5. Mose 14
14
Woo see nich truaren sellen, un waut see äten kjennen
(3Mo 11,1-19)
1Jie sent däm Harn junen Gott sien Volkj. Un jie sellen junt nich aum Kjarpa schnieden ooda junt väaren aum Kopp kolkoppich schäaren, wan jie äwa eenen Doot truaren. #3Mo 19,27-28; Jer 47,5; Hes 7,18 2Jie sent däm Harn junen Gott jeweit, un de Har haft junt jewält von aule Velkja oppe Ieed, daut jie sien besondret Volkj sent.
3Jie sellen nuscht wadalichet äten. 4De Tieren von woone jie äten derwen, sent de Rinda, de Schop un de Kosen, 5de veschiedne Ree, wille Schop, un wille Kosen. 6Aule Tieren dee een Hooft haben, daut en twee deelen deit, un dee äa Fräten wadakeiwen, derw jie äten. 7Oba von soone waut entwäda wadakeiwen ooda een jespoolden Hooft haben, sell jie nich vom Kameel, vom Hos, ooda vom Ieedschwien äten. Dee sent jesazlich orrein fa junt. 8Un vom Schwien sell jie nich äten, wäajen wan dee doch eenen jespooldet Hooft haft, deit daut Schwien oba nich wadakeiwen. Daut Fleesch sell jie nich äten un een doodjet Schwien sell jie nich aunschieren. 9Von de Tieren waut em Wota läwen sell jie bloos dee äten waut Floosen un Scheepen haben. 10Von soon Tia waut nich Floosen ooda Scheepen haft sell jie nich äten. Dee sent jesazlich orrein fa junt. 11Jie derwen von aule Väajel waut jesazlich rein sent äten. 12Oba dee von woone jie nich äten sellen sent de Odlasch, de Oshakasch, 13aule veschiedne Hofkje, 14aule veschiedne Kraujen, 15Straussen, un Meewen, 16de groote Ulen, de kjliene Ulen un de wille Heena dee oppem Wota läwen, 17Ulen enne Wiltnis un aundre Väajel, dee doodjet Fleesch un doodje Fesch fräten, 18Storchen, Reiasch, un Flautamies. 19Aule Kjniepasch met Flichten waut schwoarmen sent jesazlich orrein. 20Jie derwen bloos reine Väajel un Heenavee äten.
21Jie sellen kjeen Tia äten waut von selfst doot jegonen es. Oba jie derwen daut aun framde jäwen, daut see daut äten ooda aun aundre vekjeepen. Jie sent een Volkj woont däm Harn junen Gott jeweit es.
Jie sellen eene junge Kos nich en äare Mutta äare Malkj koaken. #2Mo 22,30; 23,19
Daut tieende Poat jehieet Gott
22Jie sellen jieda Joa een Tieendel von de Arnten von june Flekja tosied saten. #3Mo 27,30 23Got met daut Tieendel no dee Städ woone de Har jun Gott wält toom sienen Nomen doa bekaunt moaken. Doa sell jie daut Tieendel von jun Jeträajd, jun Wien, june Eelj, un de Ieeschtjebuarne von jun Vee un Schop äten. Dit es doatoo daut jie Forcht fa däm Harn junen Gott lieren, opp aule Tieden. #5Mo 12,17-18; 15,19-23 24Wan daut Tieendel von de Arnt, met woont de Har junt säajent, too väl fa junt es daut jie daut dän gaunzen langen Wajch no dee Städ brinjen kjennen, wua de Har haben well daut jie am aunbäden, 25dan vekjeept daut Tieendel, un hoolt daut Jelt, daut jie daut kjennen no dee Städ nämen, wua de Har well, daut jie am aunbäden. 26Doa brukt daut Jelt von daut Tieendel un kjeept waut jie wellen fa de Opfa un toom äten, auf Oss ooda Schop, Wien ooda waut toom drinkjen, un ät daut doa un freit junt doa ver däm Harn junen Gott, jie un aul june Menschen. 27Vejät nich de Leviten dee en june Staut wonen. Dee haben kjeen Launt jeorwen. #5Mo 12,12.19
28Jieda dreddet Joa sell jie jun gaunzet Tieendel en june Städa tooplajen. #3Mo 27,32-33; 5Mo 26,12-15 29Jäft dit de Leviten dee kjeen Launt jeorwen haben, un de framde en june Staut, un de Weisen un Wätfrues, daut see sikj doavon saut äten kjennen. Doot dit ut jehuarsom fa däm Harn junen Gott daut hee junt en aul de Oabeit dee jie oppnämen säajnen kaun.
Currently Selected:
5. Mose 14: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.