Jénesis 34
34
Sikém Halo Aat Ba Dina
1Dina, nebee oan feto hosi Lea no Jacó, sai hodi baa haree feto sira iha rai nebaa. 2No Sikém mak oan mane hosi Hamor nebee ema Hiti, liurai iha rai nebaa. Bainhira Sikém haree feto Dina nee, Sikém foti nia no toba ho nia no hamoe nia. 3Sikém nia laran monu tebes ba Dina, oan feto hosi Jacó. Nia hadomi feto nee no koalia ho laran diak ba nia. 4Sikém koalia ho nia aman Hamor no dehan, “Foti feto nee hodi sai hau nia feen.”
5Jacó rona katak Sikém mak estraga nia oan feto Dina. Ninia oan mane sira sei hein hela ninia animál sira iha rai luan. Entaun Jacó nonook too sira fila mai. 6Sikém nia aman Hamor sai hodi baa hasoru Jacó no koalia ho nia. 7Bainhira Jacó nia oan mane sira mai hosi rai luan, sira rona kona ba buat nee no sira laran kanek. Sira hirus tebes tanba Sikém halo buat aat loos iha Israel. Tanba Sikém toba ho Jacó nia oan feto, nebee tuir lo-loos la bele halo hanesan nee.
8Hamor koalia ho sira no dehan, “Hau nia oan mane Sikém nia laran monu ba ita nia oan feto. Favór ida, foo feto nee ba nia hodi sai ninia feen. 9Imi bele hola malu ho ami. Foo imi nia oan feto sira mai ami no foti ami nia oan feto sira ba imi. 10No imi sei hela ho ami no imi bele uza rai nee. Hela no lori negósiu iha rai nee, no hetan riku-soin iha rai nee.” 11Sikém dehan ba Dina nia aman, no ba Dina nia maun sira, “Husik hau hetan grasa iha imi nia oin, no saida mak imi husu nee hau sei foo ba imi. 12Husu barlake naran deit no prezenti saida deit, no hau sei foo tuir imi nia liafuan mai hau. Só deit imi foo feto nee hodi sai hau nia feen.”
13Jacó nia oan mane sira hataan ba Sikém no nia aman Hamor ho liafuan bosok tanba Sikém estraga ona sira nia alin Dina. 14Nunee sira dehan ba Hamor no Sikém, “Ami la bele halo hanesan nee, atu foo ami nia alin feto ba mane nebee la hetan sirkunsizaun,#34:14 Lee kona ba halo sunat iha Jénesis 17:11 no nota. tanba nee mak hamoe ami. 15Maibee ami sei simu imi hanesan nee: Se karik imi sai hanesan ami, nebee imi nia mane ida-idak tenki hetan sirkunsizaun. 16Depois ami sei foo ami nia oan feto sira ba imi, no ami bele foti imi nia oan feto sira mai ami. No ami sei hela hamutuk ho imi no ita sei sai povu ida deit. 17Maibee se karik imi lakohi rona tuir ami, atu hetan sirkunsizaun, entaun ami sei foti ami nia oan feto nee no ami baa deit.”
18Hamor no nia oan mane Sikém kontenti ho sira nia liafuan nee. 19Joven mane nee la dada tempu hodi halo buat nee tanba nia gosta Jacó nia oan feto. No ema respeita nia barak liu fali ema hotu iha ninia aman nia uma kain. 20Hamor no nia oan mane Sikém baa too iha sira nia sidade nia portaun no koalia hamutuk ho mane hosi sidade nee. Sira dehan, 21“Mane iha nebaa halo dame ho ami. Nunee husik sira hela iha rai nee no halo negósiu iha nee. Tebes rai nee sei luan no sira mos bele uza. Ita bele foti sira nia oan feto sira hodi sai ita nia feen sira, no ami bele foo ami nia oan feto sira ba ema sira nebaa. 22Só sira husu buat ida deit hosi ita hodi hela hamutuk ho ita, hodi sai povu ida deit. Sira husu katak ita nia mane ida-idak tenki hetan sirkunsizaun, hanesan sira mos hetan ona sirkunsizaun. 23Laos sira nia animál sira no sira nia riku-soin no sira nia karau hotu sai ita nian? Nunee mai ita simu sira nia liafuan no sira bele hela ho ita.” 24Nunee ema hotu iha sidade nia portaun nee rona tuir Hamor no Sikém. Mane ida-idak, nebee ema hotu hosi sidade nee, hetan sirkunsizaun.
25Tuir mai, iha loron terseiru, bainhira sira moras hela, Jacó nia oan mane rua, Simeão no Levi, nebee Dina nia maun rasik sira, lori sira nia surik no tama sidade nee. Bainhira sidade nee senti seguru, Simeão no Levi oho mane sira hotu. 26Sira oho Hamor no nia oan mane Sikém ho surik, no sira foti Dina hosi Sikém nia uma no sai ba. 27Jacó nia oan mane sira nee tama ba ema mate sira nia fatin, no sira hadau sasaan hosi sidade nee, tanba ema sira nee mak estraga sira nia alin feto. 28Sira foti sira nia bibi, karau, kuda buru, no buat nebee iha sidade laran no buat nebee iha sira nia rai luan. 29Sira foti ema sira nee nia riku-soin hotu, no sira nia labarik hotu, no sira kastigu ema sira nee nia feen sira no hadau buat hotu iha sira nia uma laran.
30Jacó dehan ba Simeão no Levi, “Imi kria problema mai hau, no halo hau sai dois iha ema sira nia leet nebee hela iha rai nee, nebee ema Kanaan sira no ema Perizeu sira. Ita mak ema uitoan deit no sira bele halibur malu hodi hasoru hau no sira bele destrui hau no hau nia uma kain.” 31Sira hataan, “Nia bele halo ba ami nia alin feto hanesan ho feto aat ka?”
Currently Selected:
Jénesis 34: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
