Jénesis 28
28
Jacó Ba Labão
1Entaun Isak bolu Jacó no foo bensaun ba nia. Isak foo orden ba nia dehan, “Keta foti feen ida hosi feto Kanaan sira. 2Hamriik no baa Padan-Aram, ba o nia inan nia aman Betuel nia uma. Foti feen ida hosi nebaa, hosi Labão nia oan feto sira, nebee o nia inan nia maun. 3Maromak Kbiit Makaas sei foo bensaun ba o, no habarak o, hodi o sai povu boot. 4Husik Nia foo bensaun Abraão nian ba o, no ba o nia bei-oan sira nebee hamutuk ho o, hodi o bele simu rai nebee o lao dadaun nee nudar estranjeiru, nebee Maromak foo ba Abraão.” 5No Isak haruka Jacó sai ba. Jacó baa Padan-Aram, ba Labão, nebee oan mane hosi Betuel, ema Aram. Labão mak Rebeka nia maun. Rebeka nee mak Jacó no Esau nia inan.
Esau Kaben Ho Oan Feto Ida Hosi Ismael
6Esau haree katak Isak foo ona bensaun ba Jacó no haruka nia sai ba Padan-Aram hodi hetan feen hosi nebaa. No nia haree katak bainhira Isak foo bensaun ba Jacó, Isak foo mos orden ba Jacó katak, “Keta foti feen ida hosi feto Kanaan sira.” 7No Esau haree katak Jacó halo tuir ninia inan-aman nia hakarak no nia ba Padan-Aram. 8No Esau haree katak nia aman Isak la kontenti ho nia feen sira hosi ema Kanaan. 9Nunee Esau ba Ismael no foti feto ida sai nia feen. Mezmu nia iha feen sira ona, nia kaben ho Mahalat, oan feto hosi Ismael, Abraão nia oan mane. Mahalat mak Nebayot nia alin feto.
Jacó Nia Mehi
10Jacó sai hosi Beer-Seba no lao ba Haran. 11Bainhira nia too iha fatin ida, nia toba kalan tomak iha nebaa tanba loro matan monu ona. Nia foti fatuk ida iha fatin nebaa no uza atu tau ninia ulun. Depois nia toba dukur. 12Nia mehi, no tebes, nia haree eskada ida sae hosi rai no eskada tutun sae too lalehan. No tebes, Maromak nia anju sira tuun-sae iha eskada nee. 13Tebes, Nai hamriik iha eskada leten no dehan, “Hau mak Nai, o nia avoo Abraão nia Maromak no o nia aman Isak nia Maromak. Hau sei foo rai nebee o toba dadaun nee ba o no ba o nia bei-oan sira. 14O nia bei-oan sira sei sai barak hanesan rai rahun iha mundu. No o sei namkari ba parte loromonu no lorosae, no ba parte norte no súl. Família hotu iha mundu sei hetan bensaun liu hosi o no o nia bei-oan. 15Tebes, Hau mak hamutuk ho o, no Hau sei tau matan ba o iha fatin hotu nebee o baa. Hau sei lori o mai fali iha rai nee, tanba Hau sei la husik o too Hau kumpri Hau nia liafuan nebee Hau hatoo ona ba o.” 16Depois Jacó hadeer hosi ninia tempu toba dukur nee no nia dehan, “Tebes, Nai mak iha fatin nee no hau la hatene.” 17Nia tauk no dehan, “Fatin nee perigu loos! Fatin nee mak Maromak nia uma duni, no iha nee mak portaun ba lalehan.”
18Jacó hadeer sedu iha dadeer-saan, no nia foti fatuk nebee nia uza hodi tau nia ulun no nia harii fatuk nee sai fatuk riin ida. No nia fui mina iha fatuk leten. 19Nia hanaran fatin nee Betél, maibee uluk sidade iha nebaa iha naran Luz. 20Jacó jura no dehan, “Se karik Maromak hamutuk ho hau, no tau matan ba hau iha dalan nebee hau lao tuir nee, no foo paun hodi hau bele haan no ropa hodi hau bele hatais, 21too hau fila fali ba hau nia aman nia uma ho dame, nunee Nai sei sai hau nia Maromak. 22No fatuk nee, nebee hau harii ona nudar fatuk riin, sei sai Maromak nia uma. No hosi buat hotu nebee O foo mai hau, nee duni hau sei foo fali porsentu sanulu ba O.”
Currently Selected:
Jénesis 28: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
