Ɛsedɔ 2
2
Mose maa-sɔlɔ ƃó-tãi
1Liivi ŋɔsuui su-naloŋ tɔnɔ nyii kɛ̀ máŋ a Liivi ŋɔsuui su núu dai è nɛnî kùla. 2Nya ƃe nɛnîi è koo sìɣe é lóŋ-surɔ̂ŋ maa sɔlɔ ƃó. Tãi nɛnîi è gàa la a gɛɛ ǹôloŋ lɛ̂lɛɛi, è nòo a ɣáloŋ saaƃa. 3Tãi vé ŋɔ́nɔ kɛ́ ní pɔrîi noôi lai, è kpɔ̂lɔ kpɛ̀tɛ é ƃóo-pɔrɔ sia ma da kotâa, é ǹôloŋ láa zu é zee ǹyái ŋá galai su. 4Ǹîa-nɛnii è kɛ̀ tɔɔni kwaa kôyaa ma gɛ́ nàa kàa a gɛɛ é m̀ɛnii káa pâi ǹôloŋ kɛ̂i.
5Ǹyaŋ Gâloŋ ǹóŋ-nɛnii è pà ŋwaâi ǹyái su. Tãi ŋɔyee-mu-nɛyãai pà ǹáa lɛɛ̂i dí kɛ̀ siâi la ǹyái kɔlɛi, gâloŋ ǹóŋ-nɛnii è gbɔ̂lɔi kàa galai su é ǹyée mu-nɛyãai dɔnɔ tɛ̀ɛ a gɛ́ɛ é pá la. 6È ǹá ƃò é ǹôloŋ káa láa-ni zu gɛ́ wɔ́lɔ. M̀alôŋ è zòŋ ǹyɛɛi, “Ibulu-ŋai díkwâtara-ŋai dɔnɔ ká ŋí.”
7Nya ƃe ǹôloŋ ǹîa-nɛnii è mò Gâloŋ ǹóŋ-nɛnii ma ǹyɛɛi, “Ŋa pɔ̂ri liî ŋá Ibulu-kɔ̃ɔ-lee tóli a gɛɛ é ǹôloŋ kúla zu ímɛni ma?”
8Gâloŋ ǹóŋ-nɛnii ǹyɛɛ mai, “Óoei lí.” Nya ƃe nɛnî-loi è lì é ǹôloŋ kpɔ́ɔi leei tóli. 9Nya ƃe Gâloŋ ǹóŋ-nɛnii è mò ma ǹyɛɛ, “Ǹôloŋ ŋí síɣe mî í gula zu ŋa, pâi ífela fêi m̀ɛni ma.” Nya ƃe nɛnîi è zìɣe é gula zu. 10Tãi ǹôloŋ è kɛ̀tɛ lai, è pà la Gâloŋ ǹóŋ-nɛnii pɔ́. Ǹôloŋ è nâa kɛ̀ a gâloŋ ǹóŋ-nɛnii ǹóŋ. È ǹáa sèe a Mose, ǹyɛɛi, “Kpɛ́ni fêi, ŋá gùla yá su.”
Mose è pù é lí Midiaŋ
11Tãi Mose è nâa kɛ̀ la a núu kɛ́tɛi, è lì ŋɔnûai nàa kâai a tãi tɔnɔ é berei kàa dí kɛ̀ mɔ̃lɛi lai. È Ize-nuu tɔnɔ kàa gɛ́ Eezuɛ nuu tɔnɔ lòkwa, nyii kɛ̀ a ŋɔnûai dɔnɔi. 12È gɔlɛ kàa, vé núu da káa ní. Nya ƃe è Ize-nuui pàa é ǹoo ŋãyai su. 13Bôlu ma ɣelei è lì pôlu é Ibulu-nuu feerɛ káa díkɛ kɔ̀. È m̀ɛni nyɔ́mɔɔ kɛ́-nuui marê kɛ̀ ǹyɛɛ mai, “Íkaa íkpɔɔi-nuui lôkwai lé mɛni ma?”
14È ŋ̀óo su tòo ǹyɛɛ ma, “Gbɛ̂ɛ ƃé íkɛ̀ a mɛni ŋá tée-nuu kú mɛi? Gáa íkili ŋá a gɛɛ í ḿbaa yɛ̂ɛ berei í Ize-nuui tí pàa lai?” Mose è nâa kɛ̀ yaôi. È gíli ŋá sia ǹyɛɛi, “Ŋá gɔ́lɔŋ m̀ɛnii ŋá gɛ̀i aâ kula.” 15Tãi Gâloŋ è m̀ɛnii ŋí mɛ̀ni lai, è kɛ̀ ŋ̀wɛ̂lii é Mose pàa. Kɛ́lɛ Mose è pù é lí Midiaŋ lɔii su.
È lì é sée naa ya-loa tɔnɔ kɔlɛ. 16Zâla láa-soŋ-nuui kɛ̀ Midiaŋ ǹônii-nɛyãai dí kɛ̀ lɔ́ɔlu mɛi feerɛ. Dí pà ǹya-loai lá yá kulâi. Dí daa-tulɛ-ŋai kpele sɛŋ-folo-ŋai láa fɛ̀ɛ a yá dínâŋ ŋɔƃála-ŋai da ŋɔƃoli-ŋai kpele mɛni ma. 17Kɛ́lɛ m̀ála mɛi-káa-ƃelai dí pà dí díkpɛ. Kɛ́lɛ Mose è kpɔ̀ŋ dîa é yá tɛ́ɛ dítaa-tulɛ-ŋai pɔ́. 18Tãi dí pà la pôlui, dínâŋ Zɛtulo è dímarê kɛ̀ ǹyɛɛi, “Gɛ̂ɛi léŋ ka pá sâa pôlu a maa félaai?”
19Dí ŋ̀óo su tòo dîyɛɛi, “Ize-naloŋ tɔnɔ ƃé kúkùla m̀ala mɛi káa-ƃelai yêei. È yá kùla kûɛ máŋ é dɛ́ɛ kútaa-tulɛ-ŋai pɔ́.”
20Nya ƃe è ǹônii-nɛyãai marê kɛ̀ ǹyɛɛ diai, “Nalôŋ kpîŋ káa mí? Ká nɛ̀ɛ naa lé mɛni ma? Ka dóli kwa dîa-ni kú kúlaa míi gîe ma.”
21Mose è nâa pá é gbɛ̀tɛ gíli ŋá a gɛɛ é kɛ́ naa. Nya ƃe Zɛtulo è ǹóŋ-nɛnii Zipola tɛ̀ɛ ƃɔ́ a ŋɔnɛnî. 22Da Zipola dí lóŋ-surɔ̂ŋ maa sɔlɔ ƃò é ǹáa sée a Gesɔŋ ǹyɛɛ, “Kpɛ́ni fêi, ŋgáa a ŋɔ̃ya lɔii da kpɛ́ni su.”
23Tãi su kôya tɛ̀ɛ pôlu ma, Ize kaloŋ è sàa. Eezuɛ-ŋai dí wɔ̀lɔ díluɛ-laai su díkɛ díkpɔŋ-maa-nuu kɔ̀ri. Nya ƃe díwɔlɔ-woo è sèri Ɣâla ma. 24Ɣâla è díwɔlɔ-wooi mɛni, ŋɔkono-teei è gɛ̀ Eberaɣɛ̃ɛ yêei da Aise é pɛ́lɛ Zeeka mai, kíli è tòo ŋ̀á. 25Ɣâla è Eezuɛ-ŋai díluɛ-laai kàa é gbîŋ lɛ́ dîa.
Currently Selected:
Ɛsedɔ 2: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
