Ɛsedɔ 10
10
Gotói
1Yâwɛɛ è ŋɔ́nɔ mò Mose mà ǹyɛɛi, “Lí Gâloŋ pɔ́ naa, ŋa ǹíi su kpànaŋ da ŋɔtíi kɛ́-ƃelai a gɛɛ ŋ̀ɛi-kɛ-maa-ŋai ŋí kɛ́ dísama. 2A gɛɛ ŋɔ́nɔ í pɔ̂ri môi ílônii dîa da ílônii-díwɔ̂ lonii berei ŋá ŋáwala-wâlai lɛ̀ la dîa a tãi ŋá ŋ̀ɛi-kɛ-maa-ŋai ŋí kɛ̀ la dísamai. Kákelee ka pâi gɔ́lɔŋnîi a gɛɛ ńyãa ƃa Yâwɛɛ.”
3Nya ƃe Mose da Eelɔŋ dí lì Gâloŋ pɔ́ naa dîyɛɛ mai, “Yâwɛɛ nyii gáa a Ibulu-ŋai Díɣâlai ǹyɛɛ, ‘Tãi ɣɛɛlu ƃé ƃa pâi ŋ̀óo karâi lai? Ŋánûai lɛ́ɛ naa dí lí a gɛɛ dí vɛli. 4Kɛ́lɛ à kɛ̀ ƃà wàla fáa a gɛɛ í ŋɔnûai lɛ́ɛ naa dí lí, gɛ̀ ní ŋa pâi gotó támaa tɛɛ̂i ílɔii su tínaa. 5Da pâi ǹɔii mɛi pɛlɛ̂i kpɔ́ a sɛŋ núu fa ŋɔ́nɔ ǹɔii kaoi mâ kàa. Zãai máŋ zãoi fé díkara níi, gotó-ŋai da pâi gélee miî dí ŋ̀úru-ŋai kélee mii ílɔii su. 6Da pâi ípɛrɛ-ŋai lá fɛ́ɛ̂i dí ítii-kɛ-ƃelai dípɛrɛ-ŋai lá fɛ́ɛ é pɛ́lɛ Ize-ŋai dípɛrɛ-ŋai dîa. A pâi kɛ̂i a mɛnii ínûai da ínûai díwɔ̂ ǹûai dífe tá gáa ní ɣele ma é síɣe dísɔlɔ ƃó tãi ma.’ ” Nya ƃe Mose è tìnaŋ é Gâloŋ lɛ́ɛ naa é lí.
7Nya ƃe Gâloŋ ŋɔtíi-kɛ-ƃelai dí mò mà dîyɛɛi, “Tãi ɣɛɛlu ƃé nalôŋ ŋí a pâi kúpilîi la mɛni kpɔ̂lu sui? Tɔ́ɔ Eezuɛ sinaai dí lí dí Yâwɛɛ fɛ́li nyii gáa a Díɣâlai. Ífe nîi gáa ni a gɛɛ Ize a wólo?”
8Nya ƃe dí pà pôlu a Mose da Eelɔŋ Gâloŋ ŋɛ́i-tuɛ. Gâloŋ è mò dîa ǹyɛɛi, “Ka lí ká Yâwɛɛ Káɣâlai fɛ́li. Kɛ́lɛ gbɛ̂ɛ-ni ƃé pâi liî?”
9Mose ǹyɛɛ mai, “Kwa pâi liî kwa kúnîa-pɛlɛɛi kúnuu-pɔlɔ-ŋai, kúlônii-sinaai, kúlônii-nɛyãai, é pɛ́lɛ kútaa-tulɛ-ŋai dîa. Kpɛ́ni fêi, kwa pâi kúu kɛ̂i Yâwɛɛ ma.”
10Gâloŋ è mò dîa ǹyɛɛi, “À kɛ̀ ŋá kálɛ̀ɛ naa ká lí a kánɛyâai da kálônii, gɛ̀ ní Yâwɛɛ a kpɔŋ kâa. Fé pâi kálɛɛ̂i naa ká lí a kánɛyâai da kálônii. Gáa a tɔ̃yâ a gɛɛ kákaa mɛni nyɔ́mɔɔ kpɛtɛ̂i kákili ŋá. 11Káai nɔ́ a zinâai ka lí. Kpɛ́ni fêi nyíti ƃé ka ŋ̀wɛ̂lii.” Nya ƃe Gâloŋ è díkpɛ̀ dí kúla ŋ̀ɛ́i.
12Nya ƃe Yâwɛɛ è mò Mose mà ǹyɛɛi, “Íyee sãa Ize lɔii mɛi a gɛɛ gotó é pá Ize lɔii su é galai kélee mii da zãai nyii-ŋai zãoi fé baa níi.” 13Nya ƃe Mose è ŋɔsia-wurii sãa Ize lɔii mɛi. Nya ƃe Yâwɛɛ é gɛ́ fãa é kula vóloi-ƃelai pere é tɛ́ɛ Ize lɔii su a maa fóloi tí da maa kpinii. Tãi ɣele-wala è kɛ̀ lai, vãai è pá a gotó támaa. 14Gotó-ŋai dí Ize lɔii gwaa kélee mɛi pɛ̀lɛ. È kɛ̀ a gotó kpulu su kɛ́tɛ a nyii núu da fé niî wɔ́lɔ da káa ní kpaa máŋ nyii pâi ŋɔ́nɔ kulâi. 15Dí ǹɔii mɛi pɛ̀lɛ kpɔ́ dí ǹɔii mâ kpíni. Dí gala-ŋai kélee mìi ǹɔii mâ, dí wúru-ƃa-ŋai kélee mìi nyii-ŋai zãoi fé bàa níi. Wúru da kélee láa fé lɛɛ ní ma Ize lɔii su.
16Nya ƃe Gâloŋ è Mose da Eelɔŋ tòli a maa felaa ǹyɛɛ diai, “Ŋa sɔnyɔ̂ŋ kɛ́ a Yâwɛɛ nyii gáa a Káɣâlai da káa. 17Mɛni ma ŋa kákperai fêi a gɛɛ ká ńzu-mɛni lɛ̀ɛ a tãi tɔnɔi ŋí ká Yâwɛɛ fɛ́li nyii gáa a Káɣâlai a gɛ́ɛ é zaa tɔŋ-kpɛ-maai ŋí kúla nyée mɛi.” 18Mose è kùla Gâloŋ pɔ́ naa é lí é Yâwɛɛ fɛ́li. 19Nya ƃe Yâwɛɛ è vóloi kulai-pere fãai pène a vóloi liî-pere fãai nyii kɛ̀ a zu kpanaŋɔɔ é gotó-ŋai kélee kùla ǹɔii mâ é dípu Ǹyúo Kpɔ̂lui su. Gotó tɔnɔ kpîŋ fé lɛɛ ní Ize lɔii su. 20Kɛ́lɛ Yâwɛɛ è Gâloŋ líi su kpànaŋ. Vé Eezuɛ-ŋai lɛ̀ɛ ní naa dí lí.
Gbínii
21Nya ƃe Yâwɛɛ è mò Mose mà ǹyɛɛi, “Íyee sãa ŋ̀elei su a gɛɛ tuna-ya kpini é tóo Ize lɔii su gwaa kélee.” 22Nya ƃe Mose è ǹyée sãa ŋ̀elei su, tuna-ya kpini su pîlaŋɔɔ é tóo Ize lɔii su a ɣele kûu saaƃa. 23Ize-ŋai dífe kɛ́ ní pɔ̂ri díkîe-ni kâai, kpaa máŋ dí kula dípɛrɛ-ŋai mu a ŋ̀ele kûu saaƃai. Kɛ́lɛ kwaa ponoɔɔ è kɛ̀ ƃɛ́i Eezuɛ-ŋai dí kɛ̀ naai.
24Gâloŋ è ŋɔ́nɔ Mose tòli ǹyɛɛ mai, “Ka lí ka Yâwɛɛ fɛ́li. Ka kánûai ka lí kɛ́lɛ, ka ká ƃála-ŋai, moli-ŋai da niŋa-ŋai lɛ́ɛ ƃɛ́.”
25Nya ƃe Mose è mò mà ǹyɛɛ, “Gɛ̀ ní fɛ̂ɛ í daa-tulɛ-ŋai ŋí da tɛɛ kúpɔ a gɛɛ kú kéreŋ sâla kula la Yâwɛɛ ma nyii gáa a Kúɣâlai. 26Fɛ̂ɛ nɔ́ kú lí a kútaa-tulɛ-ŋai. Dɔnɔ kpîŋ fa lɛ̀ɛ pôlu. Kpɛ́ni fêi, fɛ̂ɛ nɔ́ kú da siɣe kú sâla kula la Yâwɛɛ Kúɣâlai mâ. Ǹyaŋ kúfe nyii kɔ́lɔŋ-ni kwa pɔ̂ri ziɣêi fɛ̂ɛ kú seri.”
27Kɛ́lɛ Yâwɛɛ è Gâloŋ líi su kpànaŋ. Vé Eezuɛ-ŋai lɛ̀ɛ ní naa dí lí. 28Gâloŋ è mò Mose mà ǹyɛɛi, “Kula ŋ́ɛi! Ífe ŋɔ́nɔ pà ḿbɔ naa. Kɛ́lɛ, ƃa pà ḿbɔ naa ƃa pâi saâi.”
29Mose ǹyɛɛ mai, “Yɛ̂ɛ berei ƃa môi lai, fé ŋɔ́nɔ pâi pâi ípɔ naa.”
Currently Selected:
Ɛsedɔ 10: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
