Jénesis 30

Oan Sira Hosi Atan Feto

1Bainhira Rakél haree katak nia la hetan oan ba Jacó, Rakél sai laran moras ba ninia biin no dehan ba Jacó, “Foo oan sira mai hau, se lae, hau mate!” 2Jacó sai hirus ho Rakél, no nia dehan, “Hau mak iha Maromak nia fatin ka? Nia mak halo hodi o nia kabun laran la bele iha oan.” 3Rakél dehan, “Haree ba, hau nia atan feto Bila, tama ba nia. Nia bele tuur ahi, hodi hau bele hetan oan sira liu hosi nia.” 4No Rakél foo nia atan feto Bila ba Jacó nudar feen ida, no Jacó tama ba nia. 5Bila sai isin rua, no nia tuur ahi hetan oan mane ida. 6Rakél dehan, “Maromak tesi lia ona mai hau, no Nia rona ona hau nia lian no foo oan mane mai hau.” Nunee nia hanaran oan mane nee Dan.#30:6 Dan hanesan ho liafuan ‘Tesi Lia’ iha lian Ebreu. 7Rakél nia atan feto Bila sai isin rua fali no tuur ahi hetan oan mane segundu ba Jacó. 8Rakél dehan, “Hau hadau malu makaas ho hau nia biin no hau mak manaan.” No nia hanaran oan mane nee Naftali.#30:8 Naftali katak ‘Hadau malu’. 9Bainhira Lea haree katak nia la iha tan oan, nia foti nia atan feto Zilpa, no foo nia ba Jacó nudar feen ida. 10No Lea nia atan feto Zilpa tuur ahi hetan oan mane ida ba Jacó. 11Lea dehan, “Sorti diak!” No nia hanaran oan mane nee Gad.#30:11 Gad hanesan ho liafuan ‘Sorti Diak’ iha lian Ebreu. 12Lea nia atan feto Zilpa tuur ahi hetan oan mane segundu ba Jacó. 13Lea dehan, “Hau haksolok, tanba feto sira sei bolu hau haksolok.” No nia hanaran oan mane nee Aser.#30:13 Aser hanesan ho liafuan ‘Haksolok’ iha lian Ebreu.

14Iha tempu koa trigu, Ruben lao ba rai luan no hetan ai mandrágora#30:14 Ai mandrágora mak ai funan badak nebee nia abut iha aimoruk (hanesan droga) nebee sira hanoin bele halo ema namora no hetan oan. Haree Kanta 7:13. no lori sira ba ninia inan Lea. Depois Rakél dehan ba Lea, “Favór ida, foo ita nia oan mane nia ai mandrágora balu mai hau.” 15Lea dehan ba nia, “Ida nee buat kiik katak o foti hau nia laen ka? Agora o hakarak foti mos hau nia oan nia ai mandrágora?” Rakél dehan, “Entaun, foo ita nia oan nia ai mandrágora mai hau no Jacó bele toba ho ita orsida kalan.” 16Bainhira Jacó mai hosi rai luan iha rai nakaras Lea sai ba hodi hasoru nia, no dehan, “Ita tenki toba ho hau, tanba tebes hau aluga ona ita ho hau nia oan mane nia ai mandrágora.” No Jacó toba ho Lea iha kalan nee. 17Maromak rona Lea no nia isin rua no tuur ahi hetan oan mane ba dala lima ba Jacó. 18Lea dehan, “Maromak foo ona mai hau tuir hau nia kolen, tanba hau foo ona hau nia atan feto ba hau nia laen.” No Lea hanaran oan mane nee Isakar.#30:18 Isakar hanesan ho liafuan ‘Kolen’ iha lian Ebreu.

19Lea isin rua fali no tuur ahi hetan oan ba dala neen ba Jacó. 20Lea dehan, “Maromak foo prezenti diak mai hau. Agora hau nia laen hakarak hela ho hau tanba hau hetan ona oan neen ba nia.” No Lea hanaran oan mane nee Zebulón.#30:20 Zebulón hanesan ho liafuan ‘Prezenti’ no ‘Hela’ iha lian Ebreu. 21Liu tiha nee, nia tuur ahi hetan oan feto ida nebee hanaran Dina.#30:21 Dina hanesan ho liafuan ‘Justisa’ iha lian Ebreu.

22Maromak hanoin hetan Rakél no Maromak rona nia no Maromak loke ninia oan fatin. 23No Rakél isin rua no tuur ahi hetan oan mane ida no dehan, “Maromak mak hasai ona hau nia moe.” 24Nia hanaran oan mane nee José,#30:24 José katak ‘Nia Aumenta’, no hanesan ho liafuan ‘Nia Foti Sai’ iha lian Ebreu. no nia dehan, “Nai sei aumenta oan mane ida tan mai hau.”

Jacó Nia Susesu

25Bainhira Rakél hetan ona José, Jacó dehan ba Labão, “Haruka hau sai, hodi hau bele baa hau nia fatin, no ba hau nia rai. 26Foo hau nia feen sira no hau nia oan sira, nebee hau selu kotu ona ho hau nia servisu ba ita, no husik hau baa. Tanba ita hatene hau nia servisu nebee hau halo ona ba ita. 27Labão dehan ba nia, “Favór ida, se karik hau hetan grasa iha ita nia oin, hau aprende liu hosi liafuan siik nian katak Nai haraik ona bensaun mai hau tanba ita.” 28No nia dehan, “Foo hatene mai hau ita nia kolen nee too hira no hau sei foo.” 29Jacó dehan ba nia, “Ita hatene ona oinsaa hau serví ona ba ita, no oinsaa hau lori ita nia animál sira. 30Tanba bainhira hau mai, ita iha uitoan deit maibee agora animál sira nee aumenta too lubun boot. No Nai mak haraik bensaun ba ita hosi tempu nebee hau mai. Agora, bainhira mak hau hetan mos ba hau nia uma kain?” 31Entaun Labão husu, “Saida mak hau foo ba o?” Jacó hataan, “Ita lalika foo buat ida mai hau, se karik ita halo buat nee mai hau nunee hau sei hein no tau matan ba ita nia bibi lubun. 32Hau sei lao liu ita nia bibi lubun tomak ohin loron no hasai animál sira nebee iha kór ka makerek, bibi malae hotu nebee kór metan, no bibi timor nebee makerek no iha kór. Buat sira nee mak hau nia kolen. 33Nunee hau nia hahalok loos bele defende hau iha tempu tuir mai, bainhira hau sura hau nia kolen iha ita nia oin. Bibi timor hotu nebee la iha kór ka makerek, no bibi malae nebee la metan - buat sira nee bele sura nudar buat nebee hau naok.” 34Labão dehan, “Tebes, buat nee sei tuir o nia liafuan.” 35Depois, iha loron nee kedas, Labão haketak bibi timor aman nebee iha riska-riska no makerek no bibi inan hotu nebee iha kór no makerek, no bibi malae hotu nebee mutin uitoan ho kór metan. Nia haketak bibi hotu nee no nia entrega sira ba ninia oan mane sira nia liman. 36Depois nia haruka ninia oan mane sira lao loron tolu hodi hela dook hosi Jacó. No Jacó hein bibi nebee sei hela hosi Labão nia bibi lubun sira.

37Jacó foti ai sanak sira hosi ai kananga, ai kalesi no ai bubur#30:37 Ai oin tolu nebee bele taa ai sanak nurak, loke kulit no hetan mutin. Spp. Styrax, Amygdalus no Plantanus. nebee sei nurak no nia loke ai sanak sira nee nia kulit hodi haree hetan ai sanak nia laran nebee mutin. 38No nia foti ai sanak nee, nebee nia hasai tiha sira nia kulit, no tau iha bibi lubun sira nia oin iha tanke bee nebee sira uza hodi foo hemu ba bibi lubun sira, iha fatin nebee sira hola malu bainhira sira mai hodi hemu. 39No bibi lubun sira nee hola malu iha ai sanak nia oin no sira hahoris oan sira nebee riska-riska, kór no makerek. 40Jacó haketak bibi oan sira nee no halo hodi bibi lubun sira haree ba sira nebee riska-riska no sira hotu nebee metan iha Labão nia bibi lubun nia leet. No nia tau ninia bibi lubun sira ketak no la kahur sira ho Labão nia bibi lubun sira. 41No bainhira bibi nebee forti hola malu, Jacó tau ai sanak sira nee iha bibi sira nia oin iha tanke bee nian hodi sira bele hola malu iha ai sanak sira nia oin. 42Maibee bainhira bibi fraku mai, nia la tau ai sanak sira nee. Nunee bibi nebee fraku mak Labão nian, no bibi nebee forti mak Jacó nian. 43Entaun mane nee aumenta ba beibeik, no nia hetan bibi barak, no atan feto, atan mane, kuda kamelu no kuda buru sira.

Currently Selected:

Jénesis 30: BK

Highlight

Copy

Compare