Ɛsedɔ 11

Mose è Ize-ŋai dílonii sinaai maa ŋuŋ-ŋai saa-mɛni ƃò

1Yâwɛɛ è mò Mose mà ǹyɛɛi, “A lɛɛ a tɔ̀ŋ-kpɛ-maa tɔnɔ nyii ŋa pâi pâi la Gâloŋ pɔ́ da Ize lɔii su-ƃelai. Nàa pôlu ma a pâi kálɛɛ̂i naa ká lí. A pâi máŋ kákelee kákpɛ̂i ǹɔii su. 2Lóno Eezuɛ-ŋai pɔ́ a gɛɛ surɔ̂ŋ kélee é gɔlɛ-ma-nuui marê kɛ. Nɛnî kélee é gɔlɛ-ma-nuui marê kɛ́ káne, gôo da maa-ɣiri-sãa mɛni ma.” 3Ǹyaŋ Yâwɛɛ è gɛ̀ Ize-ŋai dí ƃaa-kɛ-maa tɛ̀ɛ Eezuɛ-ŋai pɔ́. È Mose kɛ̀tɛ máŋ Ize lɔii su Gâloŋ ŋɔtíi-kɛ-ƃelai ŋɛ́i da ǹûai.

4Nya ƃe Mose è mò ǹyɛɛi, “Yâwɛɛ ǹyɛɛ, ‘Ŋa pâi tɛɛ̂i Ize lɔii su a kpíni sáma. 5Ize-ŋai dílônii-sinaai maa-ŋuŋ-ŋai kélee da pâi saâi. É síɣe Gâloŋ ǹóŋ-surɔ̂ŋ maa-ŋuŋ nyii pâi seêi bɔ́ɔ ŋá ŋɔkâloŋ-see-sɛŋ ŋái mâ da yée mu-nɛnii nyii a tíi kɛ̀ mɔlɔŋ sia kɔ̂lii mai mâ, é tóo mála-ŋai, moli ŋai da niŋa-ŋai dílônii-sirɛ maa-ŋuŋ-ŋai kélee dîa. Díkelee da pâi saâi. 6Wɔ́lɔ su kɛ́tɛ a pâi toôi Ize lɔii gwaa kélee ma nyii da fé niî wɔ́lɔ too ní naa kpaa máŋ nyii da a pâi ŋɔ́nɔ toôi naai. 7Kɛ́lɛ, ɣîla kpîŋ fé pâi kpêɣei Eezuɛ-ŋai da dítaa-tulɛ-ŋai dîa. Ka pâi gɔ́lɔnîi nyíŋi su a gɛɛ ńyãai Yâwɛɛ, ŋà Ize-ŋai loai láa da Eezuɛ-ŋai.’ ” 8Mose è mò gâloŋ ma ǹyɛɛi, “Ítii-kɛ-ƃelai kélee da pâi pâi dí pɛ́lɛ ŋ́gɔɔ mu dîyɛɛ ma ka ínûai kákelee ka kula ƃɛ. Ǹyaŋ a kɛ̀ tí, gɛ̀ ní ŋa pâi liî.” Nya ƃe Mose è ǹíi ŋwàna é kúla gâloŋ ŋɛ́i é lí.

9Gɛɛ tíi, Yâwɛɛ è mò Mose mà ǹyɛɛi, “Gâloŋ fé pâi ŋ̀óli tɔɔ̂i íwoo ma. Mɛni ma ŋá ŋɛi-kɛ-maa támaa kɛ̂i Ize lɔii su.” 10Mose da Eelɔŋ dí ŋ̀ɛi-kɛ-maa ŋai ŋí kɛ̀ Gâloŋ ŋɛ́i-tuɛ, kɛ́lɛ Yâwɛɛ è Gâloŋ líi su è kpànaŋ. Vé Eezuɛ-ŋai lɛ̀ɛ ní naa dí kúla ŋɔlɔii su.

Currently Selected:

Ɛsedɔ 11: KWB

Highlight

Compare

Copy