5. Mose 11
11
Gott siene Wunda un Tieekjens
1Siet däm Harn junen Gott goot, un hoolt emma waut hee junt oppjeft en siene Jesazen un Entscheidungen un Väaschreften. 2Denkjt doaraun, woo de Har jun Gott junt belieet haft en daut waut jie aul derchjemoakt haben, soont waut june Kjinja nich kjanen ooda jeseenen haben. Jie sagen siene Majestät, siene stoakje Haunt un sien Oarm, dee nich meed wort; #5Mo 4,36 3jie sagen de Tieekjens un de Dinja dee hee en Ägipten to dän Kjennich un to daut gaunze Launt deed. 4Jie sagen waut de Har met de ägiptische Armee deed, un met aul äare Pieed un Woages, un woo hee daut Schelpmäa leet trigj äwa an ranen un an gaunz venichten deed, soo aus daut bat däm vondoagschen Dach es. #2Mo 14,25.27 5Jie weeten waut de Har fa junt enne Wiltnis deed, un junt bat hia leid; 6jie weeten waut hee to Datan un Abiram, Eliab siene Säns un Ruben siene Grootsäns deed, aus de Ieed sikj op muak un an met äare Zelten un Famieljes un aules waut äat wia veschlukt, daut aule daut sagen. #4Mo 16,25-34 7Jie sent dee waut aul dise groosoatje Dinja jeseenen haben, dee de Har jedonen haft.
Waut de Jehuarsom un Onjehuarsom brinjen
8Un nu hoolt de Jesazen, dee ekj junt vondoag jejäft hab, soo daut jie muchten stoakj sennen un daut Launt junt moaken, woont jie nu gonen entonämen, 9un daut jie kunnen lang en daut Launt läwen, woont de Har june Vodasch un äare Nokomen met een Eit vespruak, daut Launt wua Malkj un Honnich rant. #2Mo 3,17 10Daut Launt, wua jie nengonen daut junt to moaken, es nich soo aus Ägipten es, wua jie jewast sent. Doa seid jie jun Sot, un schauften daut to bewesren, soo aus een Goaden. 11Nä, daut Launt, wua jie boolt nengonen un aunsiedlen woaren, es een Launt met Boaj un Täla un daut woat vom Räajen jewessat. 12Daut es een Launt, fa woont de Har jun Gott emma sorcht, un daut hee emma em Uag haft, vom Aunfank vom Joa bat däm Enj.
13Wan jie de Jesazen hoolen woaren, dee ekj junt vondoag jäw, daut jie sellen däm Harn junen Gott goot sennen un am deenen met daut gaunze Hoat un de gaunze Seel, #(13-15) 3Mo 26,3-5; Jer 5,24 14dan woat hee junt Räajen to de rajchte Tiet jäwen. Hee woat junt dän tiedjen un dän loten Räajen jäwen, soo daut jie jun Jeträajd arnten kjennen un jun Wien un june Eelj nenbrinjen kjennen. 15Dan woat hee junt uk Graus oppe Stapen jäwen fa jun Vee. Dan woa jie äten un saut woaren.
16Paust opp daut jie junt nich veleiden loten, un nich von däm rajchten Wajch rauf komen, un jie met eemol aundre Jetta deenen un ieren. 17Wäajen dan woat däm Harn sien Oaja aunstieen un hee woat dän Räajen opphoolen, daut jun Launt nuscht droagen woat. Dan wudd jie boolt en daut goode Launt, woont de Har junt jeft, utstoawen. #3Mo 26,19-20; 5Mo 28,23-24
18Nämt dise Wieed to Hoat, hoolt dee en june Seel; binjt dee aun de Haunt opp een Zadel, un aum Stiern en een Henjsel. #(18-20) 5Mo 6,6-9 19Jie sellen june Kjinja dee lieren. Rät doavon wan jie tus setten, un wan jie oppem Wajch gonen un wan jie junt dol lajen un wan jie oppstonen. 20Denkjt aun dee wan jie derch de Däa gonen un wan jie derch daut Puat gonen, 21soo daut june Doag un de Doag von june Kjinja muchten velenjat woaren en daut Launt woont de Har opp een Eit vespruak, daut hee june Vodasch daut jäwen wudd, opp soo lang aus de Himmel äwa de Ieed bliewen. 22Un wan jie woaren väasechtich sennen un aul dise Jebooten, woone ekj junt jäw, hoolen woaren, un jie däm Harn junen Gott goot sennen woaren, un opp sienen Wajch gonen un junt aun am hoolen, 23dan woat de Har aul dise Velkja ver junt rut joagen, dee doch jrata un stoakja sent aus jie. 24Jieda Jäajent wua june Feet gonen woaren, woat jun Launt sennen. Jun Launt saul vonne Wiltnis em Sieden bat de Libanon Boaj em Nuaden, un vom Eufrat Riefa bat daut wastne Mäa rieekjen. 25Aulawäajen wua jie en daut Launt gonen woaren, doa woat de Har jun Gott dee Velkja em verut Angst un Forcht fa junt enjoagen. Dit haft hee junt vesproaken. Kjeena woat junt kjennen opphoolen. #2Mo 23,27
26Nu horcht. Ekj sat junt vondoag ver eene Wol. Well jie eenen Säajen ooda eenen Fluch haben? #5Mo 30,1.15.19 27Jie kjrieen eenen Säajen wan jie däm Harn junen Gott siene Jesazen hoolen, dee ekj junt vondoag jäw. #(27 un 28) 5Mo 28,2.15 28Un jie kjrieen eenen Fluch, wan jie dise Jesazen, dee de Har jun Gott junt jeft, nich hoolen woaren, un junt von dän Wajch wajchdreien dän ekj junt vondoag jäw, un aundre Jetta deenen dee jie nienich ea jekjant haben. 29Un wan de Har jun Gott junt en daut Launt nenn brinjt wua jie nengonen, daut et junt saul sennen, dan sell jie daut Vespräakjen von däm Säajen opp däm Garizim Boajch bekaunt jäwen, un de Woarnunk von dän Fluch opp däm Ebal Boajch bekaunt jäwen. #5Mo 27,12-13; Jos 8,33-34 30Dise twee Boaj sent wasten von däm Jordan Riefa, un en daut groote Tol wua de Kanaanita wonen. Dee sent nom Wasten han, nich wiet von de groote More Ieekjen, dicht bie Gilgal. #1Mo 12,6 31Jie sellen nu boolt äwa däm Jordan Riefa gonen, un daut Launt, woont de Har jun Gott junt jäwen well, ennämen un doa aunsiedlen. 32Jie sellen väasechtich sennen un de Jesazen un Väaschreften hoolen, dee ekj vondoag ver junt sat.
Currently Selected:
5. Mose 11: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.