Jénesis 26

Maromak Nia Promete Ba Isak

1Rai nee hetan tempu rai hamlaha nebee ketak hosi rai hamlaha primeiru iha tempu Abraão nian.#26:1 Rai hamlaha uluk nee, lee iha Jénesis 12:10. Isak baa Abimelek, ema Filisteu nia liurai, nebee iha Gerar. 2Nai mosu mai Isak no Nia dehan, “Keta tuun ba Ejitu. Hela iha rai nebee Hau hatudu ba o. 3Lao ba-mai iha rai nee, no Hau sei hamutuk ho o, no Hau sei haraik bensaun ba o. Tanba Hau sei foo rai hotu nee ba o, no ba o nia bei-oan sira. Hau sei kumpri juramentu nebee Hau jura ona ba o nia aman Abraão. 4Hau sei habarak o nia bei-oan sira hanesan fitun sira iha lalehan. Hau sei foo rai hotu nee ba o nia bei-oan sira. No liu hosi o nia bei-oan sira nasaun hotu iha mundu sei hetan bensaun.#26:4 Haree Apostolu 3:25. 5Tanba Abraão halo tuir Hau nia lian, no nia halo tuir Hau nia hakarak, Hau nia ukun fuan sira, Hau nia estatutu sira no Hau nia lei sira.”

Isak No Abimelek

6Entaun Isak hela iha Gerar. 7Bainhira ema iha fatin nebaa husu kona ba ninia feen, nia dehan, “Nia mak hau nia alin feto.” Nia tauk atu dehan, “Nia mak hau nia feen,” tanba karik mane sira iha fatin nebaa oho nia tanba Rebeka, tanba Rebeka oin bonita. 8Bainhira nia hela kleur ona iha nebaa, Abimelek, liurai hosi ema Filisteu sira, hateke hosi nia janela no haree, no tebes, Isak halimar ho nia feen Rebeka. 9Abimelek bolu Isak no dehan, “Tebes duni, feto nee mak o nia feen. Nusaa mak o dehan, ‘Nia mak hau nia alin feto’?” No Isak hataan ba nia, “Tanba hau hanoin, ‘Karik hau mate tanba nia.’” 10Abimelek dehan, “O halo saida mai ami? Karik ema ida toba ho o nia feen, nunee o lori sala boot mai ami.” 11Abimelek foo orden ba nia povu tomak no dehan, “Nia nebee book mane ida nee ka ninia feen sei mate duni.”

12Isak kuda toos iha rai nebaa no iha tinan hanesan nia simu rezultadu dala atus ida. No Nai haraik bensaun ba nia. 13Mane nee sai riku tan, no nia lao ba oin too nia sai ema riku liu. 14Tanba nia iha bibi, karau no atan barak. No ema Filisteu sira laran moras ba nia. 15(Ema Filisteu sira taka bee posu hotu nebee Isak nia aman nia atan sira mak kee iha tempu Abraão nian. Ema Filisteu sira halo bee posu sira nee nakonu ho rai.) 16Abimelek dehan ba Isak, “Sai hosi ami, tanba ita mak riku liu ami.”

17Nunee Isak sai hosi fatin nee, no nia harii ninia tenda iha rai tetuk Gerar no hela iha nebaa. 18Isak kee fali bee posu nebee sira kee iha nia aman Abraão nia tempu. Tanba ema Filisteu sira taka tiha bee posu sira nee bainhira Abraão mate ona. No Isak hanaran bee posu sira nee tuir naran nebee uluk ninia aman hanaran ona nee. 19Isak nia atan sira kee rai iha rai tetuk no sira hetan bee matan ho bee nebee suli sai. 20Bibi atan sira hosi Gerar istori malu ho Isak nia bibi atan sira no dehan, “Bee nee mak ami nian.” No nia hanaran bee posu nee Esek,#26:20 Esek katak ‘haksesuk malu’. tanba sira haksesuk malu ho nia. 21Sira kee rai halo bee posu ida tan no sira istori malu mos kona ba bee posu nee. No nia hanaran bee posu nee Sitna.#26:21 Sitna katak ‘diskuti malu’. 22Isak sai hosi fatin nee no nia kee bee posu ida fali no sira la istori malu ho nia. Entaun nia hanaran bee posu nee Reobote,#26:22 Reobote katak ‘fatin luan’. tanba nia dehan, “Agora, Nai halo ona fatin luan mai ami, no ami sei sai buras iha rai nee.”

23Isak sai hosi fatin nee no baa Beer-Seba. 24Nai mosu ba nia iha kalan nee no dehan, “Hau mak o nia aman Abraão nia Maromak. Keta tauk, tanba Hau hamutuk ho o, no Hau sei haraik bensaun ba o, no habarak o nia bei-oan sira tanba Hau nia atan Abraão.” 25No Isak harii altár ida iha nebaa no bolu ba Nai nia naran. Nia tau nia tenda iha nebaa no ninia atan sira kee bee posu iha nebaa. 26Depois Abimelek sai hosi Gerar ho nia maluk Ahuzate no Fikól, komandante ba ninia forsa, no sira baa too Isak. 27Isak dehan ba sira, “Nusaa mak imi mai hasoru hau? Tanba imi odi hau no haruka ona hau sai hosi imi.” 28Sira hataan, “Ami haree duni katak Nai sei hamutuk ho ita. No ami dehan, mai ita halo akordu ida entre ita ho ami, no husik ami halo aliansa ida ho ita, 29hodi ita la halo aat mai ami hanesan ami la book ita. Tanba ami la halo buat ida nebee aat ba ita só ami halo diak deit, no haruka ita sai ho dame. Ita mak ema nebee simu bensaun hosi Nai.” 30Depois Isak halo festa ida ba sira no sira haan hemu. 31Aban dadeer-saan sira hadeer no jura ba malu no Isak haruka sira sai no sira sai hosi nia ho dame. 32Tuir mai, iha loron hanesan nee, Isak nia atan sira mai no foo hatene ba nia kona ba bee posu nebee sira kee, no sira dehan “Ami hetan ona bee.” 33Isak hanaran bee posu nee Seba, nunee sidade nebee iha nebaa mak hetan naran Beer-Seba too ohin loron.

34Bainhira Esau tinan haat-nulu nia kaben ho Judit, nebee oan feto hosi Beeri, ema Hiti, no mos ho Basemat, oan feto hosi Elon, ema Hiti. 35Sira halo moris susar ba Isak no Rebeka.

Currently Selected:

Jénesis 26: BK

Highlight

Copy

Compare