Jénesis 35

Maromak Foo Bensaun Ba Jacó

1Maromak dehan ba Jacó, “Hamriik no lao sae ba Betél no hela iha nebaa. No halo altár ida iha nebaa ba Maromak nebee hasoru o bainhira o halai hosi o nia maun Esau nia oin.” 2Entaun Jacó dehan ba nia uma kain, ba ema hotu nebee hamutuk ho nia, “Hasai tiha imi nia maromak sira hosi nasaun seluk nebee iha imi nia leet, hamoos imi nia aan, no troka imi nia ropa. 3Ita sei hamriik no lao sae ba Betél. Hau sei halo altár ida ba Maromak nebee hataan hau iha loron nebee hau laran taridu no Nia mak hamutuk ho hau iha dalan hotu nebee hau lao tuir ona.” 4Sira foo ba Jacó sira nia maromak falsu hotu nebee sira iha, no sira nia brinkus nebee iha sira nia tilun, no Jacó subar sasaan nee iha ai huun boot ida nia okos besik Sikém.

5Entaun sira lao ba, no Maromak halo sidade sira nebee haleu sira sai tauk. Nunee ema iha sidade sira nee la duni Jacó nia oan mane sira. 6Jacó no ema hotu nebee ho nia baa too iha Luz nebee iha rai Kanaan, nebee Betél. 7No nia harii altár ida no hanaran fatin nee El-Betél#35:7 El-Betél katak ‘Maromak hosi Betél’; nebee Betél katak ‘Maromak nia uma’. tanba Maromak mosu ba nia iha nebaa bainhira nia halai hosi ninia maun nia oin. 8No Debora nebee hakiak Rebeka mak mate. Sira hakoi feto nee iha Betél kraik, iha ai huun boot ida nia okos, no fatin nee sira hanaran Alon-Bakut.

9Maromak mosu fali ba Jacó bainhira nia sai hosi Padan-Aram no haraik bensaun ba nia. 10Maromak dehan ba nia, “O nia naran mak Jacó, maibee ema sei la bolu tan o ho naran Jacó. Agora o nia naran mak Israel.” No Maromak bolu nia Israel. 11Maromak dehan ba nia, “Hau mak Maromak Kbiit Makaas. Halo oan sira no aumenta barak. O sei sai nasaun ida, no nasaun barak sei sai hosi o, no liurai sira sei sai hosi o nia oan fatin. 12No rai nebee hau foo ona ba Abraão no Isak nee, Hau foo ba o. No Hau foo rai nee ba o nia oan sira nebee tuir o.” 13Maromak sae hosi Jacó iha fatin nebee Nia koalia ho Jacó. 14Jacó harii fatuk riin ida iha fatin nebee nia koalia ho Maromak. No nia fui oferta hemu nian iha fatuk leten nee, no nia fui mina iha fatuk leten nee. 15Jacó foo naran Betél ba fatin nebee Maromak koalia ho nia.

Rakél No Isak Mate

16Sira lao sai hosi Betél. Bainhira sira sei dook uitoan hosi Efrata, Rakél hetan kanotak moras nebee todan loos. 17Depois, iha tempu nee, bainhira nia kanotak moras makaas hela, parteira dehan ba nia, “Keta tauk, tanba ita hetan oan mane ida fali.” 18Bainhira Rakél nia klamar atu sai, tanba nia atu mate, nia hanaran oan mane nee Ben-Oni. Maibee ninia aman hanaran nia Benjamin.#35:18 Ben-Oni katak ‘Oan Hosi Hau Nia Terus’. Benjamin katak ‘Oan Hosi Hau Nia Liman Loos’. 19Depois Rakél mate, no sira hakoi nia iha dalan ba Efrata, nebee Belém. 20Jacó harii fatuk riin iha Rakél nia rate leten, no ida nee mak Rakél nia rate nia fatuk riin nebee sei iha too ohin loron. 21Israel kontinua ninia viajen no halo akampamentu iha Uma Aas Edar nia sorin ba.

22Bainhira Israel hela iha nebaa, Ruben tama no toba ho Bila, nebee ninia aman Israel nia feen kiik. No Israel rona kona ba buat nee. Jacó iha oan mane nain sanulu resin rua. 23Lea nia oan mane sira mak Ruben, nebee Jacó nia oan primeiru, no Simeão, Levi, Judá, Isakar no Zebulón. 24Rakél nia oan mane sira mak José no Benjamin. 25Rakél nia atan feto Bila nia oan mane sira mak Dan no Naftali. 26Lea nia atan feto Zilpa nia oan mane mak Gad no Aser. Jacó nia oan mane sira nee mak moris iha Padan-Aram.

27Jacó baa ninia aman Isak iha Mamre, iha Kiriat-Arba. Fatin nee mak Hebron, iha fatin nebee Abraão no Isak lao ba no hela. 28Isak nia idade mak tinan atus ida ualu-nulu (180). 29Isak nia iis kotu no nia mate, no nia halibur ba ninia bei-ala sira, tanba nia katuas ona no ninia moris nee too ona. Ninia oan mane Esau no Jacó hakoi nia.

Currently Selected:

Jénesis 35: BK

Highlight

Copy

Compare