5. Mose 13
13
Woarnunk äwa faulsche Jetta
1Siet väasechtich daut jie aules biehoolen waut ekj junt oppjäw. Jie sellen doa nuscht bie doonen un nuscht doavon tosied saten. #5Mo 4,2
2Wan doa een Profeet ooda eena, dee eenen Droom utlajcht, mank junt kjemt, un dee junt een Tieekjen ooda een Wunda jeft, 3un soogoa wan daut Tieekjen ooda Wunda waut hee jeft dan romkjemt, un hee dan sajcht: Well wie no eenen aundren Gott gonen, un däm deenen, soonen aus jie nich ea jekjant haben, 4dan sell jie nich no däm Profeet, ooda däm waut dän Droom dieden deit, horchen. De Har jun Gott prooft junt doamet auf, toom seenen auf jie däm Harn junen Gott met daut gaunze Hoat un met de gaunze Seel goot sent. #5Mo 8,2 5Jie sellen opp däm Wajch gonen dän de Har jun Gott junt jeft un Forcht fa am haben. Jie sellen siene Jebooten hoolen un no sien Wuat horchen. Jie sellen am deenen un junt aun am hoolen. 6Oba soonen Profeet, ooda een Mensch waut soo Dreem utlajcht, sell jie ombrinjen. Dee haft junt jelieet jäajen däm Harn junen Gott gonen, dee junt doch ut Ägipten brocht un junt von ut de Sklowarie loos sad. Soon Profeet haft junt jelieet, daut jie dän Wajch veloten dän de Har junt jeboden haft, un soon beeset sell jie von mank junt utroden. #5Mo 18,20; 1Kor 5,9.13
7Doa mucht junt wäa em vetruen, soona aus eenem siene Mutta äa Sän, ooda eenem sien Sän ooda Dochta, ooda eenem siene Fru dee hee goot es, ooda een basta Frint, em Jeheemen aunkroagen un sajen: Well wie gonen aundre Jetta deenen, soone waut jie un june Vodasch nich jedeent haben. 8Eenje muchten junt tooräden aundre Jetta to deenen, soone aus de Velkja runtom junt deenen, krakjt eendoont auf von Velkja von dicht bie ooda von wiet auf. 9Lot junt nich von soone beräden, un horcht nich emol no dän. Jie sellen kjeen Metlieden met soon Mensch haben. Jie sellen am nich schoonen ooda Schutz jäwen. 10Jie sellen däm ombrinjen. Wäa soont utfinjt, saul daut ieeschte siene Haunt aun däm lajen am omtobrinjen, un dan saul daut gaunze Volkj methalpen. #5Mo 17,7 11Steenicht däm daut hee stoaft, wäajen hee junt haft veleiden wult von däm Harn junen Gott, dee junt ut Ägipten jerat haft, wua jie Sklowen wieren. 12Dan wan daut gaunze israelitische Volkj doavon hieren woat, woaren see Forcht haben un kjeena von junt woat sikj noch wada soo veschuldjen.
13Wan jie ieescht en dee Städa wonen, woone de Har jun Gott junt jeft, woa jie veleicht hieren, 14daut eenje schlajchte Menschen de Lied en äare Staut haben opp eenen orrajchten Wajch jefieet un an berät haben framde Jetta to deenen, soone aus jie noch nienich jedeent haben. 15Wan jie von soont hieren, dan sell jie nofroagen un daut bat opp daut latste nosieekjen. Wan daut dan werkjlich soo es, daut soone oppscheiselje Dinja mank junt sent, 16dan sell jie de Lied en soone Staut met daut Schwieet ombrinjen. Aule Menschen un aulet Vee saul doa venicht woaren. #5Mo 20,16-18 17Un jie sellen aules waut de Lied en de Staut haben, medden enne Staut toopbrinjen. Jie sellen de Staut un aul äare Sachen vebrennen aus een gaunzet Brauntopfa fa däm Harn junen Gott. De Staut saul een Klompen Wrak bliewen un nienich wada oppjebut woaren. 18Jie sellen kjeene Sachen von dee Staut fa junt hoolen, soo daut de Har kaun von sienen Oaja wajchdreien, un daut hee junt kaun Jnod wiesen, un en siene Jnod junt kaun een grootet Volkj moaken, soo aus hee june Vodasch daut opp een Eit vesproaken haft. #Jos 7,1-26 19Wan jie daut doonen woa jie däm Harn junen Gott jehorchen un aul siene Jebooten hoolen dee ekj junt vondoag jäw, un jie wudden daut doonen waut rajcht es fa däm Harn junen Gott.
Currently Selected:
5. Mose 13: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.