Jénesis 32

Jacó Tauk Esau

1Jacó lao baa no Maromak nia anju sira hasoru nia. 2Bainhira Jacó haree sira nia dehan, “Nee mak Maromak nia akampamentu!” No nia hanaran fatin nee Maanaim.#32:2 Maanaim katak ‘Akampamentu Rua’.

3Jacó haruka manu-ain#32:3 Iha lian Ebreu, anju no manu-ain mak liafuan hanesan deit. Só ita hanaran Maromak nia manu-ain ‘anju’. sira baa uluk nia atu baa ninia maun Esau iha rai Seir, nebee rai Edom. 4Nia manda sira no dehan, “Imi koalia hanesan nee ba hau nia senhor Esau: Ita boot nia atan Jacó dehan, ‘Hau hela ho Labão, no hau iha nebaa kleur too agora. 5Hau iha karau, kuda buru, bibi lubun, atan mane no atan feto sira. No hau haruka foo hatene ba hau nia senhor hodi hau bele hetan grasa iha ita boot nia oin.’” 6Depois manu-ain sira fila mai Jacó no dehan, “Ami baa too ita boot nia maun Esau. Nia mai dadaun atu hasoru ita boot, no mane nain atus haat (400) mai hamutuk ho nia.” 7Nunee Jacó tauk loos no laran taridu. Nia fahe ema nebee hamutuk ho nia, no bibi lubun, karau lubun no kuda kamelu sira nee nia fahe ba akampamentu rua. 8Nia dehan, “Se karik Esau hasoru grupu ida no oho sira, ida fali bele halai.” 9No Jacó dehan, “Oh Maromak nebee hau nia aman Abraão nian, no Maromak nebee hau nia aman Isak nian, Nai nebee dehan mai hau, ‘Fila fali ba o nia rai, no ba o nia família, no Hau sei halo diak ba o.’ 10Hau la merese atu simu buat kiik ida hosi domin metin no fidelidade hotu nebee O hatudu ona ba O nia atan hau. Tanba ho hau nia ai tonka deit hau hakur Jordaun#32:10 Jordaun nee mak mota importante ba ema Israel sira. Mota nee suli hosi Tasi Galilea too iha Tasi Mate. nee no agora hau sai akampamentu rua nee. 11Favór ida, salva tiha hau hosi hau nia maun nia liman, hosi Esau nia liman. Tanba hau tauk nia katak nia atu mai oho hau, no mos inan sira hamutuk ho oan sira nee. 12No O dehan ona, ‘Hau sei halo duni buat diak ba o no halo o nia bei-oan sira sai hanesan rai henek iha tasi nebee la bele sura tanba barak liu.’” 13Jacó toba kalan ida iha fatin nee. Depois nia foti hosi buat nebee nia iha atu foo prezenti ba nia maun Esau: 14bibi inan atus rua, bibi aman rua-nulu, bibi malae inan atus rua, bibi malae aman rua-nulu, 15kuda kamelu inan tolu-nulu nebee susu hela ho sira nia oan sira, karau inan haat-nulu, karau aman sanulu, kuda buru inan rua-nulu no kuda buru aman sanulu. 16Nia fahe lubun sira nee keta-ketak. Depois nia foo lubun sira nee ba nia atan sira no dehan, “Hakur mota uluk hau, no husik lubun ida-idak lao tuir dook malu.” 17Nia manda ida nebee primeiru no dehan, “Bainhira hau nia maun hasoru o no husu, ‘O mai hosi see? O baa nebee? No animál sira nee see nian?’, 18entaun o tenki dehan, ‘Buat sira nee mak ita boot nia atan Jacó nian. Nia haruka sira nudar prezenti ba hau nia senhor Esau, no tebes nia lao tuir ami.’” 19No nia manda ida segundu hanesan nee mos, no ida terseiru, no sira hotu nebee lori animál lubun sira nee, no nia dehan, “Imi tenki koalia hanesan nee ho Esau bainhira imi hasoru nia. 20No mos imi sei dehan, ‘Tebes, ita boot nia atan Jacó lao tuir ami.’” Tanba nia dehan, “Hau sei hetan perdaun hosi Esau ho prezenti nebee lao uluk hau. Depois hau sei haree ninia oin, karik nia bele simu hau.” 21Entaun prezenti sira hakur uluk nia maibee nia rasik toba iha kalan nee iha akampamentu.

Jacó Deut Malu Ho Maromak

22Iha kalan nee, nia hadeer no nia foti nia feen rua, nia atan feto rua, nia oan mane sanulu resin ida no nia hakur Mota Jabok. 23Nia foti sira no haruka sira hakur mota kiik nee no haruka buat nebee nia iha. 24Nunee Jacó hela mesak deit. No mane ida mai deut malu ho nia too loro matan sae. 25Bainhira mane nee haree katak nia la bele manaan Jacó, nia book Jacó nia kidan ruin fukun, no Jacó nia kidan ruin fukun naksalak bainhira sira deut malu hela. 26Ema nee dehan, “Husik hau tanba loro matan sae.” Jacó dehan, “Hau sei la husik ita too ita foo bensaun mai hau.” 27No nia dehan ba Jacó, “O nia naran saida?” Jacó hataan, “Jacó.” 28Nia dehan, “O nia naran laos tan Jacó, maibee Israel.#32:28 Israel katak ‘Nia luta hasoru Maromak’. Tanba o luta hasoru Maromak no ema, no o manaan.” 29Jacó husu nia, “Favór ida, foo hatene ita nia naran saida?” Nia dehan, “Nusaa mak o husu hau nia naran?” No nia foo bensaun ba Jacó iha nebaa. 30Jacó hanaran fatin nee Peniel#32:30 Peniel katak ‘Maromak Nia Oin’. tanba nia dehan, “Hau haree Maromak oin ba oin, no hau sei moris hela.” 31Loro matan sae dadaun bainhira nia hakur iha Peniel, no nia lao kudeik tanba ninia kidan ruin. 32Tanba nee ema Israel sira la haan naan uat iha kidan ruin fukun too ohin loron. Tanba mane nee book Jacó nia kidan ruin fukun iha fatin nebee iha naan uat.

Currently Selected:

Jénesis 32: BK

Highlight

Copy

Compare