Juan 19

1Ja cꞌa Pilato arjaꞌ xucꞌamel ja Jesús in xuyaꞌ orden chi rapaxi. 2Ja cꞌa soldado cꞌo jun corona quichomarsaj, qꞌuix quecoj. Ja tok chomarstaj cumal quecoj pa rwiꞌ ja Jesús. In cꞌo jun tziak morada quecoj tre. 3Cꞌacꞌariꞌ queyaꞌ jun saludo tre pro jariꞌ xa nquiyokꞌbej rxin:

—Atat at rey quixin ja tinamit Israel, queriꞌ quibij tre in queyaꞌ kꞌaꞌ chi rpalaj chakajaꞌ. 4Xelto chic jutij ja Pilato chipan ja kꞌetbaltzij in xbij chique ja raj Israel:

—Tetzꞌataꞌ mpeꞌ riꞌ, camic npabaꞌ chewach ja Jesús utzcꞌa chi newotakij chi anin ni majun ril nak ta xinwil, neꞌ chique. 5Cꞌacꞌariꞌ xelto ja Jesús, rcojon ja corona ja qꞌuix ocnak in chakajaꞌ rcojon ja tziak ja morada.

—Tetzꞌataꞌ mpeꞌ ja rachi riꞌ, neꞌe ja Pilato chique. 6Ja cꞌa jefe quixin sacerdote e cachbil ja pulisiyaꞌ ejeꞌeꞌ tok quetzꞌat ja Jesús quemaj rakoj quechiꞌ:

—Tacamsaj chwach cruz, tacamsaj chwach cruz, xecheꞌe.

—Pro ja ntzꞌat anin ni majun ril, mejor tecꞌamaꞌel ixix, ixix cꞌalaꞌ nixripo rxin chwach cruz, neꞌe ja Pilato chique.

7—Ajoj cꞌo jun ley kaxin in jariꞌ ley nbini chi yatal trij alaꞌ jun achi leꞌ chi ncamsaxi como arjaꞌ xbij: —Anin ja rin Ralcꞌwal Dios, kas neꞌe, queriꞌ quibij tre ja Pilato. 8Ja cꞌa Pilato arjaꞌ tok xcꞌaxaj chi queriꞌ rbin ja Jesús más chi na xbej riꞌ rmal. 9Xoc chic jutij chipan ja jay in xcꞌaxaj chic tre ja Jesús:

—¿Bar cꞌa kas atpenak wiꞌ? neꞌ tre. Pro ja Jesús arjaꞌ ma xcꞌulbaꞌ ta ja cꞌaxax tre. 10Ja cꞌa Pilato xbij chic tre:

—¿Nak tre tok matacꞌulbaꞌ ja ncꞌwaxaj chawe? ¿La ma awotak ta cꞌa chi anin cꞌo nukꞌaꞌ chawe ja wi natnsokpijel owi nyaꞌ orden chi natrip chwach cruz? neꞌ tre.

11—Ja wixta maquita yatajnak chawe rmal ja Dios ja cꞌo chilaꞌ chicaj ni ta cꞌa majun akꞌaꞌ ariꞌ chwe. Rmalcꞌariꞌ nbij chawe camic, más chi na nim ja ril ja jacho wxin pan akꞌaꞌ, neꞌe ja Jesús tre.

12Ja cꞌa Pilato tok xcꞌaxaj ja bix chic tre congana xutij rukꞌij chi nsokpijel ja Jesús pro ja raj Israel ejeꞌeꞌ quemaj chic jutij rakoj quechiꞌ, quewaꞌ quibij tre riꞌ:

—Atat, wi nasokpijel ja rachi leꞌ jariꞌ ma at ramigo ta ja nimlaj rey César. Como ja rachi leꞌ arjaꞌ xucoj riꞌ como rey in xa nak ta ja nucoj kaj riꞌ ruyon como rey arjaꞌ rcꞌulel ja César, xecheꞌ tre. 13Ja cꞌa Pilato tok xcꞌaxaj ja quibij tre cꞌacꞌariꞌ xercꞌamaꞌpi chic jutij ja Jesús. Cꞌacꞌariꞌ tzꞌabeꞌ chipan ja lugar ja bar nbij wiꞌ tre jun preso ja wi cꞌo ril owi mta. Jariꞌ lugar cꞌo rubiꞌ nbixi, Ja Lugar Empedrado neꞌxi, ja cꞌa chipan ja tzobal hebreo Gabata neꞌxi. 14Pa jun pispra rxin nmakꞌij pascua bantaj wiꞌ ja wariꞌ, pa ncꞌajkꞌij lariꞌ ja tok bantaji. Tzijon chic jutij ja Pilato cuqꞌuin ja raj Israel, quewaꞌ xbij chique riꞌ:

—Tetzꞌataꞌ mpeꞌ riꞌ, waweꞌ cꞌo wiꞌ ja rey ewxin, neꞌ chique.

15—Tacamsaj, tacamsaj, chwach cruz tacamsaj wiꞌ. Queriꞌ quibij. Ja cꞌa Pilato xbij chic chique:

—¿La cꞌol egana chi nrip chwa cruz ja rey ewxin? neꞌ chique. Ja cꞌa jefe quixin sacerdote ejeꞌeꞌ quibij tre:

—Mchita jun rey ja cꞌo chi ta rukꞌaꞌ chake, xa ni ruyon wiꞌ ja César, xecheꞌ tre. 16Cꞌacꞌariꞌ jachi ja Jesús pa quekꞌaꞌ rmal ja Pilato chi ncamsax chwach cruz. Ja tok jachtaj rmal cꞌacꞌariꞌ cꞌamarel.

* * * * * * * * * *

17Queriꞌ xuban ja Jesús, be. Cꞌo jun cruz rijkajel, be chipan jun lugar rbinaꞌan Rwiꞌcamnak. Ja cꞌa chipan ja tzobal hebreo Gólgota neꞌxi ja lugar. 18Ja cꞌa tok xeꞌekaji triꞌ querip wiꞌ ja Jesús chwach cruz. Ecꞌo chi na caꞌiꞌ achiꞌiꞌ xequerip chwach jujun cruz chakajaꞌ, e jujun pa tak rxquin ja Jesús.

19Ja Pilato arjaꞌ cꞌo juleꞌ tzꞌibanem xuban in xuyaꞌ parwiꞌ ja cruz, quewaꞌ nbij ja tzꞌibanem riꞌ: —Jesús aj Nazaret, rey quixin ja tinamit Israel, neꞌe. 20E qꞌuiy chique ja raj Israel ja xetzꞌatowi ja tzꞌibanem como ja lugar ja bar rip wiꞌ ja Jesús chwach cruz xa chinakaj ja tinamit cꞌo wiꞌ. Ja tzꞌibanem oxiꞌ rwach ja tzobal tzꞌibax wiꞌ, jun pan hebreo, jun pa griego in jun pa latín. 21Pro ja jefe quixin sacerdote quixin ja raj Israel ejeꞌeꞌ quibij tre ja Pilato:

—Ajoj ma ok conforme ta ruqꞌuin ja tzij ja xatzꞌibaj chi arjaꞌ rey kaxin ja rok aj Israel. Mejor ja naban, quewaꞌ tatzꞌibaj riꞌ chi arjaꞌ nbini chi: —In rey quixin ja raj Israel, neꞌe, xecheꞌ tre.

22—Ja xintzꞌibaj, xintzꞌibaj ariꞌ, xecheꞌxi rmal ja Pilato.

23Ja cꞌa re quijiꞌ soldado tok quiripon chic ja Jesús chwach cruz cꞌacꞌariꞌ quejal ja rtziak in quejach chiquewach, jujun quixin ja tziak. Pro cꞌo chi na jun ja tziak ja ni majun dison wiꞌ, xa jun chi quiemic. 24Rmalcꞌariꞌ ja soldado quewaꞌ quibij chibil tak quiꞌ riꞌ: —Mejor matikarak ja wariꞌ, kabanaꞌ suerte trij nak xtikajben chake, xecheꞌe. Queriꞌ queban in triꞌ bantaj wiꞌ cumplir ja tzꞌibtal can ojer chipan ja rtzobal Dios, quewaꞌ nbij riꞌ: —Quejach ja ntziak chiquewach in cꞌo jun ja ntziak queban suerte trij, queriꞌ ja tzꞌibtal can in ni queriꞌ queban ja soldado.

25Ja cꞌa ruteꞌ ja Jesús rachbil jun ruchakꞌ ecꞌo chinakaj ja cruz e rachbil chic caꞌiꞌ ixokiꞌ, jun María ja rxjayil Cleofas in jun chic María Magdalena rubiꞌ. 26Ja Jesús xutzꞌat ja ruteꞌ in cꞌoli ja discípulo xutzꞌat chakajaꞌ ja congana nrajoꞌ. Ja cꞌa tok xutzꞌat chi ecꞌo chirnakaj quewaꞌ xbij tre ja ruteꞌ riꞌ:

—Jalaꞌ jun ndiscípulo leꞌ jalaꞌ noc chic awal, neꞌ tre. 27Cꞌacꞌariꞌ xbij tre ja rdiscípulo:

—Ja nuteꞌ leꞌ jalaꞌ noc chic ateꞌ atat, neꞌ tre. Ja cꞌa discípulo tok meloji xucꞌamel ja ruteꞌ ja Jesús in xucꞌul chijutij pa rochoch.

28Ja Jesús arjaꞌ rotak chi tzurnak chic rmal nojelal ja samaj ja yatajnak tre chi nurbanaꞌ cꞌacꞌariꞌ xbij: —Chakichiꞌ nnaꞌ, neꞌe. Ja tok xbij awaꞌ tzij riꞌ triꞌ bantaj wiꞌ cumplir ja tzꞌibtal can ojer chipan ja rtzobal Dios. 29Triꞌ cꞌo wiꞌ juleꞌ vinagre cꞌolon pa rcꞌolibal. Ja cꞌa soldado ejeꞌeꞌ quecꞌam jun esponja, quexim chutzaꞌm jun cheꞌ, quichꞌakbaꞌ tre ja vinagre cꞌacꞌariꞌ queyaꞌ nojoj chwa rey ja Jesús in xutij. 30Ja cꞌa tok titaj rmal quewaꞌ xbij riꞌ: —Camic xinqꞌuis rbanic ja nsamaj nojelal, neꞌe. Cꞌacꞌariꞌ kꞌochkꞌoꞌ kaj ja rwiꞌ, xujach ja ranma pa rukꞌaꞌ ja Dios in cam kaj.

* * * * * * * * * *

31Como jariꞌ kꞌij pispra rxin ja nmakꞌij pascua in pispra rxin ja xulaꞌnbal kꞌij chakajaꞌ rmalcꞌariꞌ tok ja raj Israel ejeꞌeꞌ quicꞌutuj tre ja Pilato chi nkꞌi̱p cakan ja recꞌo chwach cruz utzcꞌa chi necami chanim in newasaxel. Queriꞌ queban utzcꞌa ja quicuerpo matiqꞌuejeꞌ chwach cruz chipan ja xulaꞌnbal kꞌij como jariꞌ xulaꞌnbal kꞌij nmakꞌij pascua chakajaꞌ in congana nim rukꞌij. 32Ja cꞌa soldado ejeꞌeꞌ xeꞌekaj cuqꞌuin ja re caꞌiꞌ achiꞌiꞌ ja reripon chwach cruz pa tak rxquin ja Jesús in quekꞌip cakan. 33Pro ja tok quetzꞌat ja Jesús chi camnak chic ma xquekꞌip chi ta ja rkan. 34Pro cꞌo jun chique ja soldado, arjaꞌ xumin jun lanza pa rupox ja Jesús in chanim xelto juleꞌ quicꞌ rachbil yaꞌ. 35Jawaꞌ ja bantaji riꞌ anin xintzꞌat ruqꞌuin nwach in ja xintzꞌat jariꞌ nyaꞌon chic rbixic in bien wotak chi ni katzij wiꞌ in camic nbij chic chewe utzcꞌa chi nenimaj ixix chakajaꞌ. 36Queriꞌ bantaji como ni rjawaxic wiꞌ chi bantaj cumplir ja tzꞌibtal can tre ja Cristo chipan ja rtzobal Dios ojer como quewaꞌ nbij riꞌ: —Ni majun rbakil xtikꞌip ta, neꞌe. 37In jun chic ja tzꞌibtal can tre quewaꞌ nbij riꞌ: —Ejeꞌeꞌ nquetzꞌat na rwach ja cꞌo jun chꞌichꞌ min pa rupox cumal, neꞌe.

* * * * * * * * * *

38Cꞌo cꞌa jun achi José rubiꞌ aj Arimatea, arjaꞌ jun discípulo rxin ja Jesús, be ruqꞌuin ja Pilato chi nercꞌutuj tre ja cuerpo rxin ja Jesús. Pro xa pan awatali tok be como arjaꞌ nxbej riꞌ chiquewach ja rach tak aj Israel. Ja cꞌa tok xekaji ruqꞌuin ja Pilato yaꞌ lugar tre rmal chi nucꞌamel ja cuerpo in queriꞌ xuban xucꞌamel. 39In xekaji ja Nicodemo chakajaꞌ, jariꞌ mismo Nicodemo ja xuban jutij be ruqꞌuin ja Jesús chakꞌaꞌ xerkꞌijlaꞌ. Arjaꞌ cꞌo la jun quintal akꞌom rcꞌamonto congana quiꞌ rxulaꞌ, caꞌiꞌ rwach ja rakꞌom, juleꞌ mirra neꞌxi, in juleꞌ chic áloes neꞌxi. 40Ja Nicodemo rachbil ja José ejeꞌeꞌ quecꞌam ja cuerpo rxin ja Jesús, quecoj ja rakꞌom trij juleꞌ tziak in quebar ja cuerpo rxin ja Jesús chipan. Niquirwariꞌ ja quicostumbre ja raj Israel tok cꞌo jun mukuninem nbani. 41Ja bar rip wiꞌ ja Jesús chwach cruz triꞌ cꞌo wiꞌ jun lugar cꞌo juleꞌ tijcoꞌm ticon chwach. Cꞌo jun jul xin camnak chipan ja lugar. Ja jul jariꞌ cꞌoton chwach jun portales pro cꞌa rcꞌotic wiꞌ, ni mta wiꞌ jutij cojon ta jun camnak chipan. 42Como xa nakaj cꞌo pon wiꞌ ja jul rmalcꞌariꞌ tok queyaꞌ can ja cuerpo rxin ja Jesús chipan. Queriꞌ queban como xa nnakajinto ja hora ja numajel wiꞌ ja nmakꞌij pascua.

Currently Selected:

Juan 19: tzjW

Highlight

Copy