Ɛsedɔ 1

Dí Eezuɛ-ŋai sôŋ a ǹyɔ́mɔɔ Ize

1Zeeka ǹônii-sinaai láa ká ŋí da dínûai, nyii-ŋai da dîa-ni dílì Ize lɔii sui. 2Lubiŋ, Simiɔŋ, Levi da Zuda, 3Isaka, Zɛbulɔŋ Bɛŋsima, 4Daŋ da Nɛfɛtɛli, Gâa da Asɛ. 5Zeeka ŋɔnúu-suui kélee dí kɛ̀ a núu buu lɔ́ɔlu mɛi feerɛ. Zosɛ è kɛ̀ Ize lɔii su Zeeka da ŋɔnûai dí lɛ́ɛ liî naa. 6Zosɛ da nîa-ni é pɛ́lɛ ŋɔnúu-pɔlɔ-ŋai kélee dîa dí nâa sàa. 7Kɛ́lɛ Eezuɛ-ŋai dí ƃûu ƃò dí táma dí ǹɔii láa fɛ́ɛ, wála-wala kɛ́ ƃò díyêei.

8Nya ƃe kâloŋ nina è kɛ̀ Ize lɔii mɛi, nyii vé kɛ́ ní a Zosɛ kɔ́lɔŋɔɔi. 9È mò ŋɔnûai dîa ǹyɛɛi, “Ka gáa, Eezuɛ-ŋai da nâa táma wála-wala kɛ́ ƃò díyêei kúmɛi. 10Kwaa kú táre-pere da kɔ́ri a gɛɛ kú díkpera dífe ŋɔ́nɔ ƃûu ƃó à wàla kɛ́ tí, tãi kɔ́ a pâi pâi la kûai, da pâi kpɔnîi kúkpɔara-ƃelai dîa dí kɔ́ kúpɔ dí pú dí kúla ǹɔii ŋí su.” 11Mɛni ma dí díkɛ̀ a luɛ-ŋa. Dí nûa pú dímɛi a gɛɛ dí Pitɔŋ da Laŋse tɔɔ mì, nyii-ŋai kɛ̀ a daa-lee-ŋai ƃɛ́i è mii-sãai ŋá tɛ̀ naa gîe mai. 12Kɛ́lɛ berei dí kɛ̀ dímɔ̂lɛ̃i lai bere nɔ́ ƃé dí kɛ̀ támai la ǹɔii gwaa kélee. Ize-ŋai dí nâa kɛ̀ yaôi dîa. 13Mɛni ma dí Eezuɛ-ŋai mɔlɛ̃ kpɔ́ a ŋwana-lɔ̂ɔ-pere, 14Dí dífulu-laai kpanaŋ díyêei a tíi kpanaŋ kɛ́ɛ. Dí kɛ̀ pɔ̂rɔ kanêi díkɛ̀ tíi sii támaa kɛ̀ gbâlaŋ-ŋai ŋá.

15Nya ƃe Ize kaloŋ è mò Ibulu fɛ̃ɛ-lee zoo-feerɛi, Sifɛla da Pua dîa, ǹyɛɛ diai, 16“Tãi kà lí la a gɛɛ ká Ibulu nɛnî kélee da maa fúloŋ, ǹolôŋ a kɛ̀ a surɔ̂ŋ-loo ka baa. Kɛ́lɛ, a kɛ̀ a nɛnî-loo, ka fé bàa” 17Kɛ́lɛ vɛ̃ɛ-lee zoo-ŋai dí kɛ̀ yaôi Ɣâla ma dífe gâloŋ wóo sìɣe ní. Nya ƃe dí zinaa-nɛyãai lɛ̀ɛ a dífulu. 18Nya ƃe Ize kaloŋ è vɛ̃ɛ-lee zoo-ŋai tòli é dímarê kɛ́ ǹyɛɛ diai, “Ká zinâa-nɛyãai lɛ̀ɛ a dífulu lé mɛni ma?”

19Vɛ̃ɛ-lee zoo-ŋai dí mò Gâloŋ mâ dîyɛɛi, “Kpɛ́ni fêi, Ibulu-nɛyãai dífe yɛ̂ɛ Ize-nɛyãai. Dímaa fúloŋ-la fé wála ni. Dímaa a fúloŋ vɛ̃ɛ-lee zooi é lɛ́ɛ pâi serîi dîa.” 20Mɛni ma Ɣâla è tɔ̀ɔ vɛ̃ɛ-lee zoo-ŋai pôlu. Eezuɛ-ŋai dí ƃûu ƃò wála-wala kɛ́ ƃò díyêei. 21Ɣâla è gɛ̀ vɛ̃ɛ-lee zoo-ŋai suu sú é kɛ́tɛ, kpɛ́ni fêi, dí yào mà. 22Nya ƃe è mò ŋɔnûai kélee dîa ǹyɛɛi, “Ibulu-ŋai kélee da a lóŋ-surɔ̂ŋ maa sɔlɔ ƃô ka bili Ǹâai Ya-leei su. Kɛ́lɛ, ka dílônii nɛyãai kélee lɛ́ɛ a dífulu.”

Currently Selected:

Ɛsedɔ 1: KWB

Highlight

Compare

Copy