Jénesis 31
31
Jacó Halai Hosi Labão
1Jacó rona liafuan hosi Labão nia oan mane sira. Sira dehan, “Jacó mak hadau buat hotu nebee ami nia aman nian. Nia hetan riku-soin hotu nee hosi ami nia aman nia sasaan.” 2Jacó haree Labão nia oin, no tebes, nia la hanesan uluk. 3No Nai dehan ba Jacó, “Fila fali ba o nia bei-ala nia rai, ba o nia maluk sira no Hau sei hamutuk ho o.”
4Jacó haruka ema bolu Rakél no Lea atu mai ninia bibi lubun iha rai luan. 5Nia dehan ba sira, “Hau haree imi nia aman nia oin, katak nia la hanesan uluk, maibee hau nia aman nia Maromak mak hamutuk ho hau. 6Imi hatene katak hau serví ona imi nia aman ho hau nia kbiit tomak. 7Maibee imi nia aman bosok hau no nia muda hau nia saláriu dala sanulu ona. Maibee Maromak la husik nia atu estraga hau. 8Se karik nia dehan nee, ‘Makerek nian mak o nia kolen,’ nunee bibi sira hahoris bibi makerek. No se karik nia dehan, ‘Riska-riska nian mak o nia kolen,’ nunee bibi sira hahoris bibi riska-riska. 9Hanesan nee Maromak foti animál sira hosi imi nia aman no foo mai hau. 10Iha loron ida, iha tempu nebee bibi sira hola malu, hau foti matan no haree mehi ida. Tebes, bibi aman sira nebee sae bibi inan sira mak riska-riska, makerek no kór oi-oin. 11Maromak nia anju koalia ho hau iha mehi ida no dehan, ‘Jacó!’ No hau hataan, ‘Hau mak nee.’ 12Nia dehan, ‘Foti matan agora no haree ba, bibi aman hotu nebee sae bibi inan iha riska-riska, makerek no kór oi-oin. Tanba Hau haree ona buat hotu nebee Labão halo ona ba o. 13Hau mak Maromak hosi Betél, iha fatin nebee o fui mina ba fatuk riin, no iha fatin nebee o halo juramentu mai Hau. Agora, hamriik no sai hosi rai nee no fila fali ba o nia maluk sira nia rai.’” 14Rakél no Lea rona no hataan ba nia, “Ami iha parte ka liman rohan tan iha ami nia aman nia uma ka? 15Laos nia haree ami nudar ema estranjeiru? Tanba nia faan ona ami no ami nia osan nee nia haan hotu ona. 16Tanba riku-soin hotu nebee Maromak foti hosi ami nia aman nee mak ami nian, no ami nia oan sira nian. Agora, buat hotu nebee Maromak hatete ona ba ita, nunee ita halo tuir.”
17Depois Jacó hamriik, no tau nia oan mane sira no nia oan feto sira iha kuda kamelu sira. 18Nia lori sai ninia animál sira hotu no ninia sasaan hotu nebee nia hetan. Buat sira nee mak nia animál sira nebee ninian, nebee nia hetan iha Padan-Aram. No nia lao ba hodi baa nia aman Isak iha rai Kanaan. 19Labão baa ona fatin ida hodi tesi ninia bibi malae nia fulun. No Rakél naok estátua lulik sira nebee ninia aman nian. 20Jacó baa nonook deit hodi Labão, ema Aram, la hatene, no Jacó la foo hatene ba Labão katak nia halai ona. 21Entaun nia halai ho buat hotu nebee ninian. Nia hamriik no hakur Mota Eufrates#31:21 Ebreu dehan ‘mota’ nebee refere ba Mota Eufrates iha parte norte. no fila nia oin ba foho Gilead.
22Liu tiha loron tolu, ema foo hatene ba Labão katak Jacó halai tiha ona. 23Entaun nia foti ninia maluk sira no halai duni Jacó too loron hitu. No nia hetan Jacó iha foho Gilead. 24Maromak mai Labão, ema Aram, iha mehi ida iha kalan no dehan ba nia, “Kuidadu katak o la koalia buat ida ba Jacó, se buat diak ka buat aat.”
25Entaun Labão hetan Jacó. Jacó halo akampamentu iha foho no Labão hamutuk ho ninia maluk sira halo akampamentu iha foho Gilead. 26Labão dehan ba Jacó, “Ita halo saida? Nusaa mak ita halai nonook hodi hau la hatene, no lori sai hau nia oan feto sira hanesan ema dadur nebee foti ho surik? 27Tanba saa mak ita halai sub-subar, no baa nonook deit, no la foo hatene mai hau hodi hau la bele haruka ita sai ho haksolok no kanta, ho tamborin no harpa? 28Nusaa mak ita la foo tempu hodi hau bele rei hau nia bei-oan mane no bei-oan feto sira? Ita halo buat beik. 29Hau iha podér iha hau nia liman hodi halo aat ba ita. Maibee ita nia aman nia Maromak koalia ona ho hau hori kalan no dehan, ‘Kuidadu katak o la koalia buat ida ba Jacó, se buat diak ka buat aat.’ 30Agora, ita baa tanba ita hanoin duni ita nia aman nia uma, maibee tanba saa mak ita naok hau nia maromak sira?” 31Jacó hataan no dehan ba Labão, “Hau halo hanesan nee tanba hau tauk, no hau hanoin karik ita foti fali ita nia oan feto sira hosi hau. 32Maibee ita bele oho ema ida nebee iha ita nia maromak sira. Iha ita nia maluk sira nia oin bele haree buat nebee ita nian iha hau nia sasaan.” Tanba Jacó la hatene katak Rakél mak naok buat sira nee.
33Labão tama Jacó nia tenda, no Lea nia tenda, no atan feto rua nia tenda maibee nia la hetan. Depois nia sai hosi Lea nia tenda no tama Rakél nia tenda. 34Rakél foti ona estátua lulik sira nee no tau sira iha kuda kamelu nia sela no tuur iha sira nia leten. Labão buka iha tenda ida nee nia laran tomak maibee nia la hetan. 35No Rakél dehan ba ninia aman, “Hau nia senhor, keta hirus hau katak hau la hamriik iha ita boot nia oin, tanba hau nia raan fulan mai.” Entaun Labão buka la hetan estátua lulik sira nee.
36Depois Jacó hirus no diskuti malu ho Labão. Jacó dehan ba Labão, “Saida mak hau halo kontra hasoru ita? No hau nia sala saida mak ita halai duni tuir hau? 37Ita buka iha hau nia sasaan hotu maibee sasaan ida nebee mak ita nian? Tau sasaan ida nee iha hau nia maluk sira nia oin no ita nia maluk sira nia oin hodi sira bele tesi lia entre ita nain rua. 38Hau mak hamutuk ho ita durante tinan rua-nulu no ita nia bibi malae inan no bibi timor inan la soe sira nia oan sira no hau la haan ita nia bibi aman sira hosi ita nia bibi lubun. 39Buat nebee animál fuik lees tiha nee hau la lori ba ita maibee hau mak simu buat nebee lakon. Hau nia liman la husu hosi ita maski ema naok iha loron ka naok iha kalan. 40Hau hela hanesan nee: Loron manas haan hau durante loron, no jelu kona fali hau iha kalan, no hau toba la dukur. 41Hau hanesan nee durante tinan rua-nulu iha ita nia uma. Hau serví ita too tinan sanulu resin haat hodi hetan ita nia oan feto rua no tinan neen hodi hetan ita nia bibi lubun. No dala sanulu ita muda ona hau nia kolen. 42Se karik hau nia aman nia Maromak nebee Abraão nia Maromak la hamutuk ho hau, no Isak nia Hamtauk#31:42 Maromak, nebee Isak hamtauk ba Nia. Haree mos versikulu 53. la hamutuk ho hau, tebes ita mak haruka hau sai ho liman mamuk. Maromak haree hau nia terus no hau nia liman nia servisu no Nia mak hasee ita hori kalan.”
43Labão hataan no dehan ba Jacó, “Oan feto sira nee mak hau nia oan feto sira, no bei-oan sira nee mak hau nia bei-oan sira, no bibi sira nee mak hau nia bibi sira, no buat hotu nebee ita haree mak hau nian. 44Maibee saida mak hau bele halo ba hau nia oan feto sira, ka sira nia oan sira nebee sira hetan? Entaun, mai ita halo aliansa ida entre hau no ita, no husik aliansa nee sai sasin entre hau no ita.” 45No Jacó foti fatuk ida hodi harii nudar fatuk riin. 46Jacó dehan ba nia maluk sira, “Halibur fatuk sira.” No sira foti fatuk sira no halo bou ida no sira haan hamutuk iha fatuk bou nee. 47Labão hanaran fatuk bou nee Jegar-Saaduta, maibee Jacó hanaran bou nee Galeed.#31:47 Liafuan Jegar-Saaduta katak ‘Bou Nebee Sasin’ iha lian Aramaiku. Galeed iha sentidu hanesan iha lian Ebreu. 48Labão dehan, “Bou ida nee mak sasin entre hau no ita iha loron nee.” Tanba nee mak fatin nee iha naran Galeed, 49no Mizpá, tanba nia dehan, “Nai sei haree entre hau no ita, bainhira ita dook malu. 50Se ita foo terus ba hau nia oan feto sira, ka se ita hola feto sira seluk nudar feen, nebee laos hau nia oan feto sira nee, no la iha ema ida hamutuk ho ita hodi haree, maibee Maromak sei sai sasin entre hau no ita.”
51Labão dehan ba Jacó, “Haree bou nee no haree fatuk riin nee, nebee hau harii entre hau no ita. 52Bou nee sai sasin, no riin nee sai sasin, katak hau sei la lao liu bou nee ba ita, no ita sei la lao liu bou no riin nee mai hau hodi halo aat. 53Abraão nia Maromak, Naor nia Maromak, no sira nia aman nia Maromak, sei tesi lia entre ita.” No Jacó jura liu hosi ninia aman Isak nia Hamtauk. 54Depois Jacó oferese sakrifísiu iha foho nee, no bolu ninia maluk sira mai haan paun no sira haan paun no hein kalan tomak iha foho nee.
55Iha dadeer-saan, Labão hadeer no rei ninia oan mane no oan feto sira, no foo bensaun ba sira. Depois Labão sai no fila fali ba ninia uma.
Currently Selected:
Jénesis 31: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
