5. Mose 16
16
Daut Passafast
(2Mo 12,1-20)
1Hoolt en de Moonat Abib daut Passafast fa däm Harn junen Gott. Daut wia em Moonat Abib daut de Har jun Gott junt enne Nacht ut Ägipten rut brocht. #2Mo 12,1-20 2Got no de Städ dee de Har jun Gott wälen woat, daut sien Nomen doa sennen woat, un moakt doa daut Opfa fa daut Passafast fa däm Harn junen Gott met een Tia von june Häaden. 3Jie sellen doa nuscht met bie äten daut met Häw enjerieet es. Säwen Doag sell jie Broot äten daut kjeen Häw doabennen haft. Daut es Liedensbroot fa junt, wiels jie soo bosich ut Ägipten rut flichten musten. Doot dit daut jie emma dän Dach em Denkj hoolen aus jie ut Ägipten rutkjeemen. #2Mo 12,11 4Fa säwen Doag saul doa kjeene Häw en june gaunze Jäajent to finjen sennen. Doa saul kjeen Fleesch bat däm näakjsten Morjen äwabliewen von daut Opfa aum ieeschten Owent.
5Jie sellen daut Opfa toom Passafast nich en bloos irjent eent von june Städa opfren. 6Jie sellen daut opp dee Städ opfren, woone de Har jun Gott wälen woat, daut jie am doa aunbäden sellen. Jie sellen daut doonen wan de Sonn unjajeit, aun dän Dach aus jie emol ut Ägipten kjeemen. 7Jie sellen daut Fleesch opp dee Städ koaken, woone de Har jun Gott fa junt wält. Aum Morjen sell jie dan no june Zelten gonen. 8Dan fa sas Doag sell jie onjesuadet Broot äten un aum säwenden Dach sell jie eene Vesaumlunk fa däm Harn junen Gott aufhoolen. Dan sell jie kjeene Oabeit doonen.
Daut Wäakjenfast
9Jie sellen säwen Wäakj auftalen von dan, aus jie daut ieeschte mol met de Sans em Jeträajd nenn schnieden, 10un dan sell jie daut Wäakjenfast fa däm Harn junen Gott hoolen. Doatoo sell jie een frieweljet Opfa brinjen, doano aus de Har junt jesäajent haft. #2Mo 34,22 11Freit junt ver däm Harn junen Gott, toop met june Säns un Dajchta, Kjnajchts un Kjäakjsches, un de Leviten dee en june Städa sent, de framde, de Weisen un de Wätfrues en june Jäajent. Doot dit opp dee eene Städ wua mien Nomen tus es. 12Denkjt doaraun daut jie framde un Sklowen en Ägipten wieren un hoolt dise Väaschreften bat opp daut latste. #5Mo 5,15
Daut Loofboodenfast
13Wan jie ieescht daut Jeträajd jedrascht haben un de Wiendruwen jeprast haben sell jie een säwendoagschet Fast fieren. Daut es daut Loofbooden Fast. 14Jie sellen daut met june Säns un Dajchta, june Kjnajchts un Kjäakjsches, de Leviten, de framde, de Weisen un de Wätfrues en june Jäajent toop fieren. #5Mo 26,11; Jes 30,29 15Fieet daut Fast fa däm Harn junen Gott fa säwen Doag opp dee Städ woone de Har fa junt wälen woat. De Har jun Gott woat junt säajnen en aul june Arnten un en aules waut june Henj verechten, soo daut jie en aules Freid haben woaren.
16Dree mol em Joa sellen aule Mana ver däm Harn komen, opp dee Städ dee hee doatoo wälen woat. Jie sellen emma fa daut Fast met daut onjesuade Broot, daut Wäakjenfast, un daut Loofbooden Fast gonen un nich onen eene Gow. 17Brinjt soo aus jie kjennen, doano aus de Har jun Gott junt jesäajent haft.
Von Rechta un Beaumte
18Jie sellen Rechta un Beaumte aunstalen, dee daut Volkj rajcht rechten un väastonen. En aul dee Städa, dee de Har jun Gott junt jeft, sell jie dee aunstalen. #4Mo 11,16; 5Mo 1,16-18 19Jie sellen nich ojjerajcht rechten. Trakjt kjeenem väa. Un lot junt nich bekjeepen, ooda beschenkjen, wiels soon Jeschenkj moakt soonen Mensch blint, dee sest goot vestonen kaun, un vedreit daut Wuat von däm dee rajcht jehaundelt haft. #1Sam 8,3 20Sträft no daut rajcht un bloos no daut rajcht. Dan woa jie daut Launt, woont de Har jun Gott junt jeft, ennämen un doa lang wonen kjennen.
21Wan jie eenen Aultoa fa däm Harn junen Gott oppstalen, sell jie doa nich een Ascherapol biesied stalen. #5Mo 7,5; 2Kjen 23,4 22Stalt uk kjeenen Steen opp, dän jie aunbäden ooda deenen woaren. Soont es däm Harn sea jäajenaun. #3Mo 26,1; Jer 2,27
Currently Selected:
5. Mose 16: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.