Jénesis 33
33
Jacó Hasoru Esau
1Jacó foti matan no haree, no tebes Esau mai, no nia iha mane nain atus haat hamutuk ho nia. Jacó fahe nia oan sira ba Lea no Rakél, no ba atan feto rua nee. 2Nia tau atan feto no sira nia oan sira iha oin, tuir mai Lea no ninia oan sira, depois Rakél no Jacó tuir ikus. 3No nia lao ba Esau no hakruuk dala hitu too nia besik ba ninia maun. 4Esau halai hodi hasoru nia no hakuak nia makaas no rei nia. No sira tanis. 5Esau foti matan no haree feto no labarik sira no nia husu, “See mak sira nebee hamutuk ho ita?” Nia hataan, “Sira mak hau nia oan sira nebee Maromak foo ho grasa ba ita nia atan hau.” 6Tuir mai atan feto sira mai, hamutuk ho sira nia oan sira, no hakruuk ba Esau. 7No Lea mos ho ninia oan sira mai no hakruuk ba Esau. Tuir mai Rakél hamutuk ho José hakbesik no hakruuk ba Esau. 8Esau dehan, “Tanba saa mak ita haruka uluk animál lubun sira nebee hau hasoru ona nee?” Jacó hataan, “Hodi hetan grasa iha hau nia senhor nia oin.” 9Esau dehan, “Hau nia alin, hau iha barak ona. Rai hela buat hotu nee ba ita.” 10Jacó dehan, “Lae, favór ida, se karik hau hetan grasa iha ita boot nia oin, entaun simu hau nia prezenti hosi hau nia liman. Tanba hau haree ona ita boot nia oin, nebee hanesan hau haree Maromak nia oin, no ita boot mak simu ona hau. 11Favór ida, foti hau nia bensaun nebee hau lori ba ita boot tanba Maromak mak hatudu grasa ona mai hau no hau iha barak ona.” Nunee Jacó obriga nia no nia simu buat sira nee.
12Depois Esau dehan, “Mai ita baa hamutuk. Ita bele baa no hau sei lao iha ita nia oin.” 13Jacó dehan ba nia, “Hau nia senhor hatene katak labarik sira nee sei kiik, no bibi lubun no karau lubun sira nebee hamutuk ho hau iha mos oan sira. Se karik ema dudu makaas sira iha loron ida deit lubun sira hotu sei mate. 14Favór ida, hau nia senhor bele lao uluk ninia atan hau. Hau sei lao neineik, tuir animál sira nebee lao uluk hau no labarik sira nia kbiit, too hau hetan hau nia senhor iha Seir. 15Esau dehan, “Entaun hau bele husik ema balu nebee hamutuk ho hau hodi baa ho ita.” Jacó hataan, “Tanba saa mak hanesan nee? Husik hau hetan grasa iha hau nia senhor nia oin.” 16Entaun Esau fila fali iha loron nee no nia lao iha dalan ba Seir. 17No Jacó lao ba Sukot no harii uma ida no animál luhan sira. Nunee fatin nee iha naran Sukot.#33:17 Sukot katak ‘Luhan Sira’. 18Entaun Jacó sai hosi Padan-Aram no halo viajen diak too iha sidade Sikém nebee iha rai Kanaan. Nia harii ninia tenda iha sidade nee nia oin. 19No nia sosa rai ida iha nebaa, iha fatin nebee nia tau ninia tenda. Nia sosa rai nee hosi Hamor nia oan sira, nebee Sikém nia aman, ho osan mutin atus ida. 20Nia harii altár ida iha nebaa no hanaran altár nee El-Elohe-Israel.#33:20 El-Elohe-Israel katak ‘Maromak, Israel Nia Maromak’.
Currently Selected:
Jénesis 33: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
