Jénesis 27
27
Isak Foo Bensaun Ba Jacó
1Bainhira Isak katuas ona, no nia matan malahuk liu ona too nia la bele haree, nia bolu nia oan mane boot Esau, no dehan ba nia, “Hau nia oan mane.” Esau hataan, “Tebes, hau mak nee.” 2Isak dehan, “Agora, hau katuas ona no hau la hatene loron ida nebee mak hau mate. 3Entaun, favór ida, foti o nia rama oan sira no o nia rama, no baa rai luan. Kasa animál fuik ida ba hau. 4No prepara hahaan gostu, nebee hau gosta haan, no lori mai hau. Nunee hau bele haan no hau nia klamar bele foo bensaun ba o molok hau mate.”
5Rebeka rona bainhira Isak koalia ho nia oan mane Esau. No Esau baa rai luan atu kasa animál fuik hodi lori mai. 6Entaun Rebeka koalia ho nia oan mane Jacó dehan, “Tebes, hau rona o nia aman koalia ho o nia maun Esau, no nia dehan, 7‘Lori mai hau animál fuik no prepara hahaan gostu. Nunee hau bele haan no foo bensaun ba o iha Nai nia oin molok hau mate.’ 8Entaun, hau nia oan mane, halo tuir hau nia liafuan nebee hau manda ba o. 9Favór ida, baa foti bibi oan rua nebee diak hosi bibi lubun no hau sei prepara hahaan gostu ba o nia aman nebee nia gosta. 10No o sei lori hahaan nee ba o nia aman, hodi nia bele haan no nia bele foo bensaun ba o molok nia mate.” 11Jacó hataan ba nia inan Rebeka, “Tebes, hau nia maun Esau mak ema nebee isin fulun no hau mak ema nebee isin kabeer. 12Se karik hau nia aman kona hau, nunee nia sei hanoin katak hau bosok. Depois hau sei hetan malisan, laos bensaun.” 13Ninia inan dehan ba nia, “Hau nia oan, husik o nia malisan kona fali hau, maibee o halo tuir hau nia liafuan, no baa foti buat sira nee.”
14Entaun Jacó baa no foti bibi no lori sira ba ninia inan. Ninia inan prepara hahaan gostu nebee ninia aman gosta. 15Rebeka foti ninia oan boot Esau nia ropa diak nebee iha nia uma laran, no foo hatais ba ninia oan ikun Jacó. 16No nia tau bibi oan sira nia kulit iha Jacó nia liman no iha nia kakorok. 17Nia foo ba nia oan Jacó nia liman hahaan gostu nee no paun nebee nia prepara ona. 18Jacó baa ninia aman no dehan, “Hau nia apaa.” Isak hataan, “Hau mak nee. Hau nia oan, o mak see?” 19Jacó dehan ba ninia aman, “Hau mak Esau, ita nia oan boot. Hau halo tiha tuir buat nebee ita haruka hau halo. Favór ida, tuur ba no haan hau nia naan animál fuik nian. Nunee ita nia klamar bele foo bensaun mai hau.” 20Isak dehan ba ninia oan mane, “Hau nia oan, oinsaa mak o bele hetan naan lalais nee?” Nia hataan, “Tanba Nai, ita nia Maromak, lori buat nee mai hau.” 21Isak dehan ba Jacó, “Favór ida, habesik hau hodi hau bele kaer o, hau nia oan, no hau bele hatene duni katak o mak hau nia oan Esau ka lae.” 22Jacó hakbesik ba ninia aman Isak, no Isak lamas nia no dehan, “Lian nee mak Jacó nia lian, maibee liman nee mak Esau nia liman.” 23No nia la hatene loos tanba Jacó iha liman fulun hanesan ninia maun nia liman. Entaun Isak foo bensaun ba nia. 24Isak dehan, “O mak hau nia oan Esau duni ka lae?” Jacó hataan, “Hau mak nee duni.” 25No Isak dehan, “Lori hahaan mai hau no hau bele haan naan animál fuik nian hosi hau nia oan hodi hau nia klamar bele foo bensaun ba o.” No nia lori hahaan nee ba Isak no Isak haan. Jacó foo tua no nia hemu. Jacó lohi ninia aman hodi hetan bensaun.
26Ninia aman Isak dehan ba nia, “Agora, hau nia oan, hakbesik no rei hau.”
27Jacó hakbesik no rei ninia aman, no Isak horon hosi nia ropa, no Isak foo bensaun ba nia no dehan,
“Haree katak hau nia oan nia morin
mak hanesan morin hosi rai luan nebee Nai haraik ona bensaun!
28Entaun, Maromak foo ba o mahobeen hosi lalehan,
no bokur hosi rai
no batar barak no tua uvas.
29Husik povu bele serví ba o
no nasaun sira hakruuk ba o.
O sei ukun o nia maluk sira,
no husik o nia inan nia oan sira hakruuk ba o.
Malisan sei kona sira nebee foo malisan ba o,
no bensaun sei kona sira nebee foo bensaun ba o!”
30Bainhira Isak foin foo bensaun ba Jacó, no Jacó foin sai hosi ninia aman Isak nia oin, nia maun Esau tama mai hosi kasa. 31Esau halo mos hahaan gostu no lori ba ninia aman no nia dehan ba ninia aman, “Hadeer ba, apaa, no haan naan animál fuik nian hosi apaa nian oan mane, hodi ita nia klamar bele foo bensaun mai hau.” 32Isak nia aman dehan ba nia, “See mak o?” No nia hataan, “Hau mak Esau, o nia oan boot.” 33Isak nakdedar makaas, no dehan, “Entaun see mak lori ona mai hau naan animál fuik nian? Hau haan hotu tiha ona molok o mai, no hau foo ona bensaun ba nia no nia sei hetan duni bensaun.” 34Rona tiha ninia aman nia liafuan nee, Esau hakilar makaas no tanis ho laran susar loos. Nia dehan ba ninia aman, “Foo bensaun mai hau, mai hau mos, Oh hau nia apaa!” 35Isak hataan, “O nia alin mai bosok tiha hau no nia hadau ona o nia bensaun.” 36Esau hataan, “Laos nia iha naran loos nebee ‘Jacó’?#27:36 Jacó iha sentidu ‘nia foti ain tubun’ no mos ‘nia lohi’. Tanba nia hamatak tiha hau dala rua ona. Nia hadau ona hau nia direitu oan boot nian, no tebes, agora nia hadau hau nia bensaun.” No Esau husu tan, “Ita sei iha bensaun ida mai hau?” 37Isak hataan no dehan ba Esau, “Tebes, hau halo Jacó sai o nia nai. Hau foo ona ninia maun-alin hotu hodi sai ninia atan sira. Hau sustenta nia ho batar no tua uvas. Nunee, hau nia oan, hau bele halo saida ba o?” 38Esau dehan ba ninia aman, “Ita iha hela bensaun ida deit, hau nia apaa? Foo bensaun mai hau, mai hau mos, Oh hau nia apaa!” No Esau foti nia lian no tanis. 39Ninia aman Isak hataan no dehan ba nia:
“Tebes, o sei hela dook hosi rai bokur,
no hosi mahobeen nebee mai hosi lalehan.
40O sei moris liu hosi surik,
no o sei serví o nia alin.
Tuir mai, bainhira o hakarak lao livre,
o sei halo tohar ninia ai leba#27:40 Ai leba nee kona ba ai nebee sira tau iha karau nia kabaas hodi dada kareta ka alat nebee fila rai. Nunee ai leba katak ai nebee kastigu ema hodi servisu todan. Haree dezenhu iha Jeremias 27:2. hosi o nia kakorok.”
41Esau odi Jacó tanba nia hetan bensaun hosi ninia aman. Esau dehan iha nia fuan laran, “Tempu tanis lelir ba hau nia apaa besik mai ona. Depois hau sei oho hau nia alin Jacó.” 42No ema foo hatene ba Rebeka kona ba Esau nia liafuan nee. Entaun Rebeka bolu nia oan ikun Jacó no dehan ba nia, “Tebes, o nia maun Esau hamaus aan tanba nia halo ona planu atu oho o. 43Nunee, hau nia oan, halo tuir hau nia liafuan. Hamriik ba, no halai ba hau nia maun Labão nebee iha Haran. 44Hein iha nebaa loron balu too o nia maun nia laran manas tuun ona. 45Bainhira o nia maun nia laran manas tuun hosi o, no nia haluha ona buat nebee o halo tiha ona ba nia, nunee hau sei haruka mensajen no lori o mai fali. Tanba saa mak hau tenki lakon imi nain rua iha loron ida deit?” 46Rebeka dehan ba Isak, “Hau lakohi ona hau nia moris tanba oan feto sira hosi Hiti. Se karik Jacó hetan feen ida hosi Hiti nia oan feto sira, nebee oan feto hosi rai nee, nunee hau nia moris iha folin saida mai hau?”
Currently Selected:
Jénesis 27: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
