Jénesis 29

Jacó Kaben Ho Lea No Rakél

1Depois Jacó kontinua ninia viajen, no nia baa too iha povu nia rai iha parte lorosae. 2No nia haree hetan bee posu iha rai luan. Tebes, fatin nee iha bibi lubun tolu nebee toba iha nebaa. Tanba hosi bee posu nee ema foo hemu ba sira nia bibi lubun sira. No fatuk boot taka hela bee posu nee. 3Baibain bibi lubun hotu halibur iha nebaa no ema duir fatuk hosi bee posu hodi foo hemu ba bibi sira. Depois sira taka fali bee posu ho fatuk boot nee.

4Jacó dehan ba sira, “Hau nia maluk sira, imi hosi nebee?” Sira hataan, “Ami hosi Haran.” 5Nia husu sira, “Imi konhese Labão, oan mane hosi Naor, ka?” Sira hataan, “Ami konhese.” 6Nia husu sira, “Nia diak#29:6 Iha Ebreu, ‘diak’ iha versíkulu nee mak salóm. ka lae?” Sira hataan, “Nia diak. Haree ba, nia oan feto Rakél mai ho bibi sira!” 7Nia dehan, “Aii, loron manas hela, no nee laos tempu atu halibur animál sira. Foo hemu ba bibi sira no lori sira ba.” 8No sira hataan, “Ami la bele, too bibi lubun hotu mai hamutuk. Depois ema sira duir fatuk nee hosi bee posu, foin ami bele foo hemu ba bibi sira.”

9Bainhira nia koalia hela ho sira, Rakél mai ho ninia aman nia bibi sira, tanba Rakél hein bibi sira nee. 10Bainhira Jacó haree Rakél, oan feto hosi Labão nebee ninia inan nia maun, nia hakbesik no duir fatuk hosi bee posu no foo hemu ba bibi lubun hosi Labão, ninia inan nia maun. 11No Jacó rei Rakél, no nia tanis ho lian makaas. 12Jacó foo hatene ba Rakél katak nia mak Rakél nia aman nia alin, no nia mak Rebeka nia oan mane. Nunee Rakél halai no foo hatene ba ninia aman.

13Bainhira Labão rona liafuan kona ba Jacó nebee nia alin feto nia oan, nia halai ba Jacó no rei nia no lori Jacó tama ba ninia uma. No Jacó konta buat hotu ba Labão. 14Labão dehan ba nia, “Loos duni, o mak hau nia ruin no hau nia isin!”#29:14 Fraze nee katak sira família hanesan no raan ida deit. No Jacó hela ho Labão too fulan ida.

15Labão hatete ba Jacó, “Tanba o mak hau nia alin, nunee o sei servisu mai hau saugati deit ka? Foo hatene ba, hau tenki selu saida ba o nia kolen?” 16Labão iha oan feto rua, oan primeiru naran Lea no oan segundu naran Rakél. 17Lea iha matan fraku, maibee Rakél bonita loos no oin kapaas. 18Jacó hadomi Rakél no nia dehan, “Hau sei serví ita too tinan hitu hodi hetan Rakél, ita nia oan segundu. 19Labão dehan, “Diak liu hau foo nia ba o, duké hau foo nia ba mane seluk. Entaun hela ho hau.” 20Nunee Jacó serví too tinan hitu hodi hetan Rakél, maibee nia senti katak tempu nee hanesan loron balu deit, tanba domin nebee nia iha ba Rakél.

21Depois Jacó dehan ba Labão, “Foo hau nia feen mai hau, tanba tempu nee hotu ona, nunee hau bele toba ho nia.”#29:21 Ebreu “tama ba nia” ho sentidu katak sira tama ba tenda no toba hamutuk nudar feen no laen. Iha mos versíkulu 22, 30 no kapítulu 30. 22Entaun Labão halibur ema hotu hosi fatin nee no halo festa boot. 23Maibee, iha kalan nee, nia foti nia oan feto Lea, no lori ba Jacó, no Jacó tama ba nia. 24Labão foo Zilpa ba nia oan feto Lea hodi sai atan feto ba nia. 25Tuir mai, iha dadeer-saan, tebes feto nee mak Lea! No Jacó dehan ba Labão, “Ita halo saida mai hau? Laos katak hau serví ita tanba Rakél? Nusaa mak ita bosok hau?” 26Labão dehan, “Tuir ami nia kultura, ami la bele halo hanesan nee, atu foo oan feto segundu molok oan feto primeiru. 27Halo tuir ho feto nee too semana ida, depois ami sei foo feto ida fali hodi selu o nia kolen. Naran katak o servisu mai hau tinan hitu tan. 28Entaun Jacó halo tuir no kumpri feto primeiru nia semana ida. Depois Labão foo mos nia oan feto Rakél ba nia hodi sai ninia feen. 29No Labão foo Bila ba nia oan feto Rakél hodi sai ninia atan feto. 30Jacó tama mos ba Rakél. Nia hadomi Rakél liu fali Lea. No Jacó serví Labão too tinan hitu tan.

Jacó Nia Oan Sira

31Bainhira Nai haree katak Jacó odi Lea, nunee Nai loke Lea nia oan fatin, maibee Rakél la bele iha oan. 32Lea isin rua no tuur ahi hetan oan mane ida, no nia hanaran oan nee Ruben,#29:32 Ruben katak ‘Haree oan mane nee’. tanba nia dehan, “Tanba Nai haree hau nia terus. Agora, hau nia laen sei hadomi hau.” 33Nia isin rua fali no tuur ahi hetan oan mane ida, no dehan, “Tanba Nai rona ona katak hau hetan ódiu, nunee Nia foo mos oan mane nee.” No nia hanaran oan mane nee Simeão.#29:33 Simeão hanesan ho liafuan ‘Rona ona’ iha lian Ebreu. 34No nia isin rua fali no tuur ahi hetan oan mane ida, no dehan, “Agora, iha tempu nee, hau nia laen hakarak hamutuk ho hau tanba hau hetan oan mane tolu ba nia.” Nunee nia hanaran oan nee Levi.#29:34 Levi hanesan ho liafuan ‘Hamutuk’ iha lian Ebreu. 35No nia isin rua fali no tuur ahi hetan oan mane ida, no nia dehan, “Agora, hau sei hahii Nai.” Nunee nia hanaran oan nee Judá.#29:35 Judá hanesan ho liafuan ‘Hahii’ iha lian Ebreu. Depois nia la hetan tan oan.

Currently Selected:

Jénesis 29: BK

Highlight

Copy

Compare