5. Mose 12
12
Eene Städ toom aunbäden
1Dit sent de Jesazen un Väaschreften dee jie met aule Väasecht hoolen sellen, en daut Launt woont de Har, june Vodasch äa Gott, junt jejäft haft: Jie sellen daut ennämen, un de gaunze Tiet daut jie opp dise Ieed sent, doa wonen.
2Wan jie ieescht de Velkja rut joagen, sell jie onbedinjt de Städen vedoawen wua see äare Jetta deenden, soo aus opp äare huage Boaj, opp äare läaje Boaj, un unja jieda jreenen Boom. #2Mo 34,13; 5Mo 7,5.25 3Jie sellen dee äare Aultoaren dolbräakjen un äare steile Steena dolrieten. Jie sellen äare Aschera Jetta vebrennen, un äare Aufbilda von äare Jetta dolhacken. Jie sellen de Nomes von de Jetta utroden. 4Jie sellen däm Harn junen Gott nich soo aunbäden, aus dee Velkja äare Jetta deeden. 5Jie sellen no eene Städ gonen, dee de Har jun Gott von en aul june Stam wälen woat. Doa woat hee wonen un doa sell jie am aunbäden, 6un opp dee Städ sell jie june Opfa un Brauntopfa moaken. Doa sell jie daut Tieendel un june Gow von daut, waut jie met de Henj vedeent haben, hanbrinjen. Un doa sell jie daut Opfa woont jie vesproaken haben, un uk daut woont jie friewellich jäwen, hanbrinjen. Hia sell jie uk de Ieeschtjeburten von jun Vee un vonne Schop hanbrinjen. 7Doa, ver däm Harn junen Gott, woa jie äten, un jie un june Famieljes woaren junt freien fa aules wuaraun jie sent, aul de Dinja en woone de Har jun Gott junt jesäajent haft. 8Dan saul nich mea een jiedra soo doonen aus am daut rajcht sitt, soo aus jie nu doonen. 9Nu sent jie noch nich bat jun Oafgoot, woont de Har jun Gott junt jeft, wua jie tus sennen woaren. 10Wan jie ieescht äwa däm Jordan gonen, un de Har jun Gott junt lat en daut Launt aunsiedlen, woont hee junt jeft, un wan hee junt Fräd jeft met de Fiend, dee runtom junt wonen, soo daut jie junt secha kjennen sennen, #Jos 1,13; 21,44; 1Kjen 5,5; Psa 95,11; Hos 2,20; Heb 4,11 11dan woat de Har jun Gott junt de Städ fa sien Nomen wiesen. Doa sell jie aul june Brauntopfa, un aundre Opfa, jun Tieendel un besondre Gowen, un aules waut jie däm Harn vespräakjen woaren, hanbrinjen. 12Doa sell jie junt ver däm Harn junen Gott freien, jie met june Kjinja un Oabeida un Kjäakjsches, un de Leviten dee en june Städa wonen. Denkjt doaraun daut de Leviten nich äa ieejnet Launt haben woaren. #5Mo 10,9
13Jie sellen june Opfa nich bloos irjent wua moaken wua junt daut jankat. #(13 un 14) Jos 22,16; 3Mo 17,8-9 14Jie sellen opp dee Städ, dee ekj de Har fa junt wälen woa, en eent von june Jäajenden, june Brauntopfa un aundre Opfa brinjen. Doa sell jie aules doonen waut ekj junt väaschriew. 15Oba jie derwen en aul de Städa wua jie wonen, Vee schlachten un Fleesch äten sooväl aus jie wellen, doano aus de Har jun Gott junt säajent. Een jiedra eena, eendoont auf jie aunjenäm sent toom een Opfa moaken ooda nich, derwen Fleesch äten, krakjt soo goot aus jie daut Fleesch von veschiedne Ree äten. #5Mo 12,22; 14,5 16Oba jie sellen nich daut Bloot von een Tia äten. Daut sell jie oppe Ieed jeeten aus Wota. #3Mo 3,17; 17,11 17Daut waut jie däm Harn jäwen sell jie nich en june Städa un Aunsiedlungen äten: daut Tieendel von jun Jeträajd un Wien un Eelj, un de Ieeschtjeburten von jun Vee un Schop, un daut waut jie däm Harn vesproaken haben, ooda june friewelje Gowen, ooda de Gow von daut, waut jie met june Henj vedeent haben. 18Daut sell jie ver däm Harn junen Gott äten, opp dee Städ dee hee fa junt wälen woat. Jie sellen met june Säns un Dajchta, june Oabeida un Kjäakjsches, un dän Levit, dee en june Städa wont, daut jeweide Poat ver däm Harn äten, met Freid fa daut waut jie haben kunt doonen. #5Mo 14,23 19Paust uk opp, daut jie nich de Leviten em Stäakj loten, soo lang aus jie en jun Launt läwen. #5Mo 12,12; 14,27
20Wan de Har jun Gott jun Launt jrata moaken woat, soo aus hee vesproaken haft, un jie sajen, jie wellen Fleesch äten, wiels junt doano es, dan derw jie Fleesch äten krakjt dan wan junt doano es. 21Un wan de Städ, dee de Har jun Gott wält om sienen Nomen fausttostalen, too wiet auf von junt es, dan derw jie von jun Vee ooda Schop, daut de Har junt jejäft haft, schlachten wan jie wellen un daut tus äten, soo aus ekj jesajcht hab. 22Krakjt soo aus jie daut Fleesch von veschiedne Ree äten, derw jie dit äten, auf jie aunjenäm sent toom een Opfa moaken ooda nich. #5Mo 12,15 23Oba wäat junt jäajen daut Bloot äten. Daut Bloot es daut Läwen, un jie sellen nich daut Läwen met daut Fleesch toop äten. #5Mo 12,16 24Jie sellen nich daut Bloot äten. Daut sell jie soo aus Wota oppe Ieed jeeten. 25Jie sellen daut nich äten. Un wan jie daut doonen, waut ver däm Harn junen Gott rajcht es, woat junt un june Kjinja daut goot gonen. 26Brinjt waut jie däm Harn jeweit haben un de vesproakne Opfa no de eene Städ dee de Har wälen woat. 27Jie sellen june Brauntopfa, beides daut Fleesch un daut Bloot, opp däm Aultoa lajen, dee fa däm Harn junen Gott es. Un von de Opfa wua jie daut Fleesch äten, sell jie daut Bloot oppem Aultoa fa däm Harn junen Gott jeeten. #5Mo 12,6 28Hoolt aul dise Väaschreften krakjt soo aus ekj junt dee jäw. Wan jie dee hoolen, un jie daut doonen waut goot un rajcht es fa däm Harn junen Gott, dan woat junt un june Kjinja daut opp emma goot gonen.
29Wan de Har jun Gott aul ver junt woat de Velkja utroden, wua jie nengonen om daut junt to moaken un doa auntosiedlen, 30dan wäat junt daut jie nich met de relijeese Sitten metjenomen woaren, woone de Velkja dee doa ver junt wonden un utjerot sent, eewden. Froacht nich: Woo haben dise Velkja äare Jetta jedeent, daut jie daut krakjt soo kjennen. #2Mo 23,24; Hes 20,32 31Deent däm Harn junen Gott nich soo aus dee äare Jetta deenden. Wäajen dee eewen aule oppscheiselje Sitten, dee däm Harn junen Gott jäajenaun sent. Dee opfren soogoa äare Säns un Dajchta em Fia fa äare Jetta.
Currently Selected:
5. Mose 12: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.