Jénesis 25

Abraão Mate No Nia Bei-Oan Sira

1 #25:1-16 Haree lista naran sira nee iha 1 Krónikas 1:29-33. Abraão foti feto ida tan naran Ketura. 2Ketura hetan oan Zimran, Joksan, Medan, Midian, Isbak no Suá. 3Joksan hetan Saba no Dedan. Dedan nia oan mane sira mak Asurim, Letusim no Leumim. 4Midian nia oan mane sira mak Efa, Efer, Hanok, Abida no Elda. Ema hotu nee mak Ketura nia bei-oan sira. 5Abraão foo buat hotu nebee ninian ba Isak. 6Maibee ba feen kiik nia oan mane sira, nebee Abraão nian nee, Abraão foo prezenti no haruka sira sai hosi nia oan mane Isak bainhira Abraão sei moris hela. No sira baa diresaun lorosae nian, too iha rai iha parte lorosae.

7Abraão moris too tinan atus ida hitu-nulu resin lima (175). 8Abraão iis kotu, no nia mate ho idade diak, ema katuas no nakonu ho tinan sira, nunee nia halibur ba ninia bei-ala sira.#25:8 Ida nee dehan katak nia mate. 9Nia oan mane Isak no Ismael hakoi nia iha rai kuak iha Makpela. Nee mak rai hosi Efron, oan mane hosi Zoar, ema Hiti, nebee iha Mamre nia oin. 10Rai nee mak rai nebee Abraão sosa hosi ema Hiti sira. No sira hakoi Abraão iha nebaa hamutuk ho nia feen Sara. 11Bainhira Abraão mate ona, Maromak haraik bensaun ba Abraão nia oan mane Isak, no Isak hela besik Beer-Lahai-Roi.

12Jerasaun sira mai hosi Ismael, Abraão nia oan mane nebee Hagar hetan ba Abraão. Feto nee mak ema Ejitu nebee Sara nia atan feto. 13Ismael nia oan mane sira nia naran sira, tuir sira nia jerasaun sira, mak nee: Ismael nia oan boot mak Nebaiote, depois Kedar, Abdeel, Mibsam, 14Misma, Duma, Masá, 15Hadad, Tema, Jetur, Nafis no Kedema. 16Mane sira nee mak Ismael nia oan sira, tuir sira nia naran, aldeia no fatin ho moru; liurai nain sanulu resin rua ba sira nia povu. 17Ismael moris too tinan atus ida tolu-nulu resin hitu, no nia iis kotu, nia mate no nia halibur hamutuk ho nia bei-ala sira. 18Sira hela iha rai hosi Havila too iha Sur nebee iha Ejitu nia oin, iha dalan ba Asur.#25:18 Ka ‘iha diresaun ba Asíria’. No Ismael hasoru nia maun-alin sira hotu.

Esau No Jacó Moris

19Ida nee mak Abraão nia oan mane Isak nia jerasaun sira. Abraão hetan Isak. 20Isak tinan haat-nulu bainhira nia kaben ho Rebeka. Rebeka mak oan feto hosi Betuel, nebee ema Aram hosi Padan-Aram. Nia mak Labão, ema Aram, nia alin feto. 21Isak halo orasaun ba Nai tanba ninia feen la iha oan. Nai simu nia orasaun no ninia feen Rebeka sai isin rua. 22Oan rua dudu malu iha Rebeka nia laran. Rebeka dehan, “Se karik hanesan nee, tanba saa mak hau hetan ida nee?” No nia baa halo orasaun ba Nai. 23Nai dehan ba nia,

“Nasaun rua sei iha o nia kabun laran,

povu rua sei sai hosi o nia oan fatin,

povu ida sei forti liu povu ida seluk nee,

no oan boot sei serví ninia alin.”#25:23 Haree Roma 9:12.

24Bainhira nia loron tuur ahi too ona, tebes, iha oan kaduak iha ninia kabun laran. 25Ida primeiru sai ho isin kór mean no fulun taka nia isin tomak hanesan ropa fulun nian, no sira hanaran nia Esau.#25:25 Esau katak ‘fulun barak’, no nia mos iha naran Edom katak ‘kór mean’. 26Tuir mai, nia alin sai, no nia liman kaer hela ba Esau nia ain tuban no sira hanaran nia Jacó.#25:26 Jacó katak ‘kaer ain tubun’. Iha kultura nebaa fraze nee iha sentidu lohi, hamatak ka tahan ema. Isak tinan neen-nulu bainhira Rebeka hetan sira.

27Bainhira oan rua sira nee boot ona, Esau sai kasadór matenek no mane ida nebee iha rai luan, no Jacó sai ema hakmatek#25:27 Ebreu tawm katak kompletu ka perfeitu. no hela iha tenda nia laran. 28Isak hadomi Esau tanba nia gosta haan ninia naan, maibee Rebeka hadomi Jacó.

Esau Faan Ninia Direitu

29Iha loron ida, Jacó tein hela sasoru no Esau tama mai hosi rai luan ho isin fraku. 30No Esau dehan ba Jacó, “Favór ida, foo sasoru mean nee mai hau, tanba hau fraku!” Nunee nia naran mos Edom.#25:30 Edom iha sentidu katak ‘mean’. 31Jacó hataan, “Faan uluk lai ita nia direitu nudar oan boot mai hau.” 32Esau dehan, “Tebes, hau besik atu mate, nunee direitu nudar oan boot nee iha benefísiu saida mai hau?” 33Jacó dehan, “Jura uluk lai mai hau.” No Esau jura ba nia no nia faan ninia direitu nudar oan boot ba Jacó. 34Depois Jacó foo ba Esau paun no sasoru ho koto mean. Esau haan hemu no nia hamriik no baa. Nunee Esau despreza tiha ninia direitu nudar oan boot.

Currently Selected:

Jénesis 25: BK

Highlight

Copy

Compare