Roma 14
14
Keta Duun Ema Seluk
1Simu ema nebee iha fiar nebee fraku, maibee keta diskuti malu kona ba buat nebee imi hanoin. 2Tanba ema ida fiar katak nia bele haan buat hotu, maibee ema seluk nebee fraku haan deit modo tahan. 3Ida nebee haan keta hakribi ida nebee la haan. No nia nebee la haan keta tesi lia ba nia nebee haan, tanba Maromak simu ona nia. 4O mak see atu tesi lia ba ema seluk nia atan? Iha ninia patraun rasik nia oin mak nia hamriik ka monu. No nia sei hamriik, tanba Nai bele halo nia hamriik.
5Ema ida hanoin katak loron ida iha folin liu fali loron seluk. Ema seluk hanoin loron hotu hanesan deit. Husik ema ida-idak laran metin ba ninia hanoin. 6Nia nebee foo folin ba loron ida, nia foo folin nee tanba Nai. No nia nebee la foo folin ba loron nee, nia la foo folin nee tanba Nai. Nia nebee haan, haan tanba Nai, tanba nia foo agradese ba Maromak. No nia nebee la haan, nia la haan tanba Nai, no nia foo agradese ba Maromak. 7Tanba ita ida la moris ba ninia aan rasik, no ita ida la mate tanba ninia aan rasik. 8Tanba se ita moris, ita moris ba Nai; no se ita mate, ita mate ba Nai. Moris ka mate, ita mak Nai nian. 9Tanba nee mak Kristu mate no moris hias ona, atu nunee Nia bele sai Nai ba ema mate no ema moris.
10Tanba saa mak o tesi lia ba o nia maluk? Ka tanba saa mak o hakribi o nia maluk? Tanba ita hotu sei hamriik iha Maromak nia kadeira tesi lia nia oin. 11Tanba ema hakerek nanis ona,
“Hau jura hodi Hau nebee moris, dehan Nai,
ain tuur hotu sei hakneak mai Hau,
no nanaal hotu sei foo sai katak Hau mak Maromak.”#14:11 Ka ‘sei hahii Maromak’. Haree Isaias 45:23 no nota.
12Entaun ita ida-idak sei hataan ba Maromak kona ba ita nia aan rasik.
Keta Halo Ema Seluk Sidi
13Nunee mai ita keta foo sala tan ba malu. Maibee desidi atu la tau fatuk sidi nian ka buat seluk atu hanetik maun ka alin ida iha ninia dalan.#14:13 Iha lian Gregu ‘foo sala’ katak tesi lia ka ‘desidi’, no liafuan nee hanesan ho ‘desidi’ iha fraze nebee tuir mai nee. Haree Mateus 7:1. 14Hau hatene no fiar metin iha Nai Jesus katak la iha buat ida nebee la moos mesak deit. Maibee se ema ida dehan buat ruma la moos, entaun buat nee mak la moos ba nia.#14:14 Ema Judeu sira dehan hahaan ruma ‘la moos’ atu sira la bele haan. Haree Apostolu 10:14 no nota. 15Se o nia maun ka alin iha laran susar tanba buat nebee o haan, entaun o la lao iha domin. Tanba Kristu mate ba nia, nunee keta estraga nia. 16Keta husik buat nebee o hanoin mak diak sai buat nebee ema seluk dehan nee mak aat. 17Tanba Maromak nia reinu laos kona ba haan no hemu, maibee kona ba hahalok loos, dame no haksolok iha Espíritu Santu. 18Tanba ema nebee serví Kristu hanesan nee halo Maromak kontenti no ema seluk mos simu nia. 19Nunee mai ita buka buat sira nebee halao dame, no buat sira nebee hametin malu.
20Keta estraga Maromak nia servisu tanba deit ai haan. Buat hotu moos duni, maibee ema halo aat bainhira nia halo ema seluk sidi tanba buat nebee nia haan. 21Ita halo diak se ita la haan naan ka hemu tua uvas ka halo buat saida tan nebee halo o nia maun ka alin sidi.#14:21 Manuskritu balu aumenta ‘ka hanetik nia ka halo nia sai fraku.’ 22O nia fiar nee, kaer deit iha Maromak nia oin. Haksolok ba nia nebee la foo sala ba ninia aan rasik liu hosi buat nebee nia simu. 23Maibee ema nebee duvida kona ba buat nebee nia haan, nia hetan kastigu ona. Tanba nia la haan ho fiar. Buat hotu nebee la mai hosi fiar mak sala.
Currently Selected:
Roma 14: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
