Jénesis 24

Isak No Rebeka

1Bainhira Abraão katuas ona no idade boot, no Nai haraik bensaun ona ba Abraão liu hosi buat hotu, 2Abraão dehan ba ninia atan primeiru iha nia uma kain, nebee toma-konta ba ninia sasaan hotu, “Favór ida, tau o nia liman iha hau nia ain kelen okos,#24:2 Sira halo hanesan nee hodi halo juramentu metin. 3no hau sei halo o jura liu hosi Nai, Maromak iha lalehan, no Maromak iha mundu, katak o sei la foti feen ida ba hau nia oan mane hosi ema Kanaan nia oan feto sira, iha fatin nebee hau hela nee. 4Maibee o sei baa hau nia rai, no baa hau nia família, no foti feen ida ba hau nia oan mane Isak.” 5Maibee atan nee dehan ba nia, “Se karik feto nee lakohi tuir hau too iha fatin nee, nunee hau tenki lori ita boot nia oan mane ba ita boot nia rai iha nebaa ka?” 6Abraão hataan ba nia, “Kuidadu katak o la lori hau nia oan mane baa nebaa. 7Nai Maromak iha lalehan, nebee foti hau hosi hau nia aman nia uma kain, no hosi hau nia família nia rai, no koalia ba hau, no jura ba hau dehan, ‘Hau sei foo rai nee ba o nia bei-oan’,#24:7 Haree Jénesis 12:7 no nota. Nia mak haruka anju uluk o, no o sei hetan feen ida ba hau nia oan mane hosi fatin nebaa. 8Se karik feto nee lakohi tuir o, nunee o sei livre hosi juramentu nee, só deit keta lori hau nia oan baa nebaa.” 9Entaun atan nee tau nia liman iha nia patraun Abraão nia ain kelen okos no jura ba nia kona ba buat nee.

10Depois atan nee foti kuda kamelu sanulu hosi ninia patraun nia kuda kamelu sira no nia sai. Nia lori sasaan oi-oin hosi ninia patraun. Nia hamriik no nia baa too iha Mezopotámia,#24:10 Ebreu Aram-Naharaim katak ‘Aram iha Fatin ho Mota Rua’ nebee iha Síria nia parte norte. ba sidade Naor.

11No nia halo nia kuda kamelu sira tuur iha sidade liur besik iha bee posu ida iha tempu rai nakaras, iha tempu nebee feto sira sai mai hodi kuru bee. 12No nia dehan, “Oh Nai, hau nia patraun Abraão nia Maromak, favór ida, foo susesu mai hau ohin loron, no hatudu domin metin ba hau nia patraun Abraão. 13Tebes, hau hamriik dadaun iha bee posu nia sorin no ema sidade nia oan feto sira sai mai hodi kuru bee. 14Husik buat nee bele akontese, katak feto ida nebee hau dehan, ‘Favór ida, hatuun o nia sanan rai, hodi hau bele hemu,’ no nia hataan, ‘Hemu ba, no hau sei foo hemu mos ba ita boot nia kuda kamelu sira,’ katak feto nee mak ida nebee O hili ba O nia atan Isak. Liu hosi sinál nee hau bele hatene katak O mak hatudu tiha domin metin ba hau nia patraun.”

15Molok nia koalia hotu ona, tebes, Rebeka sai mai, nebee moris hosi Betuel, oan mane hosi Milka, feen hosi Naor, Abraão nia maun. Rebeka mai ho nia sanan rai iha nia kabaas leten. 16No feto nee oin bonita loos no nia sei virjen hela. Mane ida seidauk toba ho nia. Nia tuun ba bee matan no enxe nakonu ninia sanan rai no sae mai. 17No atan nee halai hodi hasoru nia no dehan, “Favór ida, foo bee uitoan hosi o nia sanan rai hodi hau bele hemu.” 18No nia hataan, “Hemu ba, hau nia senhor.” No nia hatuun lalais ninia sanan rai iha nia liman no foo ba nia hemu. 19Bainhira Rebeka foo ona ba nia hodi hemu, Rebeka dehan, “Hau sei kuru mos bee ba ita boot nia kuda kamelu sira, too sira hemu hotu.” 20Rebeka baa lalais no fui bee hosi ninia sanan rai ba animál nia hemu fatin, no nia halai fali ba bee matan hodi kuru bee. Nunee nia kuru bee ba mane nee nia kuda kamelu hotu. 21Mane nee hakfodak tanba feto nee. Maibee nia nonook hela hodi haree oinsaa Nai foo susesu ba ninia viajen ka lae.

22Bainhira kuda kamelu sira hemu too hotu, mane nee foti brinkus inus nian ida hosi osan mean pedasuk sorin, no kelu osan mean rua ba nia liman ho todan hanesan osan mean pedasuk sanulu.#24:22 Pedasuk nee mak sekel, nebee brinkus inus mak grama 6, no kelu mak grama 110, nebee kelu boot. 23Nia dehan, “O mak oan feto hosi see? Favór ida, foo hatene mai hau. O nia aman iha fatin hodi ami bele toba kalan nee ka?” 24Feto nee hataan ba nia, “Hau mak oan feto hosi Betuel, oan mane hosi Milka, nebee laen mak Naor.” 25No feto nee dehan tan ba nia, “Ami iha duut no ai haan natoon ba animál sira, no kuartu hodi toba.” 26Mane nee hakruuk ho oin ba rai no adora ba Nai. 27Nia dehan, “Adora ba Nai, hau nia patraun Abraão nia Maromak, nebee la husik Ninia domin metin no fidelidade ba hau nia patraun. Hau lao iha dalan no Nai lori hau ba hau nia patraun nia maun nia uma.” 28Depois feto raan nee halai no foo hatene ba ninia inan nia uma kain kona ba buat hotu nee.

29Rebeka iha maun ida naran Labão, no Labão halai ba mane nebee sei iha bee posu. 30Bainhira nia haree brinkus no kelu sira iha ninia alin feto nia liman, no bainhira nia rona ninia alin feto Rebeka nia liafuan, nebee dehan, “Mane nee koalia hanesan nee mai hau,” nunee nia baa hasoru mane ida nee, no tebes mane nee sei hamriik ho nia kuda kamelu sira iha bee posu. 31Labão dehan, “Tama mai, ida nebee simu bensaun hosi Nai, nusaa mak ita boot hamriik iha liur? Tanba hau prepara tiha uma no fatin ba kuda kamelu sira. 32Mane nee tama uma, no kore ninia kuda kamelu sira, no foo ba kuda kamelu sira duut no ai haan. Nia hetan bee hodi fasi nia ain no ba ema sira nebee hamutuk ho nia hodi sira bele fasi sira nia ain. 33Depois ema tau hahaan iha mane nee nia oin hodi nia bele haan. Maibee nia dehan, “Hau lakohi haan too hau hatoo hau nia mensajen.” Labão dehan, “Koalia ba.”

34No nia dehan, “Hau mak Abraão nia atan. 35Nai mak haraik bensaun boot ba hau nia patraun, no nia sai ema boot. Nai foo ba nia bibi lubun sira, karau lubun sira, osan mutin, osan mean, atan mane sira, atan feto sira, kuda kamelu no kuda buru sira. 36Sara, hau nia patraun nia feen, tuur ahi hetan oan mane ida ba hau nia patraun bainhira feto nee ferik ona. No hau nia patraun foo buat hotu ba oan mane ida nee. 37Hau nia patraun obriga hau jura no nia dehan, ‘Keta foti feen ida ba hau nia oan mane hosi ema Kanaan nia oan feto sira, iha rai nebee hau hela nee. 38Maibee o tenki baa hau nia aman nia uma kain, no baa hau nia família, no foti feen ida ba hau nia oan mane hosi nebaa.’ 39Hau dehan ba hau nia patraun, ‘Se karik feto nee lakohi tuir hau.’ 40No nia hataan, ‘Hau lao iha Nai nia oin. Nia sei haruka Ninia anju baa hamutuk ho o no foo susesu iha o nia dalan. O sei foti feen ida ba hau nia oan mane hosi hau nia família no hosi hau nia aman nia uma kain. 41Depois o sei livre hosi hau nia juramentu nee, bainhira o baa too hau nia família. Se karik sira la foo feto ida, o sei sai livre hosi hau nia juramentu.’

42Tuir mai, iha ohin loron nee, hau mai too bee posu nee no dehan, ‘Oh Nai, hau nia patraun Abraão nia Maromak, se karik O bele foo susesu agora ba hau nia dalan, 43tanba tebes, hau hamriik hela besik bee posu nee. Bainhira feto raan ida mai hodi kuru bee no hau dehan ba nia, “Favór ida, foo mai hau bee hemu uitoan hosi o nia sanan rai,” 44no nia hataan, “Ita boot hemu ba, no hau sei kuru bee ba ita boot nia kuda kamelu sira,” nunee husik feto ida nee sai ida nebee Nai mak hili ba hau nia patraun nia oan mane.’

45No molok hau koalia hotu ona iha hau nia fuan laran, tebes, Rebeka sai mai ho ninia sanan rai iha nia kabaas leten. Nia tuun ba bee posu hodi kuru bee no hau dehan ba nia, ‘Favór ida, husik hau bele hemu,’ 46no nia hatuun ninia sanan rai lalais no dehan, ‘Hemu ba, no hau sei foo hemu mos ba ita boot nia kuda kamelu sira.’ Nunee hau hemu, no nia foo hodi kuda kamelu mos bele hemu. 47Hau husu nia, ‘O mak oan feto hosi see?’ no nia dehan, ‘Oan feto hosi Betuel, oan mane hosi Naor, nebee moris hosi Milka.’ Depois hau tau brinkus ba nia inus no kelu iha nia liman. 48Hau hakruuk ho oin too rai no hahii Nai, no adora Nai, hau nia patraun nia Maromak, nebee lori hau iha dalan loos ba hau nia patraun nia maun nia oan feto no nia oan mane. 49Agora, se karik ita bele halao domin metin no fidelidade ho hau nia patraun entaun foo hatene mai hau, maibee se lae, foo hatene mai hau, hodi nunee hau bele fila ba sorin loos ka sorin karuk.”

50Labão no Betuel hataan, “Buat nebee mai hosi Nai nee, ami la bele koalia katak buat nee diak ka la diak. 51Tebes, Rebeka mak iha ita nia oin, foti nia no baa, no husik nia sai ita nia patraun nia oan mane nia feen, tuir buat nebee Nai koalia ona.”

52Bainhira Abraão nia atan rona sira nia liafuan, nia hakneak kedas ba Nai ho oin ba rai. 53Atan nee lori mai sasaan osan mutin nebee furak, no sasaan osan mean nebee furak, no ropa sira no foo ba Rebeka. No nia foo mos ba Rebeka nia maun no buat furak sira ba Rebeka nia inan. 54Sira haan no hemu, atan nee no mane sira nebee hamutuk ho nia, no sira toba kalan tomak. Depois sira hadeer iha dadeer, no atan nee dehan, “Haruka hau fila ba hau nia patraun.” 55Rebeka nia maun no nia inan dehan, “Husik feto nee hela ho ami loron balu, too loron sanulu ba leten, depois nia bele baa.” 56Maibee nia dehan ba sira, “Keta halo demora hau. Tanba Nai foo susesu tiha ona ba hau nia dalan. Haruka hau sai hodi hau bele baa hau nia patraun.” 57Sira dehan, “Ami sei bolu feto raan nee, no husu nia hanoin nusaa.” 58Entaun sira bolu Rebeka no dehan ba nia, “O bele baa ho mane ida nee ka lae?” Nia hataan, “Hau bele baa.” 59No sira haruka Rebeka sira nia alin feto, no feto nebee hakiak nia, no Abraão nia atan no ninia mane sira. 60Sira foo bensaun ba Rebeka no dehan ba nia,

“O mak ami nia alin feto,

o sei sai inan ba ema rihun ba rihun,

no husik o nia bei-oan

hadau portaun hosi ema nebee odi nia.”

61Rebeka hamriik, hamutuk ho ninia atan feto sira, no sira sae kuda kamelu sira no tuir mane nee. No atan mane nee lori Rebeka no nia lao baa.

62Isak fila mai hosi dalan ba Beer-Lahai-Roi, tanba nia hela iha rai Negebe. 63Isak lao sai ba rai luan hodi medita iha tempu rai nakaras. Nia foti matan no haree, no tebes nia haree kuda kamelu sira mai. 64Rebeka foti matan no bainhira nia haree Isak nia tuun hosi kuda kamelu. 65Tanba nia dehan ona ba atan mane nee, “See mak mane iha nebaa nebee lao iha rai luan nee hodi hasoru ita?” No atan mane nee dehan, “Ida nee mak hau nia patraun.” Nunee nia foti veo ida no taka ninia oin. 66Atan mane nee foo hatene ba Isak buat hotu nebee nia halo. 67No Isak lori Rebeka ba ninia inan Sara nia tenda, no Isak kaben ho feto nee. Isak hadomi Rebeka, no nia hetan laran kamaan tanba ninia inan nebee mate ona.

Currently Selected:

Jénesis 24: BK

Highlight

Copy

Compare