5. Mose 10
10
Moses kjricht wada de Toflen
1Dan säd de Har to mie: Hak die twee Steentoflen, soo aus de ieeschte, un brinj dee nopp no mie oppem Boajch. Un moak die uk eene heltane Kjist. #2Mo 25,10; 34,1 2Ekj woa opp de Toflen de Wieed schriewen, dee ekj opp de ieeschte Toflen jeschräwen haud, de Toflen woone du twei bruakst, un dan saust du dee en de Kjist lajen. #2Mo 32,19 3Un ekj muak dan eene Kjist von Akozjeholt un hakt twei Steentoflen, soo aus de ieeschte twee, un neem de Steentoflen oppem Boajch nopp. 4Un de Har schreef de tieen Jebooten, krakjt soo aus daut ieeschte mol, opp de Toflen. De tieen Jebooten wieren dee woone de Har junt jejäft haud, aus jie rom däm Boajch vesaumelt wieren, un hee von en daut Fia räd. 5Dan dreid ekj mie om un jinkj vom Boajch rauf. Un krakjt soo aus de Har jesajcht haud, läd ekj de Toflen en de Kjist, woone ekj jemoakt haud. Dee sent doa vondoag noch. #2Mo 25,21
6Un de Israeliten reisden von Beerot Bene Jaakan no Moser. Doa storf Aaron, un hee wort doa begroft. Un Aaron sien Sän, Eleasar wort Priesta en Aaron siene Städ. #(6 un 7) 4Mo 33,31-33.37-39; 20,28 7Von Moser reisden see no Gudgoda un dan no Jotbata. Bie Jotbata wieren Wotastreem.
8Un om dee Tiet stald de Har dän Staum Levi aun, daut see de Bundeskjist von däm Harn sien Bunt, droagen sullen. See sullen ver däm Harn stonen un am deenen, un see sullen daut Volkj en sienen Nomen säajnen, soo aus see vondoag noch doonen. #4Mo 6,23-27; 5Mo 18,5 9Daut es wuarom de Leviten kjeen Launt jeorwen haben soo aus de aundre Stam. De Har Gott säd to an: De Har saul jun Oafgoot sennen. #4Mo 18,20
10Un ekj bleef 40 Doag, Dach un Nacht, oppem Boajch, krakjt soo aus daut ieeschte mol. Un de Har horcht noch wada no mie un wort sikj eenich, daut hee junt nich ombrinjen wull. #5Mo 9,9 11Un dan säd hee to mie: Sto opp un go ver daut Volkj, daut see en äa Launt, woont ekj äare Vodasch opp een Eit vesproaken hab, nengonen un daut äat moaken.
12Nu horcht, jie Israeliten, no waut de Har jun Gott von junt velangt: Ieet däm Harn junen Gott un doot waut hee velangt; siet am goot; deent am met jun gaunzet Hoat un june gaunze Seel; #Micha 6,8 13un hoolt däm Harn siene Jebooten un Väaschreften, dee ekj junt vondoag fa jun ieejnen goot jäw. 14Däm Harn junen Gott jehieren aule Himmel un uk de Ieed un aules waut doatoo jehieet. 15Oba de Har wia june Vodasch soo goot, daut hee sikj junt aus sien Volkj wäld, leewa aus irjent een aundret Volkj. #5Mo 7,6
16Siet nich lenja ieejenkoppich. Jehorcht mie bat opp daut latste, un bewiest daut jie mie jehieren; soo aus jie derch daut Beschnieden wiesen, daut jie mie jehieren. #5Mo 30,6 17De Har jun Gott es Gott äwa aule Jetta un Har äwa aule Haren; hee es groot un stoakj. Eena mott staunen äwa am. Hee trakjt kjeenem väa, un lat sikj nich bekjeepen. 18Hee sitt no daut rajcht fa de Weisen un de Wätfrues, un hee räakjent de framde, daut hee dee Äten un Kjleeda vesorcht. 19Un nu, siet oppnäment to de framde; denkjt doaraun, daut jie uk emol framde en Ägipten wieren. #2Mo 22,20-23 20Jie sellen däm Harn junen Gott ieren un am auleen deenen. Siet am tru, un moakt jun Vespräakjen opp een Eit bloos en sienen Nomen. 21De Har es daut eensje met waut jie junt puchen, hee es jun Gott. Hee haft Dinja fa junt jedonen, dee toom wundren un staunen sent, soo aus jie jeseenen haben. 22Aus june Elren emol no Ägipten trocken, wieren see 70 Menschen, un nu sent jie soo väl aus de Stierns aum Himmel. #1Mo 46,27; 5Mo 1,10
Currently Selected:
5. Mose 10: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.