaisy.
9AMISY Po Apa muinyo no tawane rarorono rinai, no sansimane rai,
weti arono naman rikinyo ransyerane raijo Ai,
omamo sya sambaya idaura to Amisye Ai, Wepirati rijayaisyo Ai.
10Amisy Wepirati sya unato oram inamamavube Ai, syo raura to Ai, syare:
‘‘Mbe animaibe winakirive inai?
Mbe animaibe sya marova wo rinatawanto,
weti rinanimaumbe tutir?’’
11Inanuga#42:11 inanuga: no ayao Ibrani raijamo mo ‘‘pae’’ ratoe. so ngkupi rawaumbe rave,
weye sya marova wo inaura tantunawi.
Masyote anteter wo inakekebe ware:
‘‘Nya Amisye Pi ro, yara aemeno nai ramu ge?’’
12Mbe animaibe inanuga so mamaun?
Mbe animaibe rinanimaumbe no inanuga so rai?
Koveamo inanaveano Amisye obo amen,
weye Opirati sya Amisy, Po inapaya irati kakai rai,
weti indati syo kove raura seo Ai jakato.
Currently Selected:
Masmur 42: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)