5. Mose 15
15
Daut Entlotungsjoa
1Jieda säwendet Joa sell jie dee, waut junt waut schuldich sent, äare Schult vejäwen. #2Mo 23,10-11 2Dit es waut jie em Entlotungsjoa doonen sellen. Een jiedra, dee aun een Israelit Jelt jeliet haft, saul de Schult strikjen un vejäwen. Hee saul nich opp de Tolinj bestonen von eenen Israelit, dee doch sien Brooda es. De Vezeiunk dee hia bekaunt jejäft woat, es vom Harn. #Neh 5,10; 10,32 3Von eenen framden kjenn jie opp jun Poat bestonen, oba dienen Brooda saust du vejäwen. 4De Har jun Gott woat junt säajnen en daut Launt woont hee junt aus een Oafgoot jeft, un doa woaren kjeene nootliedende mank junt sennen, 5wan jie däm Harn junen Gott jehorchen woaren, un jie oppaussen woaren daut jie dit gaunze Jeboot hoolen, woont ekj junt vondoag jäw. 6De Har woat junt säajnen, krakjt soo aus hee vesproaken haft. Jie woaren aun väle Lenda utlieen, un von kjeene selfst lieen; jie woaren Macht haben äwa väle Lenda, un dee woaren nich äwa junt Macht haben. #5Mo 28,12
7Wan jie en daut Launt sent, woont de Har jun Gott junt jeft, un doa een Israelit es dee Noot litt, dan sell jie nich jun Hoat jäajen am hoat moaken un am nuscht jäwen. #1Joh 3,17 8Jie sellen väl leewa jenstich sennen un am lieen waut am fält, krakjt eendoont von waut. #Luk 6,34-35 9Wäat junt doafäa, daut jie nich orrajcht doonen un aules trigjhoolen wiels jie weeten, daut daut säwende Joa, daut Entlotungsjoa, dicht bie es. Dee Mensch wudd dan däm Harn aunroopen un jie wudden Schult opp junt brinjen. 10Jie sellen mildjäwrich sennen un nich em Hoat aufjenstich bliewen. Wan jie däm Harn junen Gott jehorchen woaren, woat hee junt doafäa säajnen en aules waut jie doonen. #2Kor 9,6-7
11Doa woaren emma oame em Launt sennen. Doawäajen saj ekj, siet mildjäwrich to junen Brooda dee oam ooda schlajcht auf es. #Jes 58,7; Mat 26,11; Jak 2,15-16
Äwa Sklowen frieloten
(2Mo 21,2-11)
12Wan een Israelit, auf Maun ooda Frumensch, aun wäm vekoft woat aus een Sklow, saul dee sas Joa fa dämjanjen deenen. Un dan en daut säwende Joa saul dee frie jeloten woaren. #Jer 34,14 13Un wan dee frie jeloten woat, dan lot am nich onen irjent waut gonen. 14Jäft am friejäwrich von daut met waut de Har jun Gott junt jesäajent haft, von Schop un Jeträajd un Wien. 15Hoolt emma em Denkj daut jie emol Sklowen en Ägipten wieren un daut de Har jun Gott junt frie muak. Doawäajen jäw ekj junt dit Jeboot vondoag. #5Mo 5,15 16Wan soon Sklow oba nich well wajchgonen, wiels hee dän Wieet un siene Buararie jleicht, un am daut scheen jeit, 17dan saul de Wieet eenen Als nämen un daut derch sien Ua em Däarejerecht nenn spekjen. No daut saul hee opp emma fa däm een Sklow bliewen. Doot daut krakjt soo met een Frumensch dee een Sklow bliewen well. 18Lot junt daut nich schod sennen wan jie Sklowen frie moaken. Denkjt doaraun daut dee fa sas Joa jedeent haben, fa haulf soo väl Onkosten aus eenen aunjenomnen Oabeida. De Har jun Gott woat junt dan säajnen en aules waut jie doonen.
Äwa daut Ieeschtjebuarne vom Vee
19Jie sellen aule ieeschtjebuarne Bolles un Bakj en june Häaden däm Harn junen Gott weien. Jie sellen nich met eenen ieeschtjebuarnen Oss schaufen un een ieeschtjebuarnet Schop sell jie nich schäaren. #2Mo 13,2.13-16 20Jie sellen, een jiedra met siene Menschen toop, jieda Joa daut Ieeschtjebuarne von jun Vee un june Schop, ver däm Harn junen Gott oppäten opp de Städ, dee de Har sikj wälen woat. #5Mo 14,23 21Wan doa oba waut orrajcht es met daut Tia, wan daut kjräplich ooda blint es ooda doa sest waut schlemmet es, dan sell jie daut nich fa däm Harn junen Gott opfren. #3Mo 22,20 22Schlacht daut en june Städa un ät aula doavon, krakjt soo aus een willet Ree, eendoont auf jie jesazlich rein sent ooda nich. #5Mo 12,15.22 23Oba daut Bloot sell jie doavon nich äten. Daut sell jie soo aus Wota oppe Ieed jeeten. #5Mo 12,16
Currently Selected:
5. Mose 15: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.